Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Komo a kada vez, vos akodro ke el proksimo atelye de konversasyon de la asosyasyon Vidas Largas se tendra el djueves 5 de mayo, de las dos a las kuatro i medya-sinko, en el Centre Communautaire, 119 rue Lafayette Paris (10°) métro Gare du Nord o Poissonnière. No se va tener atelyes en avril por modo de las vakansas i de las fyestas de Pesah.
Pensi para oy de avlarvos una vez mas de la okupasyon italyana en Fransya, afillu si ya ize una emisyon aki sovre esta istorya en 2007, i si eskrivi en mismo tyempo kuatro mesajes a Ladinokomunita, n° 22223, 31, 37 i 44, sovre esta misma istorya. I esto por dos razones: la primera, es ke, komo para mi emisyon de 2007 sovre Binyamin de Tudela, mi komputadera era rota, i pude solo eskrivir el teksto de mi emisyon kon pluma, i me parese bastante interesante para ser kopyada i metida sovre internet. La sigunda, es ke, una vez kopyada, me paresyo interesante tambyen de meldarvola otruna vez, porke esta istorya amostra komo pudyeron ser diferentes las politikas de la Almanya, de la Italya i de la Fransya kon los djudyos, i komo la Italya enemiga se amostro vente vezes mas amistoza kon los djudyos ke la Fransya ke eya los deviya defender, i ke no solo no los defendyo, ama al kontraryo izo todo para aharvarlos i darlos a los Almanes.
Vos avlaré dunke de un pedaso de istorya, el tyempo de la okupasyon italyana en Fransya, entre el 11 de novyembre 1942 i el 9 de septyembre 1943, i lo ke fue esta okupasyon de mueve mezes para los djudyos.
Kuando konti aki, ay unos kuantos anyos, la istorya de mi chikez del tyempo de la gerra, vos dishe ke estuve en Megève ke era okupada por los Italyanos, i ke aya era un lugar bendicho para los djudyos.
Oy kyero ir un poko mas adelantre i no avlar solo de mi esta vez, ama de la situasyon de todos los djudyos en esta parte sud-este de la Fransya i en estos tyempos, porke dainda ay djente ke topa achakes en favor del governo de Vichy, el kual era sözde ovligado por los almanes de azer las negriguras ke kometyo. La istorya de la okupasyon italyana trae la prova djusto del kontraryo. Las negriguras, Vichy las izo de si para si, i la verguensa es ke son los Italyanos, los enemigos, ke protejaron a los djudyos kontra la polisiya franseza.
La istorya de la zona sud-este, kijo dizir los departamentos de Savoie, Haute-Savoie, Ain, Hautes i Basses-Alpes, Isère, Alpes Maritimes, Var, Corsika, i una parte del Vaucluse i de la Drôme, se divide en tres partes: del armistisyo de junyo 1940 al 11 de novyembre 1942, ke va ser el tyempo de Vichy, del 11 de novyembre 1942 al 9 de septyembre 1943, ke va ser la okupasyon italyana, i, despues, la okupasyon almana del 9 de septyembre 1943 a la Liberasyon, en jeneral en agosto 1944, a la eksepsyon de la Corsika ke fue liberada un anyo antes, en 1943.
I – Del armistisyo de junyo 1940 al 11 de novyembre 1942, komo ya lo savesh, esta parte de la Fransya era, asigun los akodros de armistisyo, libera de toda okupasyon, ke sea italyana o almana.
En primero, esta zona se incho de djudyos fuyando las zonas okupadas por los Almanes: djudyos de Fransya okupada, ama tambyen de Beljika i de Holandya. Ya vos avli aki de esta chika Beljikana i de su ermaniko refujyados de Beljika, ke veniyan a komer kada djueves ande mozotros en Megève.
Esta zona se yamava la zona libera, lo ke para los djudyos kae muy ironiko, porke es un tyempo ande la polisiya franseza bushkava i afferrava sin piyadad a los djudyos para enserrarlos en kampos fransezes, i de aya embiyarlos a Drancy i a los Almanes, para eskapar finalmente en Auschwitz.
El 26 de agosto 1942, un poko mas de un mes despues de la negrigura del 16 de julyo en Paris (la rafle du Vel d’Hiv) la polisiya franseza aferro de si para si en Nice, Monaco i les Basses-Alpes, ande no aviya ni un alman, 560 djudyos, entre los kuales 279 mujeres i dodje kriaturas. Esto es una haliz verguensa, porke es una negrigura solo franseza. 5 diyas despues, el 1 de septyembre 1942, fueron embiyados a Drancy, i de aya a Auschwitz unos kuantos diyas despues.
II – El 11 de novyembre 1942, kon el debarkamento de los Amerikanos en Afrika del norte, se eskapa la zona libera. Los Almanes vyenen a okuparla, deshando a los Italyanos la zona sud-este ke vos dishe.
Es la Kuatrena Armada italyana ke okupa esta zona, i kyere amostrar ke no tyene de ovedeser ni a los almanes, ni mas poko a los fransezes.Alberto Callisse, Consul Jeneral italyano en Nice dize ke va protejar a los djudyos ajenos, i el Governo de Vichy responde ke esto depende de la Fransya. Los 6 i 20 desyembre 1942, Ribière, prefeto de las Alpes-Maritimes, antisemit muy fuerte, serka del Marechal Pétain, ordena ke los djudyos ajenos ke moran en su departamento desde el primo de janvier 1938 sean aferrados i embiyados en Ardèche, okupada por los Almanes, o en la parte de la Drôme okupada tambyen por los Almanes. Ribière ordena tambyen ke los djudyos de 18 a 55 anyos seran inkorporados en grupos de lavoradores ajenos i de eskrivir « JUIF » sovre las kartas de indentidad i de alimentasyon de los djudyos.
El Consul italyano Calisse se opone a esto todo, i obtyene el 29 de desyembre 1942 el ayudo del Ministeryo italyano de los echos ajenos, ke deklara ke los fransezes no tyenen dingun derecho de ovligar a los djudyos ajenos, inkluyendo los italyanos, a irse en lugares okupados por los Almanes, i ke la proteksyon de los djudyos ajenos i italyanos (el byervo « proteksyon » no es de mi ; es el byervo empleado por los italyanos mismos) depende solo de las otoridades italyanas.
De Gualtieri, ke reprezenta en Vichy el alto komendamyento italyano, deklara tambyen ke aferrar i enserrar a los djudyos es de la sola kompetensya de las otoridades militares italyanas.
Vyendo esto, el governo de Vichy demanda a los Almanes de empushar a los italyanos para ke se keden de protejar a los djudyos. Ke verguensa…
Joseph Antignac, del Commissariat Général aux Questions Juives, insista sovre el menester de una estracha kolaborasyon entre italyanos i almanes en la lucha kontra los djudyos. Von Ribbentrop, ministro alman de los echos ajenos, intervyene personalmente verso Mussolini para obtener su ayudo. El 17 de marso 1943, el embashador alman Mackensen demanda a Mussolini de dar todas las kompetensyas sovre los djudyos a la polisiya franseza o almana, o, a lo manko, a la polisiya italyana, i no a la armada italyana.
Mussolini ya esta pronto para achetar, kuando el mismo diya, su direktor de los echos ajenos, Luigi Vidau, ayudado por Giuseppe Bastianini, otro diplomato, un fasista konvensido, ama ke no kyere del todo a los almanes, demanda a Mussolini de trokar su desizyon. Vidau i Bastianini amostran a Mussolini un rapporto kontando las matansinas de los almanes en Polonya, i un raporto del embashador italyano en Berlin dizyendo ke munchos djudyos an sido asasinados por gas. A estos dokumentos, los dos diplomatos italyanos adjustan una nota dizyendo ke dingun pais, mismo la Almanya aliyada, podriya demandar a la Italya, kuna de la kristyanidad i del derecho, de ayudar a tal matansinas por las kualas el puevlo de Italya devriya dar kuento un diya.
El diya despues, 18 de marso 1943, Bastianini i Vittorio Ambrosio, kapo del Estado Major jeneral de las armadas italyanas, van a ver a Mussolini i obtyenen ke troke su desizyon. Ansina, afillu los esfuersos de los Almanes, i, ke verguensa, de los fransezes, los Italyanos mantyenen la proteksyon de los djudyos.
Sin ke los djudyos lo sepan, la vida de miles de eyos fue salvada en estos dos diyas de 17 i 18 de marso 1943 (solo por unos kuantos mezes, malorozamente, ama en estos tyempos, kada diya de vida era una viktorya). Fue salvada por tres ombres yamados Vidau, Bastianini i Ambrosio. Kyen se akodra oy de estos tres ombres ? Solo konosemos a tal djugador de futbol, ke supo byen djugar kon el balon, i mos olvidamos de ombres ke salvaron a miles de djudyos, i por tanto agora lo savemos.
Vos diré ke estos tres ombres sovrebivyeron a la gerra, ke Vidau kedo embashador de Italya despues de la gerra. Bastianini fue kondenado a muerte por los fasistas en 1944 por su aksyon kontra Mussolini en julyo 1943, ama pudo fuyirse. Oy, los tres son muertos de muerte natural.
Agora mos aboltaremos a muestra istorya, en marso 1943. El 22 marso, Kurt Lischka, uno de los kapos de la Gestapo en Paris, eskrive: « Kuando la pulisiya franseza a aferrado a 2.000 djudyos, a aferrado tambyen syertos djudyos en la zona de okupasyon italyana.Ama el prefeto Leguay dize ke los italyanos se opozaron a las arrestasyones. Por egzemplo la djendarmeriya de Annecy aferro a unos kuantos djudyos ajenos i los enserro en la djendarmeriya.Los militares italyanos an reklamado la liberasyon de estos djudyos, i komo los djandarmas fransezes no achetaron, la djandarmeriya fue atakada por la armada italyana.Leguay dize ke los italyanos azen difikultades por kada arestasyon, i, savyendolo, munchos djudyos se van a avrigar en la zona de okupasyon italyana » (fin de sitasyon de Lischka).
I es vedra ke durante todo el tyempo de la okupasyon italyana, famiyas djudiyas enteras ayegan en la zona, entre eyas mi padre, i despues mi madre i yo. Los italyanos dan permeso de morar a los djudyos i los yevan verso St-Martin Vesubie, Megève, Saint-Gervais, Vence, Barcelonnette, Combloux, en oteles i kazas rekizisyonadas por los italyanos.
Yo ya konti aki mis rekodros kuando estava en Megève en esta epoka, i komo mi madre lehliya me yevo un diya en un otel ande aviya teatro yidisch, una komediya muy alegre ke aziya reir toda la djente, ama sin mi ke no entendiya el yidisch.
Los djudyos ke moravan en estos oteles rekizisyonados por los Italyanos se aviyan organizado en kibutsim. Esto no me lo akodro, i de toda manera no saviya en este tyempo, yo ke era en mis sej anyos, lo ke era un kibuts. Es mi madre ke me lo konto munchos anyos despues.
En el mes de julyo, la situasyon troka en Italya. Ama veo ke ya vino el kavo de mi emisyon. Vos kontaré el kusur al djueves proksimo, si kyere el Dyo!
Artículos Relacionados: