La gatika de mi `rmana
Preta es komo el karvón.
De ke vini esta semana
Eya bive en el balkón.
No diré k`esto l`agrada,
Ya lo sé ke no`s verdá.
La atira la pastrama
Ke le meten a mashkar.
No me golgas los vistidos,
Ke stan yenos de sudor.
Si de mí tú no t`aleshas,
Kedarás en tu prezión.
No me saltes en l`umbligo,
Tengo miedo yo de ti.
Entra ayá pishín, te digo!
No te eches tú kon mí.
Durmir kero en silensio,
Basta tú de mauyar!
Tópate un gato blanko
Ke te yeve a baylar.
Artículos Relacionados: