Diario Judío México-
Buenos dias a todos !
Un maraviyozo diya empeso i yo esto estirandomeeeeeeeee en trantando d’avrir mis ojikos a la luz de la manyana 🙂 Ke ermozo sol i el balkoniko esta yenno de flores de todas las kolores !
Oy mi te/chay de yervas tiene savor de chokolate kon krema i pishkul! Porke ? Porke kero ansina ! No so bova de bever chay de yervas ! Me digo ke es chokolate kayinte i tiyene mas savor ! No se puede bivir sin imajinasyon del todo….EL mundo seriya muy grizo i enfasyozo!
Deke pensar ke esta Sharopika ya es aedada, asemeja a una burekita i no es mas sharonfonfon komo kuando era luzya ? No es mas atraktivo de pensar ke es…. hmmmmm komo la keriyash ver ? Ansina, komo yo era antes !
Ma es kuryozo.. Kuando me vo enfrente del espejo me plazgo ! Lollll Es ke yo me kero muncho bien parese !. Me embiyo un beziko, ago una karesa ensima de la kara, ansina, para sintirme amada i akompanyada i la soriza me viene pishinnn!
Prefero askrivirvos kuando tengo una bueno humor i no kara de abistru barminam leshoz! Traygo flores roz allado de esta ventanika, la noche asyendo kandelikas roz i vaporizo mi kantoniko kon los perfumes de artistas de sinema 🙂 para ke mis eskritikos salgan ermozos i golores de flores ! Para ke vos plazgan …. Pormodo del perfum i de las flores i de las kandelas aki !
No so kapache de eskrivir dos biervos si mis vestidos no me plazen, no me siento freska i bien mirada (ermoza !!!), dispuesta a riyir kon mis amigos i segura de no ser molestada por todo el tiempo ke me topo en vuestra kompanyia…. Kon todo esto i los gatikos a los lados, sus dulse mrrrrrrr, el plato de frutas i de dulsuryas en la meza, la luz kaynte de las kandelikas ke aklaran a mitad los kantones, la blandor de las peluches debasho de los pies deznudos todos pueden eskrivir poeziyas…. Ser poetos, autores, chefes de kuzina, vendedor de kalsados, fabrikantes de joyas, bankeros, artistos i injeniores !!! Todo depende de la voluntad de la persona, de sus gustos o de sus manko de gusto ! A kada koza los deredores ke konkordan… Un muzisyano no puede kompozar sus ovras en una fabrika de tekstiles….Ni en un laboratorio sientifiko…. No oyeriya en su alma las notas ke lo travan por la nariz !
Ke tengash un diya ermozo kon golores de rozas komo akeyas, las petalas de laskualas azemos dulse de roza !
[email protected]
Artículos Relacionados: