Nahum Gutman
(Bessarabia, Russia 1898 – Tel-Aviv, 1980)
Nahum Gutman es un pintor israelí, nasido en Russia. Su padre era un eskritor i edukator djudió. En el 1903 su famiya se transferó a Odesa i después a Palestina. El kresió en Yafo, i despué? fue una de las primeras kriaturas ke moró en la mueva sivdad de Tel-Aviv. Durate la Primera Gerra Mondial él izo parte de la Lijión Djudía, i después se fue a Evropa a kontinuar su edukasión artístika. En el 1926 tornó a Erets Israel.
Influensado por Rousseau i Matisse, la pintura de Gutman ekspresa inosensia i nostaljía por los primeros días del Yishuv en Erets Israel.
El kooperó ansí a formar un estil israelí, saliéndose de la enfluensa de sus maestros evropeos. El lavoró en munchos djéneros diferentes: azeyte, akuarela, tinta i pintura. Sus eskulturas i su mozaikos de kolores se pueden ver en lugares públikos en Tel-Aviv. Pinturas murales kon la istoria de Tel-Aviv se pueden ver en la Torre Shalom i en el edifisio del Grand Rabinato. Una fontana en mozaiko kon shenas de la istoria djudía se topa en el kantón de la Kaye Bialik, enfrente al edifisio de la vieja munisipalidad de Tel-Aviv.
El estil artístiko de Gulman es ekléktiko, porké pasa del figurativo al abstrakto. El es muy konosido también komo eskritor i ilustrador de livros de kriaturas. En el 1978 Nahum Gutman resivió el Premio de Israel por su kontribusión a la literatura ebrea para kriaturas.
El Muzeo Nahum Gutman, ke ekspoza su lavoro artístiko, fue establesido en el kartié de Neve Tzedek en Tel-Aviv.
Artículos Relacionados: