Diario Judío México-
OMAR KHAYYAM
Meldi las famozas koplas de Omar Khayyam traduizidosn al Turko i no puide rezistir al plazer de traduizirlas al Espanyol Sefaradi tambien para kompartirlas kon vozotros. Son versos medyo djustos i medyo tugertos de este borrachon de grande persona, muy konosido por seguro, e studyado en las eskolas ets…
Omar Khayyam (1048-1131) nasyo en Nishapur- Iran. No se tiene dinguna informasyon sovre su manseves. De sus ovras, savemos unos kuantos detalyos sovre su vida i ke estudyo seryozamente la lojika, la filozofiya, las matematikas i la astronomia. En su tiempo era konosido ke en grande savyo i un grande poeto. Viajo muncho i konosyo grandes sivdades sentros del saverisyo komo Belh, Bukhara, Merv i Bagdad.
Fue amigo de grandes monarkos komo Melikshah, el Sultan de los Selchuk i del Shemsulmulk, el Sultan de Karakhan. Nizamulmulk i Hasan Sabbah eran sus amigos en la eskola. Izyeron estudyos i dialogos kon el grande Zemahsheri. Desho munchas ovras sovre la fizika, la metafizika, las matematikas i la astronomiya. Fue rekonosido komo uno de los mas grandes poetos del Oriente kon sus famozos kuatranos, los “RUBAI” s. (200 kuatranos).
Konta en estos su manera de ver el mundo i las realitades. No kreye a una egzistensya dospues de la muerte i avla lo mas de gozar en este mundo. Da importansa a la lojika ke para el es la unika verdad i dize ke solo kon la miente se puede yegar a todo.
En sus kuatranos avla del amor del vino, de gozar de este mundo, de la alegriya, de lafelisitad de bivir el diya mizmo. Fueron traduizidos a muy munchas linguas !
Dizes ke rios de vino vana koryer
El Ganeden seriya lugar de bever ?
Dizes dos huris para kada uno va aver
Ke es el Ganeden ? Kaza de entremeter ?
Di-o ke promete el vino para los muertos
Deke ke lo defenda kuando estamos bivos ?
Un arabo borracho mato el gameyo de Hamza
Es por esto ke disho ke esto mas no se beva !
Sos Tu ke me kriyates kon tanto amor
I de lo ke iva azer en vida sos el Eskritor
Dunke si peko es pormodo de ti ! Mas de ken ?
Ke es alora esto del Infierno i del Ganeden ?
Dime… Ken no trespizo Tus Leyes ?
Ke savor tiene la vida sin los errores ?
Si me pagas kon maldad mis maldade
Ke diferensya keda entre Ti i los hombres ?
Kuando Di-o mos kriyo de la balsa
Saviya kualo ivamos azer en la Tierra
Los pekados ke kometi son lo ke me enkomendyo.
Alora, porke me tiene ke kemar en el Infyerno ?
El inyorante es yenno de stupides
Si no avlo es de mi noblesa i de mi timides !
Puedo por seguro ar
responder a todo
Ma primero miro al biervo si es biervo
Dospues al hombre si es hombre i volorozo …
El mundo kedo entre las manos de los inyorantes
Pensan ke son eyos los ke saven todo de antes.
No te merikiyes… Al azno le plaze los aznos !
Es bueno si te miran komo si no fueras de eyos !
Tu no puedes saver ke es el sekreto del mundo
I no puedes entender de la lingua del profeto !
Beve alora, inche tu vino.. El Ganeden es en este mundo !
Ken save…Puedes entrar o no al Ganeden, en el otro …
Kuantos vinyeron i kualo no kijyeron ?
A la fin desharon el mundo i partyeron…
Tu te sientes komo si nunka partiras… Vedra ?
Eyos ke partyeron pensaron de la mizma manera..
Ke vale ke sos el Hombre de Ley ke todos pensan
Si no sos hombre derecho ke las personas aman ?
Viistidos, Livros santos, chapeyo i siempre la takya
Ma pensas ke kon estos objetos Di-o se enganya
Tu dizes ke sos kreyente i te vas asigun el Livro
Me dizes ke yo so un sin Ley i ke solo blasfemo
Yo so komo todos me ven, no me eskondo !
Ma tu ? Sos tu el ke todos ven ? El ke no mentyo ?
Tu, el ke se emburuja de preto ! Tu diya es noche !
No eches piedras al ke kere bivir i saver lo ke vale
Akeyos alavan Sus maraviyas, el Arte del Kreador
Kuando tu miente esta tormentada en kalor
Kon lo ke kale i no kale, lo negro i lo mijor..
Yo no deshare mas mi mano sin el vazo de vino !
No tokare tu Livro, tu rozario ni tu vistido santo
Tu sos un atrazado seko i yo el borracho mojado
Ken dizes se kemara mijor tu o yo en el Infierno ?
Tu, el atrazado de los atrazados
Tu ke mereses ser karvon en los Fondos !
Seras tu ke demandaras piadad por mi
Del Santo de los Santos ?
Ken sos tu para emmleskarte de Sus echos ?
Si saviyas los sekretos de la vida
Puediyas entender lo ke dospues seriya.
Oy tienes tu tino en su lugar.. No saves nada !
Amanyana sin tino mizmo, komo vas a saver ?
Siego !
Esta tierra, este sielo, estas estreyas no valen nada !
Desha todo, lo ke ves, lo ke tokas, pasa bueno tu vida !
En este mundo ande todo se derroka i se aze de muev
Tendras ke tomar un respiro i mizmo esto es vaziyo !
OMAR KHAYYAM
Traduizido por
[email protected]
Artículos Relacionados: