Diario Judío México - Diario Judío
Keridos Amigos i mis Amigitas,

Komo afitan las kozas ! No se si es de riiyir o de yorar kon esto ke vos vo kontar ! A mi me vino komo una anegdota sin sal i pimyenta ma por seguro una koza ke no puede ser vedra i se puede kontar solo komo
un kuentiziko sin savor !

Ay un tiempo pasi una operasyon de katarakta en la “mijor” klinika kon uno de los “mijores profesor” de ojos ke izo no se kuantos miles de esta operasyon ke “es nada en muestro tiempo” i ke “ni se siente mizmo”…

Todos me dieron koraje i me fui a esta operasyon, solo “baylar” me
mankava ! Todo paso “el mijor del mundo” me disho el profesor por el kual mi vizinika se namoro ! Un poko otro i se le iva echar en los brasos ! Madre miya bendicha ! Des de ke no esta mas bevyendo se troko en un topiziko (ball- bala) de karinyo i de sentimientos ! Arrezvalandose de todas las partes … Tengo difikultades de la detener en su lugar ! Se izo “adoravle” eya entera, redondika komo mi i manko de un metro i medyo ! Koryendo detras de mi para “arekojerme” me dize ! Des de ke desidyo ke es EYA ke se va okupar de mi dieta, ya tomi 2 kilos mas ! Si le avlan dize ke la esto mirando komo gato aharvado ! Nooooooo ! Le parese ! Todo le parese !

Bueno…., kuando torni a kaza kon el ojo serrado por 24 horas teniya la sensasyon de tener arena en el ojo ! “De la operasyon !” me disheron “Ten pasensya !” OK…. Pasensya, kayadika… Pasensya Di-o miyo… El ojo me esta punchando ! No esto puedyendo bivir kon esto ! Aron, me kerido Aron de , doktor espesiyalisto de ojos, eskrivyendome “Vate al Dr, ke te mire, ke aga esto, akeyo, no le deshes la yaka ! (kolar)”

Me vo i su asistenta (El ermozo sinyor se fue para konferensa a las Amerikas) me dize ke ve un Herpes al interyor de mi parparo de ariva ! Me da gotas…..Me embiya a kaza.. VA PASAR…PASENSYA me digo, me dizen..

Mi ijo viene, vamos kon el al DR. Todo esta MARAVIYA ! ” Ves bueno, la operasyon paso sin dingun problem, yo no veyo kualsiker
komplikasyon en tu ojo !” me dize de muevo ! Mi ijo me dize “Mamita, esto repozado agora ! No tiyenes nada. Estas viendo mijor de antes ! El Dr. miro no ay dinguna razon para ke tengas dolor o punchada.. Nada ! “Si pashiko ! Esto muy buena ! No te merikiyes !”
i se torna a Londra … Lo pasimos komo un suenyo estos 3 diyas de rizas i de amor !

Mi ojiko aunflandose, charpeyandose i yo no puedyendo mas de dolor i de esta punchada ke me estava kitando loka me vo kon mi vizinika de noche a las “urgensyas” .
Un doktoriko asistente en el hospital de la universitad mos arresive… Le konto… Mira de todas las partes…Aze kozas ! No me endjida ! Me dize ke ya esta fiksado i ke TODO PASO ! Me iva ezmayar ! Despues
de kaji 2 mezes de tortura NO ESTAVA MAS PUNCHANDO ! Disho ke teniya apegado al parparo un chop ! Koza ke me entro en el ojo i ke me lo kito ! Ke teniya de meterme una semana gotas antibiyotikas ….. ESTO !

Me rayo el ojiko i endjida un poko ma AGORA se ke va pasar !

Me ambezi ke kuando es echo de doktores no kale fiyarse a la palavra de uno solo ! Ni dos ni tres si kale !!!!

Diyas de alegriya i de sanedad ke tengash… i presto a las “urgensyas” si una koza vos kita el repozo de bivir !

[email protected]

No hay comentarios

Leave a Reply

Artículo anterior¿Soy inseguro?
Artículo siguienteUna Paloma
SHAROPE BLANCO en ESTAMBUL (Turquia) Sharope Blanco, economista y profesora de lenguas, administradora y fundadora del Grupo SEFARADIMUESTRO en Yahoo, donde escribe sus poemas, artículos, recuerdos y su novela Almendra. Escritora y poeta de innumerables poemas y artículos en Inglés, en Francés, en Turco y en Judeo-Espanyol, pocos publicados hasta la fecha. Su obra será publicada post-mortem según su deseo, por su hijo Nebil F. Behar, medico residente en Inglaterra.