Pishkado frito kon vinagre, prishil i limon y makaron reyenado kon karne

Dedikaremos muestra rubrika esta vez a unas kuantas rechetas ke tomimos del livro de gizado intitulado “Kon Grasia i kon Niur” ke fue publikado en memoria de la Sra. Ester Ventura, por su famiya.

Nasida en Turkia, eya fue una de las personas mas aktivas en el kampo del Ladino, i en desparte de ser una perfekta ama de kaza eya se distingio en el kampo del gizado sefaradi tambien.

***

PISHKADO FRITO KON VINAGRE

Materiales:

• 1 kg. de pishkado (kefal, lokus o otro)
• 2 guevos
• ½ vazo de arina
• azeyte para friyir

Para el kaldo de vinagre:

• 2 vazos de arina
• 1 vazo de agua
• 2-3 dientes de ajo pikado
• 1/3 de vazo de vinagre
• ½ kucharika de asukar
• 1 kucharika de sal

Preparasion:

1. Alimpiar i lavar bien el pishkado, kortarlo en puestas, meterlo en un tripito, echar por enriva sal i desharlo eskurrir una media ora.
2. En una sarten kaentar la azeyte, pasar las puestas de pishkado por la arina, untar en el guevo i friyir.
3. Aprontar el kaldo: Friyir los dientes de ajo en un poko de azeyte, adjustar el resto de los materiales todo en mesklandolos asta ke se obtiene un kaldo espeso.
4. Vaziar el kaldo sovre el pishkado frito i servir.

***

PRISHIL I LIMON
Komida de karne kon kaldo de prishil i limon

Materiales:

• 1 kg. de karne de pala
• 6-7 dientes de ajo machakados
• 1 masiko de prishil pikado
• 2-3 kucharas de arina
• sumo de un limon
• sal i pimienta

Preparasion:

1. En una kaldera sofriir la karne kortada en kubos en un poko de azeyte. Adjustar agua kaente, sal i pimienta a gusto i kozer la karne a fuego mediano asta ke se ablanda. Adjustar agua kaente segun el menester.
2. En una sarten friir los dientes de ajo, adjustar el prishil pikado i el sumo de limon i vaziar la meskla sovre la karne.
3. Kitar unas kuantas kucharas del kaldo de la karne a la sarten ande fueron fritos los ajos, adjustar la arina i mesklar asta ke se obtiene un kaldo espeso. Vaziar este kaldo sovre la karne, deshar kozer otros pokos minutos i abashar de la lumbre.

***

MAKARON REYENADO KON KARNE

Materiales:

• 1 paketo de makarones
• ½ kg. de karne mulida
• 1 sevoya pikada
• 5 guevos

Preparasion:

1. Eskaldar el makaron segun las instruksiones eskritas en el ambalaj.
2. En una sarten friir la sevoya pikada asta ke toma una kolor ruvya, adjustar la karne pikada i sofriirla todo en dezminuzandola kon un piron afin ke no keden bultikos.
3. Abashar de la lumbre, adjustar los guevos, pimienta preta molida freska i sal. Mesklar todo bien kon el makaron, vaziarlo a un pyrex i ornar en orno ke ya fue kaentado de antes a 180 C . El makaron esta pronto kuando toma una kolor rosha.