Nahman de Bratslav

Por:
- - Visto 519 veces

Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Por empesar, vos akodro ke el proksimo atelye de konversasyon de Vidas Largas se tendra el martes 25 de avril, a las dos i medya, en el Centre Communautaire. Estos atelyes son avyertos a todos, venid munchos.

Vos akodro tambyen ke agora las emisyones de Radio J se pueden oir por internet sovre el sityo de Radio J, de toda manera en direkto, i en vezes despues…depende del tekniko.


http://www.radioj.fr

Vos dishe, ay unas kuantas semanas de esto, ke ya me kansi de azer nekrolojiyas. Es vedra. Ama la djente, eya, no se kanso de morir. I oy, ke vo avlar de un famozo lehli, el Rav Nahman de Bratslav, no puedo kedarme sin avlar en primero de dos lehlis ke se fueron estos diyas, David Rubinger el 2 de marso, i Henri Minczeles el 10 de marso.

David Rubinger fue un fotografo israelyano ke tomo en su larga vida medyo milion de fotos, i kedo famozo en el mundo entero por una sola, ke tomo kuando fue konkistado el Kotel el 7 de junyo 1967. Rubinger tomo de embasho una foto de las karas de tres parashutistas mirando el Kotel, i esta foto, muy konosida, izo la buelta del mundo.

Rubinger aviya nasido en Viena (Austria) en 1924. Kuando uvo el Anschluss i ke ayegaron los Nazis en Viena, el pudo eskabuirse grasyas a la Aliyat Anoar (Aliya e los Mansevos) ke reusho a yevarlo en un kibuts de Palestina pasando por Italia. Su padre tambyen pudo salvarse en Ingletyerra, ama no su madre ke mataron los Almanes.

Durante la gerra Rubinger entro en la Brigada Djudiya ke kombatyo en Afrika del Norte i en Evropa.

Despues de la gerra, indose a ver su padre en Ingletyerra, se ambeza ke tyene en Almanya paryenté ke sovrebivyo a la gerra. Se va a verlos en Almanya, i aya konose a su prima Anni, ke kyere azer su aliya. Para darle la posibilitad de entrar en Palestina malgrado los Inglezes, se kaza kon eya. Deviya ser solo un kazamyento por marafet, i en vedra se izo un kazamyento de 50 anyos, kon dos kriaturas, sinko inyetos, i asta oy dos bizinyetos…

Kuando se muryo Anni, Rubinger, sin kazarse, se metyo, a los 78, kon una mujer venida del Yemen, ke dos anyos i medyo mas despues fue asasinada por un arabo ke aviya sido su bahchavan.

Rubinger fue yamado por Shimon Peres el fotografo de la Nasyon. Tomo fotos de kada gerra, de kada ombre o mujer de Estado (Ben Gurion, Golda Meir, Begin, Netanyahu, i kuantos otros) i resivyo el Premyo de Israel (la mas grande medalya del pais) por su ovra entera.

I agora avlaremos de Henri Minczeles, ke nasyo en Paris en 1926, en una famiya de djudyos venidos de Polonya. Su padre Szepsel es un kortador modelisto leshos de la relijyon, afillu si por la famiya de su madre tyene komo antepasado el famozo kabalisto del siglo 17 Isaac Louria, de Safed. Su mujer kuzendera vyene de una famiya de hasidim. Los dos fuyeron la Polonya antisemita i atrazada al empesijo de los anyos 20.

Vyene la gerra, i, en 1941, Szepsel, el padre de Henri, resive el maldicho bilyete vedre ke le demanda de venir al karakol, del karakol es embiyado en Pithiviers, i de Pithiviers es embiyado por el treno n° 6 del 17 de djulyo 1942 en Auschwitz ande va ser asasinado. Henri tyene 16 anyos, eskapa kon su madre i su ermano al aferramyento de masa del 16 de djulyo, ama kaye hazino de la tuberkulozis i deve irse en un sanatorium. Sale de aya en 1943 i abolta en Paris ande se eskonde i se ambeza de azer falsos papeles, i para el por empesar. Entra en la Resistansya, partisipa en la Liberasyon de Paris, i despues de la gerra entra el el partido sosyalisto, kual ke sea su nombre ke troko muncho. I en el mismo tyempo, entra en el movimyento del Bund i aya se aze gazetero. Despues de tener lavorado munchos anyos komo merkader, dechida en 1984, a la edad de 58 anyos, de empesar estudyos universitaryos ke se eskapan en 1991 kon una tezis de doktorato de Istorya sovre Vilna, Vilno, Vilnius, la Yerushalayim de Lituaniya (1918 – 1940).

Desde este tyempo, retirado de los echos, se va konsagrar enteramente a la eskritura, al jurnalismo, i a la vida asosyativa.

En 1995 eskrive “Istorya jenerala del Bund, un movimyento revolusyonaryo djudyo”. Kale dizir ke, en mismo tyempo (de 1992 a 1996) va ser prezidente del Sentro Medem Arbeter Ring; entre 1979 i 2001, a kollaborado a la Biblioteka Medem.

Ya vos tengo avlado, en una emisyon del 18 de avril 2013, del Bund, este movimyento ovrero djudyo, ke, tenyendo la partikularidad de kerer la emansipasyon de los ovreros djudyos en el pais ande lavoran i no en Israel, se alesho del syonismo. El Bund va ser muy aharvado por la shoah, i tambyen, despues de la gerra, por la asimilasyon. Mi mujer, ke se va kada semana avlar yidisch en la Kaza de la Biblioteka Medem, me disho ke la grande mayoriya de los myembros tyenen desendyentes kazados kon kristyanas.

Esto dicho, Henri Minzeles no se kedo de eskrivir i de militar en munchas asosyasyones djudiyas, por egzemplo la Asosyason de los ijos i ijas de deportados djudyos de Fransya, o la Asosyasyon para la memorya de las kriaturas djudiyas deportadas; avlava tambyen en la radyo, aziya konferensyas, ets.

Esto dicho, vengo agora al Rav Nahman de Bratslav, famozo reprezentante del movimyento de los hasidim, del kual ya vos teniya dicho unas kuantas kozikas kuando ize el 13 de septyembre 2012 una emisyon sovre el hasidismo.

(Aki avro una paranteza: Si vos vyene la gana de meldar una vyeja emisyon miya, tenesh dos posibilidades: sea, si sosh myembros de Ladinokomunita, lo ke vos akonsejo de ser, vos vash sovre Files, despues Edmond Cohen, i aya se topan en el orden kronolojiko todas mis emisyones desde septyembre 2009, de la mas resyente a la mas vyeja. Sea vos vash sovre eSefarad, i klikash sovre Buscar, por egzemplo Edmond Cohen El hasidismo. Syerro la paranteza).

Oy me pensi de avlar de este ombre kuryozo i interesante, Nahman de Bratslav, un poko mas ke lo ize en 2012.

Kale saver ke muestro Nahman nasyo Nahman Ben Simha, en 1772 en Medjybij, en Ukranya, en la kaza de Baal Shem Tov, el fundador del movimyento hasidiko, ke era su bispapu de la vanda de su madre.

A los tredje o katorze, se kaza kon la ija de un haham, i el diya de su boda ya le vyene su primer dishiplo, Rabi Shimon, afillu si este se topa ser muncho mas aedado ke el.

A los vente anyos, ya tyene munchos otros dishiplos. A los 26, estamos en 1798, Bonaparte empesa la kampanya de Ayifton, Nahman dechida de irse en Erets Israel, akompanyado por solo Rabi Shimon.

El viyaje fue yeno de aventuras, kon rizikos terrivles: la fortuna, los piratas ke lo azen prezonero en mar, la landre (peste) sovre la tyerra, los arabos, fue mismo sospechado de ser un espion de Napoleon!

Yene se fue en munchas sivdades para ver las komunidades, i reusho de traer una syerta paz entre hasidim i mitnagedim (oppozantes).

Al kavo Nahman i su kompanyero pudyeron aboltar en Ukranya, sanos i rezyos, al empesijo del enverano 1800. Nahman enkomendo de no tener kuenta de su ambezamyento de antes de su viaje, dizyendo:”Ande ke ayga, me vo en tyerra de Israel.”

En 1802, Nahman se va morar en Bratslav, sivdadika de Ukranya ke dinguno konoseriya sin Nahman, el kual va ser yamado desde este diya, Rav Nahman de Bratslav, i esto es lo ke va azer ke el nombre de esta sivdadika va ser konosido asta oy en el mundo entero.

Lo ke vengo de dizir es haliz vedra, ama no so yo ke lo digo, es Nahman el mismo, ke disho: “Tenemos este diya sembrado el nombre de los Breslover hasidim. Este nombre no va dezapareser porke mis dishiplos seran syempre yamados por el nombre de la sivdad de Bratslav.”

Poko tyempo despues, Nahman aze la konosensya de un mansevo de 22 anyos (Nahman tyene 30), Nosson (Nathan) Sternhartz, de Nemirov. Se va azer el dishiplo fiel de Nahman, al punto ke la djente lo va yamar Rabi Nathan de Bratslav.

Su venida es muy importante, porke Nahman, komo Socrates, komo Jesus, no desho dingun eskrito, de una parte porke, puede ser, no eskriviya muncho, ama sovre todo, de otra parte, porke demando a Rabi Nathan de kemar todos sus eskritos despues de su muerte, i Nathan acheto i lo izo. Ama, orozamente, Nathan, komo izo Platon para Socrates o los dishiplos de Jesus para las palavras de Jesus, eskriviya todo lo ke diziya Nahman, i ansina su ambezamyento kedo. Ke ambezamyento? Esto lo vamos a ver mas despues.

En 1807, la mujer de Nahman se muere, i Nahman, ke tyene solo 35 anyos, toma otra mujer. Ama poko despues le vyene la negra hazinura de la tuberkulosis. Su kaza kema en 1810, i se ve ovligado de irse. Va topar abrigo en la sivdadika de Ouman, ande maskilim. Los maskilim son los partezanos de la Haskala, las Luzes, el modernismo. I es ande eyos, en Ouman, ke se va morir el 16 de oktovre 1810, a la edad de solo 38 anyos.

Kale saver ke asta oy son miles de Breslover (25.000 en 2008) ke vyenen kada anyo a Ouman, en Ukranya, para onrar la tomba de Nahman.

Elie Wiesel, ke eskrivyo una muy ermoza Célébration Hassidique, izo una komparazon entre Nahman i Franz Kafka: el Tzaddik de Ukranya i el romansero de Prague tuvyeron destinos semejantes: Los dos muryeron mansevos: El Rabbi a 38 anyos, el eskrivano a 41. Aharvados por el mismo mal: los pulmones. Los dos aviyan enkomendado ke sus eskritos sean kemados. I kada uno teniya un amigo fiel a kyen devemos la sovrebivyensa de sus ovras. Lo ke Max Brod fue por Kafka, Nathan lo fue por Nahman. Salvo ke Nathan obedesyo i kemo todo, i no Max Brod.

En vedra, asigun mi, las semejansas no son solo entre Nahman i Kafka, son tambyen kon Elie Wiesel el mismo. Las istoryas de Wiesel, komo las de Nahman, son yenas de sedakeros i de lokos.

Ayegimos agora a la ora de avlar de la ovra i del ambezamyento de Rav Nahman de Bratslav.

Komo ya lo dishe, es grasyas a Rabi Nathan, su dishiplo, ke konosemos esta ovra i estos ambezamyentos.

Rabi Nathan akojo lo mas del ambezamyento de su maestro en un livro intitolado Likutei Moharan (akojimyentos de Muestro Rav Nahman): 411 lisyones, kada una yamada Thora, ke son ambezamyentos mistikos, travados del Zohar, de la Kabala en jeneral, i del famozo kabalisto yamado el Ari (el Leon, Isaac Louria, del kual vos avli al empesijo de esta emisyon, dizyendovos ke era el antepasado de Henri Minczeles).

Al lado de esta ovra prinsipala, Nathan mos dyo tambyen los sipurei maasiyot (los kuentos). Komo ya lo savesh, los midrashim son yenos de kuentos para dar a entender una lisyon. El Meam Loez es yeno de tales maasiyot ke azen muestro plazer. Tambyen Nahman de Bratslav kontava munchos maasiyot, salvo ke la lisyon ke es de travar de kada maase no es evidente. Kale muncho pensar para entender el senso ondo de tal maase. En vezes un maase empesa, en medyo de este maase otro empesa (komo en los kuentos de las mil i una noches) i despues no tenemos el kavo del primer maase…

En su Selebrasyon Hasidika, Elie Wiesel se tresale de kontarmos unos kuantos. Este, por egzemplo:

Era una vez un pais ke konteniya todos los paizes del mundo; i en este pais aviya una sivdad ke konteniya todas las sivdades del pais; i en esta sivdad aviya una kaleja ke konteniya todas las kalejas de la sivdad; i en esta kaleja aviya una kaza ke konteniya todas las kazas de la kaleja; i en esta kaza aviya una kamareta, i en esta kamareta aviya un ombre, i este ombre reprezentava todos los ombres de todos los paizes, i este ombre reiya, reiya, i dinguno aviya tan reido komo el.

I ansina se eskapa el kuento, i Wiesel eskrive: “kyen es este ombre? El Kriador riyendo de su kreasyon? El ombre aboltandole su riza en eko, o puede ser en desfiyo? Lo savremos un diya?”

Komo lo vesh, ay lokura, ay misteryo, ay poeziya en los kuentos de Nahman, ke, por lo ke meldi, son todos mas o menos del mismo djiz.

Yene ay vezes ande se entyende muy byen. por egzemplo el destino del ombre, kualo es? Un kondenado a muerte, asentado en una araba travada por dos kavayos, dos kavayos ke konosen el kamino de la orka. Estos dos kavayos se yaman “diya” i “noche”. I korren! i korren!

Meldi ke Nahman era “bipolaryo”, komo se dize agora: pasando de la alegriya i la egzaltasyon al pesimismo lo mas ondo (un poko komo Shabetay Tsvi). Deviya toparse en este sigundo tyempo kuando eskrivyo esto…

El mismo ke eskrivyo lo ke vos meldi, enkomendava de dar palmas, de kantar i baylar, durante o despues de las orasyones, en una relasyon mas estrecha kon el Dyo: “La desgrasya, la sufriensa, vyenen de lo ke no entyendes lo ke se pasa. Si tyenes fey en el Dyo, entyendes ke lo ke te afita es por tu byen, i no sufres mas.”

La idea maestra de Rabi Nahman, es ke kale syempre ver lo bueno de las kozas komo de los ombres, komo de la vida. Asigun el, la alegriya es un komendamyento relijyozo tal i komo las otras mitsvot.

No se si uvyera dicho lo mismo si aviya konosido la Shoa…

Esto dicho, ay una dicha del rav Nahman muy konosida, a tal punto ke se eskrivyo una kantika kon esta dicha:

“El mundo entero es un puente muy estrecho, ama lo prinsipal es de tener dingun espanto!”

De Nahman tenemos dichas yenas de umor, komo esta: ” No demandes nunka tu kamino a alguno ke lo konose, porke podriyas no pedrerte”.

Komo vos dishe, esto todo lo konosemos grasyas a Nathan de Bratslav. Muy umilde, kuando le fue propozado, a la muerte de Nahman, de tomar su suksesyon, respondyo: “yo no so maestro, me kedo dishiplo!”

Yene asta oy, komo lo dishe, ay en el mundo entero dishiplos de Nahman, yamados los Breslover.

Al djueves ke vyene, si kyere el Dyo!

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.


El tamaño máximo de subida de archivos: 300 MB. Puedes subir: imagen, audio, vídeo, documento, hoja de cálculo, interactivo, texto, archivo, código, otra. Los enlaces a YouTube, Facebook, Twitter y otros servicios insertados en el texto del comentario se incrustarán automáticamente. Suelta el archivo aquí

Artículos Relacionados: