Albert Alcalay
(París, 1917 – Brookline, Boston, 2008)
De Vineyard Gazette, Harvard University Gazette i Slide Show Gallery
Albert Alcalay, pintor, akuarelista, skultor, maestro de arte i desén, nasió en París en el 1917, i en el 1920 su famiya se transferó a Belgrado, ande a la edá de 12 anyos él se izo aprendista del pintor Bora Baruh. En el 1929 entró a una eskola de pintura en Belgrado i se graduó en la Eskola Superior Evropea. En el 1937 entró en la Universidad de Belgrado, kon la entansión de azerse arshitekto. En el mizmo anyo se fue a París ande estudió impresionizmo, post-impresionizmo, fovizmo i kubizmo, i la enfluensa de estas korrientes artístikas lo enfluensó a lo largo de su karriera. Durante la Sigunda Gerra Mondial él fue aferrado por los Nazistas i metido en prezión en Vicenza (Italia).
En el 1942 reushó a fuyir i a alkansar a su famiya en el kampo de Ferramonti, ande enkontró al pintor almán ekspresionista Michael Fingesten, ke fue impresionado grandemente por su talento. Después de la liberasión por las trupas de los Aliados, él bivió en Pergola, una sivdadika medieval italiana, ande desinó i pintó paisajes de kampanya. Kuando fue liberada Roma, Alcalay se transferó a Roma kon su famiya i fue enkorajado por dos artistas ermanos, Mirko( ke fue después a Boston i se izo profesor en la Universidad de Harvard) i Afro. Alcalay fue resivido por la komunitá artístika de Roma, i le fue echa su primera eksposizión. En el 1950 él fue atirado por el ekspresionizmo abstrakto a kavza de su asosiasión kon Kandinsky, i pasó en su pintura del ekspresionizmo al abstraktizmo.
El arivó a los Estados Unidos komo refujiado, i se establesió en Boston, ande tuvo una exibisión en el Boston Museum School i empesó a lavorar onde el Potter Newton, kreando numerozas piesas de seramik. En los anyos `50 él se okupó de strukturas de asero i tuvo exibisiones i un katalog sovre sus ovras sovre este sujeto. En el 1956 fondó una eskola suya de pintura en Gloucester Ma. En el 1960 se adjuntó a la fakultad de desén vizual en la Universidad de Harvard. Del 1963 al 1982 ensenyó en el Carpenter Center for the Visual Art en la Universidad de Harvard. En el 1970 fue envitado komo profesor vijitante a la Eskola de Arshitektura de la Universidad de Maryland. El tuvo munchos elevos privados en el estudio de su kaza. En los anyos ke bivió en los Estados Unidos él tuvo munchas ekspozisiones no sólo en los mas grandes muzeos de los Estados Unidos, ma también de Italia, Austria, Canada i Sud Afrika. Sus ovras están en las mas emportantes koleksiones en los Estados Unidos i al estranjero. Albert Alcalay es konosido komo un artista ke supo ekspresar sus propias emosiones i tranzmeterlas en manera muy biva a sus spektadores. El bivió en Brookline i asta la edá de 86 ayos estuvo pintando i ensenyando. Tuvo de sesar a kavza de desturbos de la vista, i murió en Brookline en el 2008 a la edá de 92 anyos.
Artículos Relacionados: