TEMEL I DURSUN
Los dos muy famozos amigos son “Laz” karakteristikos de los bodres de la Mar Preta en el Nord Este de Turkiya. Avlan en Laz o en Turko kon un aksento muy tipiko de esta rejyon. Los Lazes son konosidos por ser un puevlo kon una muy grande nariz i bastante “de la buena parte” komo dizimos en Turkiya para los ke son “buenachos”, no tienen dinguna maldad en sus korason ma no se puede dizir ke son de los mas “intelligentes” !…. En las historyikas konosemos Temel muy enamorado de su mujer “Fadime kon ojikos de almendra” i amigo muy intimo de Dursun kon ken son vizinos tambien.
En el journal – el link aki ariva- se eskrive ke los nombres de Temel, Dursun i Fadime no son mas tan popularyos en “Trabzon”, una de la prinsipales sivdades ande moran los Lazes, komo uzavan ser antes kuantos anyos ! I los nombres son echo de moda…..” Rize” se puede dizir ke es la sivdad kapitala de los Lazes al mas Este en el Norte famozo por la agrikultura del te (chay), por la konstruksyon de las “taka”s – para salir a la peshka siendo kuaji todos pishkaderos…..
Para kontarvos unos kuantos kuentizikos de Temel i de Dursun kije dar el aksento Laz i la sola koza ke me vino al tino era de pronunsyar muestra lingua de manera un poko diferente en sus dialogos.
I es ke…….
Un diya Temel fue ande su amigo Dursun i le disho
– Ven, vamus a fiestar ! Tingu un oto muevi !
– Komi un oto muevi ? Kon ke paras la merkatis ?
– No la mirki ! Mi istava indo a la sivdad i estavi aspirandu a un kamion para ke me tomi en kamino kuando una mujir se kedu dilantri di mi kun un oto koroladi briyandu.. Maraviyozi !
– Eh ?
– Mi dishu ke mi va yivar a la sivdad ..
– Fantastiku !
– En el kaminu parko en el bodri del riyu. Tiniya una fusta/fada ke paresi se li aviya arazgadu porki estava midya, dizmazalada, i se le viyi las pachis fina arrivi !
– Uyyyyy !
– Me miru ansini kon ojos kansados ! Mitad serrados ! I me dishu puedis tomar lo ke kiris. Tomi el oto !
– Seguro ! Ke ivas azer kun akeyi fusta medyi ?
*
Temel i Dursun desidaron de irsen a Istanbul. Tomaron bilyetos para el otobus ma les salyo los lugares a uno abasho i al otro ariva. Temel se asento ariva ma dospues de 2 horas de kamino le telefono a Dursun abasho para demandarle komo estava i para ke avlaran un poko…
– Ke tal Dursin ?
– Muy negru !
– Deke bre ? Kires ke vengu abasho para ayudarti ?
– Timel el shofir se durmi ! Mos estamos indo a la ida del Di-o !
– Hahahhaha ! Estu no es nadi ! Mozotros mus estamus indo sin shofir del todo ! Esti otobus savi ir solo. No ti ispantis !
*
Temel, ke mal mos kere, apanya una mala hazinura i save ke tiene los diyas kontados. Espandido en su kama i su mijor amigo Dursun a su lado se lamenta… A todos los ke vienen a vijitarlo dize ke se esta muryendo del AIDS/SIDA. I todos vienen kedan en pies unos kuantos
minutos i se van de la kamareta !
Dursun ya mas no puede i le dize
– Bre Timel ! Estas loku ? Ke vas dizyendu a todos ki
tienis AIDS SHMAIDS !!! No tienis nada de estu !
– Ahhhhhh Dursin ! Yo me estu muryendi ma mi Fadimi kon ojos de almindra va kedar sola…. A lo manko la salvi a eya i dingunis la tukan !
*
Temel i Dursun son soldados. Porke son grandes, mostrozos i fuertes los toman a ser komandos parashutistos. Se ambezan todo bueno i viene la hora de saltar del avion. Los meten en rango i todos saltan uno detras del otro. Temel i Dursun detras de eyos saltan tambien…
– Dursiiiiiiiiiiin ! Este lodo de kozi no se avriiii !
– Uyyyyyyyyyy ! Avri el segundu !
– Dursiiiiiiiiiiin ! Ni este p….. se avriiiii !
– Uyyyyy ! No ti espantis ! No estamus en guerra ! Es solo egzersisio!
Ke nunka vos manki las soriziiiiiiiiiiiiis !
[email protected]
Artículos Relacionados: