NUVLAS KE NO TRAYEN LUVYA
I KASTILYOS KE LAMBE LA MAR !?
ESPINAS EN EL KORASON….
BIERVOS KEDAN AL GARON…
VINO EL TIEMPO D’EZBAFAR
DIZIR LA VERDAD I ESPERAR !
Fina oy en diya no tengo dayinda una repuesta presiza por la razon ke egzistyo i egziste dayinda el antisemitizmo tan krual, tan dezgrasyado. Esto no puede ser un fenomen natural ! Fina oy, demandi a muy muy munchos antisemitos deke odyan judyos. NI UNO ME PUIDO DAR UNA REPUESTA LOJIKA. Avlan de karikaturas, de suzyedad, de avarisyo i del “amor por las paras” ! Yo tambien penso ke la vestimienta de los relijyozos i kuando estos rechesan de mesklarsen a la gente lokal atiran el odyo…O porke se kreyen ke judyos uzan la sangre de kreaturas kristianas por la matsa de PESAH !!! Lokuras de lokos !
MA ESTO NO PUEDE KAVZAR lo ke afito… Afita… Puede afitar mas….
No ! Mis 5 gramos de meoyo no bastan para yegar a una repuesta lojika…
EL MUNDO NO MOS DESHA OLVIDAR LA SHOA…. Ke rekuerdos penozos… No mos estan permetyendo de olvidar estas kozas kon las kualas ni se puede bivir…
Kuantos kedaron en vida de los ke bivyeron el holocausto ? Muy pokos por sierto ! Dainda tienen las firyidas en sus puerpos i en sus mientes…I.. Otra vez olas de antisemitizmo vienen ensima de los judyos.. Esta vez de la parte de los arabos kon el appoyo de los del ouest ke se preparan a embiyar no se kuantas otras naves gritando sus odyo por Israel, para provokar i kavzar flamas…. Flotilla de ayudo !!! Flotilla de violensya i nada mas ! Turkiya desidyo de no embiyar el Mavi Marmara esta vez porke no puede naviguar “teknikamente” .
Provokasyones… Fina ande ?
La paz entre los dos payizes seriya lo mas dezeado i nesesaryo ke puede akonteser ! Ma de aya a trokar los korasones de las personas ke peryeron sus keridos ay muncha distensya. No tanto para los Palestinianos ke kavzan tantas dezgrasyas ma por los Judyos ke se ven siempre atakados por ser aborresidos porke egzisten simplamente !
Los Palestinianos saven ke es por ke atakan ke les afita lo ke les afita.. Es muy diferente de lo ke afita a los judyos… Es komo si yo me izyera hazina en kaminando pies desnudos en la nieve o me azeriya hazina porke una amiga kontaminada me vino a vijitar.
ES LA DIFERENSYA….. KE TIENEN EYOS DE ODYARMOS ? Unos de los muestros avlan… Van i s’abrasan mizmo kon los ke tienen sed de muestra sangre…. Los amostra en todos los lugares… Koza grande ! Inkonsientes !
No kale echar sal a las firyidas ! Los pimpones ke kitan ansina de haberes no konosen los sentimientos de las personas pormodo de lo ke pasa en ISRAEL. Eyos en la gola no embiyan sus ijos a guadrar las frontieras i kedan sin durmir no savyendo kual mallogrado lo va apanyar o le va travar ensima….
Las madres arabas no tienen este espanto ! Durmen trankilas !No es Israel ke va matar a sus ijos ke no son agresivos NUNKA. Eyze olam ahzar ! (Ke mundo krual !)
EYOS SAVEN AZER PROPAGANDA…
Estamos azyendo todo lo ke puedemos en este sentido…Eyos kon boykotes en todos los kantones ! Es vedra ke lo todo tiene un aspekto muy amargo i esto mos aze mal a todos los judyos. Espero de todo mi korason ke kozas van a afitar para meter fin a estas dezgrasyas… Ansina no se puede kontinuar a avansar entre los payizes del mundo kon siempre kedar en la defansiva, eksplikar a todos ke tenemos razon kuando SAVEN ke tenemos razon… Es justamente aya ke esta enterrado el perro…(sham kavur ha kelev !) komo dizimos en Hebreo !
Ke remedyo mas egziste kuando konfliktos no se pueden rezolver ni kon politika i ni kon guerras ? En propaganda los arabos estan muncho mas avansados de mozotros kon sus mintiras, sus tonteriyas, sus gritos i sus lamentos yegando al sielo.. Un grande tiyatro ke enganya el mundo entero o solo kere ser enganyado para yamar los Petro-Dolares !
Tenemos muy muncho de ambezarmos de eyos !
MIJOR SER UN POKO PESIMISTO porke malhorozamente va aver de mas en mas bruidos ke van a korrer entre las frontieras, sin dingun pasaporto ! El fanatizmo del Islam se esta enfuertesyendo de diya en diya… Ken dize Islam oy dize tambien “odyar judyos” ! No todos… Lo espero de todo mi korason !
La demonstrasyon viene kon el appoyo de los antisemitos kristianos… Egzistiyan en massas antes de la Segunda Guerra i no bolaron a dinguna planeta.. Egzisten dayinda oy, aktivistos o passifistos… Por seguro ke va aver mas pogromes en munchos payizes i la polisiya va tener echos en otros lugares !… Kale ser preparados a estas manifestasyones violentas o partir sin muncho pensar… Oy son los produktos, amanyana seran las personas ! Es koza savida ! Todos lo saven ma se ve el mizmo apatizmo de antes ke se deklare la Segunda Guerra !
Asperar…. Esperar…. Biervos judyos ke nunka mos trusheron lo ke kijimos mas de todo en el mundo : LA PAZ… Komer un pan arepozado ! No estamos muy leshos de la avalancha ke ya empeso a arrezvalarse ensima de ande mos topamos…Vino la hora de saver ande estamos, ke estamos azyendo, ke vamos azer… Mijor ser un poko pesimisto ke ser un optimisto de la buena parte ! No se si esto se yama ser pesimisto o meoyudo !
Penso ke protestar delantre de los magazenes ets. ke venden produktos israelyanos (judyos !) es ekivalente a gritar su odyo – dunke kerer el mal i la dezaparisyon – para los judyos !
Ke keda mas grave de esto ? Deportasyones i ornos ? Elohim Lishmor !
Tenemos menester de LA HOHMA DE SALOMON, DEL ASTUSYO DE DAVID I FUERSAS DE LOS DRAGONES… El Di-o ke de muncha intelijensya a muestras dirijentes, para pueder protejar el puevlo judyo.
Uno de muestros amigos disho ke se deve de romper en primero la propaganda ke invento ke es de Yerushalayim ke se assuvyo al sielo Mahomet… Nada mas ke un mito entre otros mitos….
Mitos, propagandas, mintiras,
Asuvidas al Sielo,
Abashadas al Infierno,
Suterenos, legendas mistikas,
Murayas derrokadas,
Kultos, kalsados, fasulya o karantina..
Tu mira ke mos keren tomar la medina !
SE KERE MAS DE PREMIOS NOBEL PARA DEFENDER ISRAEL !
Absolutamente ! El passivismo i el humanizmo, las altas valoreske se dan a kualker persona en ISRAEL, la gana de azer paz mas de todo i approvar de tener buenas relasyones SIEMPRE kon los vizinos, ir a sus aguas, no demandar kon vigor de ser respektado en los Estados Unidos i siempre abokar kavesa, ezvacharse de tierras tomadas kon la sangre de TSAHAL, savyendo ke no mos dariyan ni una chika guerta si era sus viktoryas al lugar del muestro, Has ve Halila, les da a TODOS el derecho de arrebasharmos, de asuvirsen mas i mas a muestras espaldas en kitando horrores de la boka sin dinguna verguensa i dingun kudyado !
Azer propagandas mintirozas ke le kaye a Israel de provar el kontraryo !!!
Siempre lo dishe i lo dire….
Los payizes guerreyaron para tener sus frontieras de oy. Las guadran ! Basta de eksplikar lo ke todos saven…. Kale alevantar la boz i deshar de ser el “judyo dezmazalado” el “judyo kovarde”… Kale empesar a kastigar kada jesto antisemito, kada persona enemiga en KAZA o al ETRANJERO.
Mijor dar la alma en defendyendose ke en siendo la VIKTIMA! El mundo se esta muryendo del sar de los Arabos. Deke ? No saven mas komo kalmarlos, ke darles, komo avlarles kon dulsor i respekto ! Por los Israelyanos… Nada de esto ! Siempre ultimatomes, boykotes, ravya, menasas… Fina kuando Israel va akseptar de ser tratado de esta manera irrespektuoza ? Basta de ensenyar el passifizmo en las eskolas tenyendo vizinos assasinos ke inkulkan a sus kreaturas des de sus primera chikez komo matar judyos !
NO ES KON PREMIOS NOBEL KE TENDREMOS DERECHO DE BIVIR EN MUESTRAS TIERRAS !!!! TORNAR A ANTES DE 1967 ? PERYO SU KAVESA OBAMA ? Ke disho este ? Ken se kreye ke es el, para desidir de una asemejante enormitad ? Ande esta la justisya de esto ? Mos attakaron de las kuatro partes para derrokarmos i aogarmos en la mar asigun sus biervos. Muestros mansevos dieron sus sangres… Eyos peryeron las batalyas. Los Estados Unidos no mos desharon eskapar este echo komo kale…. I….. Agora mos dizen de retirarmos a las frontieras de 1967 ? Kon ke derecho ?
No va ser a los ajenos de desidir lo ke tenemos de azer, kualo akseptar i kualo rechesar ! Israel es independiente i kedara libre i independiente AD HA NETSAH ! – Fina siempre !-
Un shaka de Natanyahu ke seya diziente le aviya eskrivido a Obama efendi kuando era Prezidente !
Senyor Prezidente Obama,
Vos esto eskrivyendo oy por una demanda a la kuala no sosh tan auzado ! Vos rogo por una vez de tornar a vuestras frontieras de Augusto 20, 1959 de manera ke HAWAII no seya mas uno de vuestros Estados i vozotros, dunke, no seyash mas un sivdadino Amerikano.
El Primer Ministro Benjamin Natanyahu
Lo ke me plazyo esto… Mizmo por shakas !
MUESTROS KERIDOS ENIMIGOS TIENEN DEMASYADO EUROS I no saven mas ke azer kon esto ! No son los Europeos ke dan ! Son los otros ke SAVEN gritar, egzijir, demandar kon lamentasyones i estruisyon de mundo ! Chapeau bas ! Lo mas de estos “donos” ke les azen a los “HAMSIS!” van a entrar en la aldikera de akeyos leaderes ke no son mas ke ladrones, assasinos, mintirozos i todo bueno ! Sus kuentos en las bankas Suissas, Fransezas, Inglezas i Alemanas vana pujar. En otras biervos, las paras van a kedar en la famiya, de unaaldikera a la otra !!!! Los ke dan, lo saven … I puedeser ke ya se metyeron de akordo tambien ! Van a azer, para amostrar, unas bavajadas i el resto… Ya lo savemos de Arafat i de su mujer ke bive komo una reyna en Paris ! De ande les vino ?
El mundo entero lo save ku kuaji TODO lo ke se dyo por ayudo a la Palestina no servyo ni a fraguar una eskola ! Arafat era uno de los mas grandes investisores en grandes markas Israelyanas la sola koza de bueno ke izo en su vida !
Son este tipo de personas muestros keridos enemigos ! El Di-o ke de meoyo al mundo !
KE PAZ ?
El mundo les da razon kuando dizen ke Palestina es suyos !!!! No tienen de menester ni de papel ni de kalsados ! Estos entienden la razon de la fuersa i nada mas.. Son kruales a si-mizmos ! No konosen otra lingua… Biven komo en la Edad Medya. Uzan lo moderno ma malavlan de los ke lo toparon… Aharvan sus mujeres, sus kreaturas, se aharvan i se matan entre eyos… Komo no kon sus vizinos ? La violensya es la prueva ke son hombres para eyos……Los Amerikanos i los Europeanos ni ke pueden entender esta mentalitad .. La muerte no los espanta… No yoran sus ijos ke mueren por la Palestina..
Es pormodo de esta mentalitad i el karakter espesyal de las personas de esta kategoriya ke no se esta puedyendo yegar a la Paz… Un orgulyo kuryozo ke no es orgulyo, una honor ke no es honor, una lojika ke no es lojika, una vayensya ko no es vayensya, una vedra ke es mintira, un selo ke no kave a dingun lugar i lo todo mesklado de una violensya i un odyo demezurado….
Kon ken estamos azyendo paz ? Ke paz ?
TROKAR TIERRAS KON LOS PALESTINOS seriya nada mas ke una utopia de pensar ke se puede lograr la paz kon un projekto asemejante… No ay paz kon el ke no kere paz. “MERKAR” paz es echar umos al ayre… Dezaparese de la mizma manera…
Unos lo vemos…. Mas ken ?
NUVLAS ENSIMA DE ISRAEL I NO MOS TRAYEN LUVYAS !
Mas i mas nuvlas pretas se estan arekojyendo sovre el sielo de Israel i desgrasyadamente no son nuvlas de luvya tan dezeadas en la kalor del enverano…Luvya para mis tierras ke se artan mizmo de gottizikas para produizir.. Porke ansina les ambezo el ingenio israeli…. Porke no tienen otro remedyo…
Rogaremos para ke todo salga por el bien i ke Di-o se apiyade de mozos… Ma mos espiertaremos de los suenyos dorados de dayinda tener kastilyos en Espanya…. Estos kastilyos son echos kon kartas o de arena ke lambe la mar…
Diyas de Paz de Salud i de Alegriya para todos
[email protected]
Artículos Relacionados: