Muzeolojia Sefaradi

Por:
- - Visto 722 veces

La importansia de los muzeos para poder mijor konoser i entender la kultura de un puevlo ya es rekonosida universalmente i oy, en kada paiz ke respekta su istoria i su kreasion kulturala ay una muchidumbre de muzeos de todo djenero: istorikos i arkeolojikos, de arte i de etnografia, sensia i teknolojia, etc., sin kontar los sienes i mizmo miles de muzeos dedikados a un tema espesial komo seramika, tapetes, mobles i mas.

Por diversas razones sovre las kualas no mos detadraremos aki, este aspekto fue neglijado en el mundo sefaradi i es en los ultimos anyos solamente ke se empeso a lavorar seriozamente para krear una red de muzeos ke reflekten las tradisiones i la kreasion kulturala de las komunidades sefaradis esparzidas en el mundo.

Es interesante ke los primeros pasos en este kampo no vinieron de parte de los sefaradis eyos mizmos sino ke de Espanya, ke ya desde la fin del siglo 19 – prinsipios del siglo 20, empeso a realizar kuanto era grande la kontribusion de los djudios a su propia istoria i kultura.


Esto se reflekta, entre otras, en el Dekreto del 18.3.1964, en vigor del kual fue kreado el Museo Sefardi de Toledo, i en el kual es dicho:

“…En el deseo de mantener y estrechar los lazos que secularmente han vinculado a los sefardíes a Espana, parece singularmente oportuna la creación de un Museo destinado a los testimonios de cultura hebraico-española.”

Este muzeo ke fue restorado i ancheado entre los anyos 2001-2003, se topa en lo ke fue un tiempo la sinagoga al nombre de Samuel Halevi i es konosida agora komo la Sinagoga del Transito. Lo ke kedo de sus paredes, rikamente dekoradas kon arabeskas i inskripsiones kon versetos biblikos, mos da una idea de su splendor, en sus dias de gloria antes de la Ekspulsion de 1492.

En el muzeo el mizmo, ke se espande en unas kuantas salas aneksas, pueden ser vistos livros i dokumentos, objetos de arte ritual, djoyas i vistimienta, seramikas diversas i en el patio, piedras tombales kon inskripsiones kon letras ebreas.

El Museo del Judaismo Catalan, kreado en Gerona en el anyo 1989, adjuntando i restorando unas kuantas kazas en lo ke era de antes “la juderia” de esta sivdad, tiene el tambien, ekspozadas en salas diversas, 16 piedras tombales ke vienen del antiguo bedahen djudio de Montjuic.

En las salas de este muzeo ke tiene un ermozo patio, onde los grupos de vijitantes resiven eksplikasiones, ay ademas toda una seleksion de atuendos, vistimienta, doku- mentos i mas ke reflektan las tradisiones de la komunidad djudia ke bivio ayi.

De todas las komunidades djudias al deredor del Mediterraneo, la ke es mijor dokumentada del punto de vista muzeolojiko, es la de Gresia, kon tres muzeos: el de Atena ke reflekta la istoria i kultura de todas las komunidades djudias ke bivieron en este paiz, i los de Saloniko i Rodes ke son dedikados espesifikamente a las komunidades djudias de estas dos sivdades.

El mas veterano de entre eyos, el Muzeo de de los Djudios de Gresia, en Atena, fue fondado en 1979 i en 1997 se trezlado a una fragua mas grande i mijor adekuada a su lavoro.

En el primer de los siete kates de este muzeo estan ekspozados un ermozo Aron Akodesh i otros mobles del kal de Patras. En los otros kates ay vitrinas bien aklaradas i dokumentadas sovre la vistimienta i las djoyas, los objetos de kulto, tekstiles i mas de los sefaradis de Gresia. Ay tambien livros, dokumentos i fotografias sovre bodas i otras festividades ansi ke sovre el periodo de la Shoa.

El muzeo de Saloniko, ke se topa en el sentro mizmo de esta sivdad, en uno de los pokos edifisios del viejo kuartier djudio ke no fueron kemados en el grande fuego de 1917, tiene, en desparte de su propia koleksion, la Ekspozision Fotografika Simon Marks “Saloniko, metropol sefaradi”, i tambien la ekspozision “Memorias” de la Universidad Bar Ilan, formada por atuendos folklorikos i relijiozos de los djudios de Gresia ke emigraron a Israel.

Muncho mas modesto, el muzeo de Rodes fondado sovre la inisiativa del avokato Aron Hason de Estados Unidos, se topa en una kamareta a la kuala se yega por el kurtijo de la sinagoga “Ka’hal Shalom”. Ayi se bushka, por medio de vistimienta i otros atuendos ansi ke fotografias arekojidas de rodeslis en diversas partes del mundo, a mantener bivo el rekuerdo de esta komunidad ke fue kaji kompletamente eksterminada en la Shoa.

En Turkia los esforos para la kreasion de un muzeo ke reflekte la istoria i kultura de los djudios de este paiz, empesaron despues de 1992, en el kuadro de los proyektos para konmemorar el aresentamiento de una parte de los ekspulsados de Espanya en el Imperio Otomano.

Sovre la inisitiva de la Fundasion del V Sentenario, el kal de Zulfaris ke ya no era mas uzado para los servisios relijiozos regolares, fue restorado i adaptado a sus muevas funksiones. El Muzeo Djudio de Turkia, ke fue inaugurado en 2001, tiene tres etajes en los kualos pueden ser vistos Sifrei Tora i objetos de kulto; el “Midrash Te’hilim”, un livro imprimido en Estambol en 1512, vente anyos apenas despues del arivo de los primeros sefaradis a esta sivdad; dokumentos, objetos atados a la boda, paridura i sirkusizion; vistimienta de los djudios ke bivieron ayi durante sinko siglos i mas, i tambien en la galeria del muzeo, una rika koleksion de fotografias de novios i novias entre los anyos 1860-1960.

Viniendo a Israel, es regretable ke djustamente en este paiz ande bive la komunidad sefaradi mas grande del mundo no ay ainda un muzeo ke dokumente i prezente la istoria i kultura de esta komunidad de una manera ke le aga onor.

Aun kon esto, ay unas kuantas koleksiones muzeografikas ke meresen ser mensionadas:

1- El kurtijo i el salon sefaradi en el “Muzeon Hatser ‘Hayishuv ‘Hayashan” (el Muzeo del Kurtijo de la vieja Yerushalayim), kreado despues de 1967 afin de dokumentar el modo de vida de los djudios de esta sivdad, sefaradis i eshkenazis, asta ke kayo entonses en manos de los arabos en la gerra de 1948.

Eyos bivian entonses en kazas de una o dos kamaretas al deredor de un kurtijo ke era el espasio onde se enkontrava el vizindado, en los lavoros de kada dia ansi ke en las fiestas i alegrias. El salon sefaradi de este muzeo esta areglado i mobleado segun era el uzo en las famiyas sefaradis, kon su kama de parida, las kolchas i los manteles de mezas, las kemeot i tambien, en la kuzina, los atuendos uzados para el gizado, el lavado i la limpieza de kaza. En este muzeo ay tambien un salon eshkenazi i un salon marokano, lo ke permete de komparar la kultura materiala de estas tres komunidades.

Muncho mas grande i mas rika es la koleksion del Muzeo de Israel ke fue arekojida despues de dos anyos de lavoro, para la Ekspozision del Djudaizmo Otomano ke tuvo lugar en 1989. Esta ekspozision inkluyo sienes de objetos empesando de djoyas i vistimienta de ombres, mujeres i kriaturas, pasando por livros, dokumentos i fotografias i asta una manyifika “tavla de adulsar”, ke reprezentan la kultura materiala del djudaizmo otomano en jeneral, i de Turkia de manera mas partikulara.

Despues de aver sido ekspozada durante largos mezes, esta koleksion fue transferada a los magazenes del muzeo, deshando solo algunas de sus piesas mas ermozas ke estan ekspozadas en el Departamento de Etnografia del Puevlo Djudio, al lado de piesas karakteristikas de otras komunidades tambien.

Otra koleksion mas chika se topa en el Muzeo de la Komunidad Sefaradi de Yerushalayim, en los Kuatro Kales al nombre de Rabi Yohanan Ben Zakai. Pueden ser vistos ayi Sifrei Tora, objetos de kulto i tambien dokumentos entre los kuales un firman del governo otomano.

A la diferensia de los muzeos ke mensionimos, el Muzeo de la Diaspora, en Tel Aviv, no tiene objetos autentikos sino ke trata de dokumentar la istoria i la kultura del puevlo djudio por medio de ekspozisiones fotografikas, una de las kualas es la koleksion Mordehay Arbell sovre las komunidades djudias (sefaradis) en la rejion de los Caribes.

Una konsepsion diferente se topa a la baza de dos ekspozisiones de la Autoridad Nasionala del Ladino: de no tener las ekspozisiones en un muzeo sino ke de azerlas de manera ke puedan ser yevadas fasilmente de un lugar a otro i puedan ser vistas por un publiko muncho mas numerozo.

La primera de estas fue la ekspozision “Suenyos de Espanya”, ke fue amostrada en primero en Yerushalayim, en la Feria Internasionala del Livro de 1999 i despues en Maale Adumim i en la Universidad Ben Gurion de Beer Sheva, despues de lo kualo fue yevada a Espanya Poster de la ekspozision onde pudo ser vista en 7 sivdades diferentes. ke tuvo lugar en Avila

Oganyo esta ekspozision fue renovada i aktualizada, kon el nombre de “Suenyos de Sefarad”, i despues ke ya fue mostrada en el Instituto Cervantes de Tel Aviv se pensa embiarla a un torno ke la yevara a Espanya i a otros paizes mas.

Se puede dizir en konkluzion, ke el esforso ke fue echo estos ultimos anyos en el kampo de la muzeolojia sefaradi ya permetio de krear unos kuantos muzeos ke mos ayudaran a dokumentar, i prezentar al publiko de una manera serioza i atrayente, los prinsipales aspektos de muestra istoria i kultura.

La verdad es ke en este kurto artikolo no pudimos mensionar todo lo ke es echo en este kampo. En otros lugares tambien ay chikos muzeos o ekspozisiones ke kontribuyen a esta tarea kon sus “graniko de arena”. Deve ser klaro, djuntos kon esto, ke ainda estamos al prinsipio solo de lo ke devemos azer para dokumentar todos los aspektos de muestra istoria i kultura, antes ke sea demazia tadre i ke los livros, fotografias, dokumentos, vistidos, atuendos de kaza i mas ke formaron la kultura materiala de las komunidades sefaradis, munchas de las kualas ya no existen mas, sean pedridos kompletamente, sin posibilidad de rekuperarlos para ke puedan ser vistos por muestras sigientes jenerasiones tambien.

Podesh obtener mas anchos detalios sovre estos muzeos en vijitando sus sitios de web, sigun los adresos ke damos aki:

Museo Sefardi, Toledo:
www.museosefardi.net

Muzeo Djudio de Gresia, en Atena
www.jewishmuseum.gr

Muzeo Djudio de Saloniko:
www.jmth.gr

Muzeo Djudio de Rodes
www.RhodesJewishMuseum.Org

Muzeo Djudio de Turkia, Istanbul:
www.muze500.com

Muzeo de Israel, Yerushalayim
www.imj.org.il

Muzeon HaHatser, Yerushalayim
www.most.gov.il

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.


El tamaño máximo de subida de archivos: 300 MB. Puedes subir: imagen, audio, vídeo, documento, hoja de cálculo, interactivo, texto, archivo, código, otra. Los enlaces a YouTube, Facebook, Twitter y otros servicios insertados en el texto del comentario se incrustarán automáticamente. Suelta el archivo aquí

Artículos Relacionados: