Diario Judío México -

Era un diplomato-poeto i politiko en Chile.  Pablo

Neruda era su sobrenombre porke admirava Jan

Neruda ke era un poeto Czecho .  En realitad se

yamava Ricardo Eliecer Neftali Reyes Basoalto.

Pablo Neruda gano el Premio Nobel de Literatura

en 1971.

 

Era el ijo de un empyegado lavorando por la

kompanyia de trenos.  Su madre era una

maestra de eskola.  Se muryo dos mezes dospues

ke dyo luz a su ijo…  Su padre se kazo de muevo

i Neruda se engrandesyo kon un ermano i una

ermana de este kazamiento.

 

De muy chiko eskriviya poemas.  Todo modo de

poemas i en stilos diferentes tambien.  Teniya

poeziyas surrealistas, epikas, manifestos politikos,

una otobiografiya en proza  i poemas de amores

apasyonados  “Vente Poeziyas de Amor i un Kanto

de Dezespero” en 1924.  El  “Crepusculario” fue

su primero livro de poemas.  Tuvo muncha fama

ma era povre en su manseves.

 

Eskrivyo munchas ovras i fue nominado a ser

el konsul honorario en la India Britanika i en

Rangoon en Burma.  Lavoro en  Colombo Ceylon

i el anyo siguiente en Java ande enkontro su mujer

ke lavorava en la Dutch Bank.

 

Torno a Chile i fue nominado a puestos diplomatikos

en Buenos Aires, en Barcelona i se izo konsul en

Madrid.  Tuvo munchos amigos eskrivanos i le

nasyo una ija Malva Marina en 1934.  La chika

estava hazina i sufrio de  hydrocephalus durante

su kurta vida.  Neruda no keriya mas bien a su mujer…

Konosyo a una mujer de la Argentina, Delia del Carril

ke era vente anyos mas aedada de el….Se enamoro.

 

En estos tiempos  Espanya estava eksperyensando

la dezgrasya de la guerra sivil.  Neruda se vido muy

intensamente enrolado en la politika.  Desho todos

sus okupasyones i se dyo a sus ovligasyones

kollektivas.  Lo vemos un komunisto ardyente por

el resto de su vida…. Delia i sus amigos eskrivanos

lo estavan influensando  mas i mas en su komunizmo.

Lo mas terrivle para el fue el kastigo de muerte para

Garcia Lorca por las fuersas real ke appoyavan el

diktator Franco…  Kon sus deklarasyones i sus

eskritos Neruda suporto la Republika Espanyola.

Publiko su livro “Espana  en el corazon”  en 1938.

Divorsyo en 1936 i su ex-mujer fue a bivir en

Monte Carlo i dospues a la Hollanda kon su

unika ijika.  Nunka mas los video…. Se fue a

bivir en Fransia kon Delia….

 

Ayudo los emigrantes a fuyir al Amerika del Sud.

Estos eran sus kompanyeros komunistos.  El

siguiente apuntamiento de Neruda fue de ser el

Konsul general en Mexico City  – (1940-43) i

es aya ke se kazo kon Delia. I es aya ke aprendyo

la muerte de su ija  a  los 8  anyos, en Hollanda

basho la okupasyon Nazi.  Entremientes ayudo

un artisto pintor Mexicano ke sospechavan ser

uno de los konspiratores por assasinar  Leon

Trotsky, prokurandole un viza Chileano.  Esto

le permetyo al pintor de fuyir a Chile i kedarse

dospues en la rezidensya privada de Neruda.

Siqueiros, el artisto, paso mas de un anyo a

pintar las paredes de una eskola.  Kijyeron

akuzar Neruda por ayudar a un assasino ma el

siempre supo komo rechesar esta kulpa.

 

Dospues de tornar a Chile Neruda vijito el Peru i

se fue a ver el famozo Machu Picchu.  Este

lugar lo inspiro para eskrivir su livro en versos

enteramente i en  12  partidas  “Alturas de

Macchu Picchu”  en 1945

 

El famozo novelisto Colombiano Gabriel Garcia

Marquez disho por Neruda ke era el mas grande

poeto del siglo 20  en kualkera lingua.  Harold

Bloom  eskrivyo en su livro “The Western Canon”

ke Neruda era el ventisejen author  prinsipal de la

tradisyon oksidentala…

 

En 1945 Neruda meldo en el Estadyum de Sao Polo

en Brazil i delantre de 100.000 personas dando

honores i alavando el leader komunisto Luis Carlos

Prestes.

 

Nerudo okupo munchos puestos diplomatikos i fue

tambien senator del partido komunisto de Chile.  Ma

kuando vino el Prezidente Gonzalez i defendyo el

Partido Komunisto de ser aktivo, sus amigos lo fuyeron

antes ke lo metan en prizyon  (1948)  i lo guadraron

en una kaza en el puerto de Valporizo.  Mas tadre

Neruda se fuyo i yego a Argentina, traversando un

passaje de montanya serka del lago Maihue.

 

Anyos despues Nerudo se izo el konsejero serkano

del Prezidente Sosyalisto Salvadord Allende.  Kuando

Neruda torno a Chile dospues de arresivir el Premio

Nobel, Allende lo invito a dar un diskorso en el

Stadyum Nasyonal, delantre de 70.000 personas.

Neruda fue hospitalizado pormodo de su kanser del

prostat kuando Augusto Pinochet  reusho en su  golpe

de Estado.  Torno a su kaza unos diyas dospues kuando

el mediko ke aviya resivido ordenes de Pinochet le izo

una injeksyon ke lo mato.   Neruda se muryo en su kaza

de la Isla Negra el 23 de Septembre 1973, unas kuantas

horas dospues de salir del hospital.   Se reporto ke muryo

de una kriza kardiaka fina ke en 2015 se deklaro por

el Ministro del Interior de Chile ke  “era probablamente

un assasinato”.   Pinochet, tenyendo a su espalda las

fuersas armadas, no aksepto funeralyos publikos para

Neruda, ma miles de Chileanos en dolyo incheron las

kayes akel diya….. Neruda era ateisto…..

 

Este eskrito es un chiko rezume de la vida de Pablo

Neruda.   Su ovra es immensa… Su komunizmo i

sus aventuras pueden inchir livros… Su vida politika

i todo lo ke izo tambien….  Munchos personajes

illustres traversaron su vida.  Se izyeron filmos

i dokumentaryos sovre el poeto.   I  por seguro todos

sus viajes, sus memoryas eskritas, su filozofiya ets….

 

Kon karinyo

Las opiniones expresadas aquí representan el punto de vista particular de nuestros periodistas, columnistas y colaboradores y/o agencias informativas y no representan en modo alguno la opinión de diariojudio.com y sus directivos. Si usted difiere con los conceptos vertidos por el autor, puede expresar su opinión enviando su comentario.

SIN COMENTARIOS

Deja tu Comentario

Artículo anteriorHow Iran and Her Proxies Use Western Resources to Promote Their Agenda
Artículo siguienteCon el tema de los refugiados africanos Netanyahu le quita otro poco de judaísmo a Israel
SHAROPE BLANCO en ESTAMBUL (Turquia) Sharope Blanco, economista y profesora de lenguas, administradora y fundadora del Grupo SEFARADIMUESTRO en Yahoo, donde escribe sus poemas, artículos, recuerdos y su novela Almendra. Escritora y poeta de innumerables poemas y artículos en Inglés, en Francés, en Turco y en Judeo-Espanyol, pocos publicados hasta la fecha. Su obra será publicada post-mortem según su deseo, por su hijo Nebil F. Behar, medico residente en Inglaterra.