Djohá fue envitado un diya a komer ande un buen amigo.
Por primer plato le servieron un levrek kon mayonez ke le plazyó tanto ke demandó a la mujer de su amigo komo lo gizo.
La sinyora Zimbul le disho uno por uno todo lo ke kaliya aparejar antes de gizar el pishkado i dospués komo se deviya gizarlo.
Djohá eskrivyó todo lo ke le disho la sinyora Zimbul en la unya del dedo godro de su mano skierda.
A la manyana pishín fue al merkado i empesó a merkar las kozas ke nesesitava para azer el pishkado: 2 guevos, azete d’azetunas, 2 limones, una karota, una patata, turshí de pipinos i prishil, i, por seguro, un levrek ábastante grande para ‘l pranso de la noche!
Esta vez se iva komer él solo el levrek entero! Merkó a la fin el piskado ke le plazyó mas muncho i tomó el kamino de retorno para su kaza.
El levrek, al kual le aviyan pasado un ilo a la boka, lo teniya enkolgado a sus dedos en la mano derecha.
Lo estava meneyando en kaminando, uno adelantre i una atrás ! De otra parte estava meldando en la unya de la mano skierda kualo teniya ke azer en kaza.
En este momento saltó un gato preto i blanko, enorme i ke no aviya komido nada por dos diyas ! S’echó ensima del levrek, lo apanyó i se fuyó … koryó koryó i desparesyó detrás de los arvolés de una guerta.
Djohá kedó mirando sin kreyer a lo ke le afitó ! Un poko otro i él iva yorar ! I… supitó lo apanyó una riza loka… s’estava pishando de la riza ! riendo…riendo… i kon la mano derecha ke aviya kedado sin el pishkado enkolgado.
Kon su dedo godro estava enfasando lo ke estava eskrito en la unya de la otra mano !
– Bishmazal de gato ! Hayá sin intelijensya ! Vate, vate!
Nunka vaz a saver komo lo vas a gizar ! Mira!
Lo enfasí todo ! Yo mizmo no me akodro mas de nada! Tú komo lo puedes saver, eh ? Además….estó kansado! Fue mijor ansina! Ken se iva meter a azer todo este echo? Va pena tú agora ! Yo me vo ir a mi kazika i me vo arepozar! Un kafiko dospués de toda esta kanseriya me va vinir komo kura al hazino ! I tú, de mi parte, puedes irte al ginnam !
Artículos Relacionados: