Es la manera ke yamavan los judyos en los tiempos desgrasyados de la inkizisyon !
Keridos amigos i mis amigitas
Buenas demanyanas a todos.
Estan las 5 de la demanyana aki en Istanbul…
Empesa un Viernes de enverano tan kayinte ke no puide durmir i, a mi, no me gusta durmir kon el kondisionador avyerto. Me alevanto entera tomada i va i bolta la kavesa dospues si puedes !
Ayyyyyyy no ! Manko ke seya….
Me alevanti entera soriyendo, savyendo ke no puedo azer nada a estas horas porke todos estan durmyendo i yo me vo meter en frente de mi chikichiki para konversar kon vozotros, sin ser interrompida ! Adoro estar kon mi Carolina las demanyanas muy demprano. Ademas, mis gatikos me akompanyan, muy kuryozos siempre de lo ke ago ! Se meten en sus lugarikos al deredor de Carolina i tratan de travar mi attensyon kon mil jugos, hadras i ermozuras !
Bilge, mi ijika, esta soriyendo en su suenyo por ken save ke manera de ke koza esta vyendo ! Kada demanyana tiyene una parasha entera de kontarme. Lo mas son las amigitas de la eskola, las vakansas, la bisikleta, los patenes, sus maestros de eskola, yo (kaji siempre !)…
Aki ariva Bilge “Cinderella” i kon mi ijiko en “Kanlica”
Ke ermozo es de tener 20 anyikos ! Eya se toma por mi madre en vezes i yo me ago la ijika turbulente ke no kere entender razon, no kere azer nada ! Le ambezo ansina komo edukar los ijos, komo komportarse kon eyos, kualo es la pasensya, la responsabilitad i los doveres ke nunka se esparten. Le ambezo a merkar todo lo ke es nesesaryo, komo eskojer, komo demandar, pagar, tener kuentos I saver pensar, guizar i ser una buena i savida mujer de kaza…. Izo progresos immensos i ya estamos al nivel ke le puedo azer konfiensya enteramente…. Lo mas importante para mi fue de ambezarle ke no egziste “yo” en una mizma kaza. Todo es de todos. No ay “miyo” “tuyo”. No se aze ekonomiyas personales, se ekonomiza por la “kaza”. Nunka se toma desizyones, seya lo ke seya, solika ! Le ambezi esto todo ensima de mi-mizma sin nada demandarle. Oy, save ke es una manera de bivir i me kopya en todo…. Dospues de muy munchos anyos, me veyo ambezando la vida a Bilge egzaktamente komo lo ize kon mis otros kreaturas, ocho kon mi ijo. Grasyas al Di-o, so la madre kerida de todos, son mas de ermanos todos, todos reusheron en la vida, i son kontentos i horozos. Es la unika koza ke ize de bien en mi vida, sin pensar dos vezes, por amor I karinyo, porke se ke no se puede ser felis sin kompartir i sin deshar una ovra detras, seya lo ke seya…. I…. Lo ermozo es ke fueron eyos ke me engrandesyeron komo Bilge, agora !
Otra vez empesi a avlar de mi i de lo miyo, alora ke teniya otra koza en la kavesa ! Ahhhhh mi kavesika ke va i vyene i me aze mizeryas por keyf ! Porke ansina le kanta !! I…..Mi mano sigue
mi meoyo de 5 gramos sin ke la pueda detener !
Keriya dizirvos una koza ke inche mi korason de ravya I de tristessa… Es yamar muestros ermanos konversos : “marranos !” en otros biervos “puerkos” “koshones” “susyedad !!!!….
No kale mas uzar este biervo denigrente, horrible para avlar de personas humanas… No se uza mizmo para los ke lo meresen puedeser mizmo !
No somos marranos ! Muestros ermanos son konversos o cripto-judyos. Vos rogo de no uzar este biervo mas..
Espero ke todos estash de mi avizo.
Ke pasesh un diya maraviyozo i ke nunka vos manken las sorizas amigos muy keridos miyos….
Artículos Relacionados: