Diario Judío México - Si demandash a las personas ke koza es lo mas importante en la vida, aresivirash diferentes repuestas de kada uno i uno.  Savesh porke todos no vos diran ke es la libertad ?  Porke la libertad, komo la salud, komo la

manseves, komo el amor i la alegriya, mos viyene natural i normal  i kuando somos libres, nunka pensamos ke en el mundo, mismo en el siglo 21, ay munchos puevlos i personas ke no gozan de la libertad….

Tomamos la libertad komo el ayre ke respiramos… Esta i punto ! No puedomos bivir sin respirar ma nunka pensamos a esto !  Savemos ke respiraremos fina el momento ke dispareseremos para siempre.

Kuantas personas son alegres por ser saludozas i son rekonosidas por no estar hazinos ?  Kuantos dizemos “grasyas al Di-o” para pueder pensar, ver, kaminar, komer..  I kuantos i kuantos ay ke no lo pueden i kualo no dariyan para “kozas” ke mos vienen tan “normales”…..

Bivir…..Komo se kere, ande se kere, kon ken se kere, pueder dizir i gritar sus dezeos, sin el espento dezgrasyado ke mos pueden matar, meter en prizyon, vengarsen de muestros puerpos i almas pormodo de kreensyas

diferentes…  La relijyon, los aspiros politikos i sosyales por ser de kolor diferente o mismo de una otra kultura….  Bivir kon el espanto ke mos pueden aferrar ” meldando un livro defendido”  diskutyendo kon amigos la politika de tal o tala persona o mas “avrir” la kavesa i ke se veyga los kaveyos (ke verguensa !) meter un poko de sal demazyado en la komida

i ser aharvada de negra manera de la parte de un borrachon de marido o simplamente de una violensya sin kontrol…

La restriksyon de sentirse libre mismo kuando no estamos lavorando,

kuando estamos espandidos en muestros kantones !

Kada dia… miles i miles, milyones de djente sufren por no ser liberos !  Por ser esklavos de la fuersa ke oprima… Por ser ovligado de bivir leshos de sus payizes, de su puevlo de su kaza i de su famiya para fuyir de la muerte o de la prizyon o de las torturas fizikas i mentales.

La libertad…  Ke importante ! No se puede bivir sin eya ! Es el ayre, el pan i la salud de la persona !

Un penseryo i un abraso de solidaritad para los ke luchan por la libertad.

[email protected]@gmail.com

PS  :  Sharopiko dize ” A mi ke me sale !
si kero salir a la kaye salgo i punto !
Ayyyyy  !  Komo no ?  Egziste personas
ke no pueden ?   Si Sharopika… Ay!
Te akodras ke en akeya kaza de los aedados
los viejizikos no puediyan komer kuando
teniyan hambre, no puediyan ir a durmir
kuando teniyan esuenyo, los ovligavan de
lavarsen mizmo kuando se sintiyan hazinos….
Oyyyyyyy   Madre mia en Ganeden…
El Di-o ke no mos amostre esto….

Las opiniones expresadas aquí representan el punto de vista particular de nuestros periodistas, columnistas y colaboradores y/o agencias informativas y no representan en modo alguno la opinión de diariojudio.com y sus directivos. Si usted difiere con los conceptos vertidos por el autor, puede expresar su opinión enviando su comentario.

SIN COMENTARIOS

Deja tu Comentario

Artículo anteriorIran : Présentation des systèmes de défense antiaérienne, radars et missiles intercepteurs inclus
Artículo siguienteSharona, la israelí nacida en Teherán que “conecta” a iraníes con el estado judío
SHAROPE BLANCO en ESTAMBUL (Turquia) Sharope Blanco, economista y profesora de lenguas, administradora y fundadora del Grupo SEFARADIMUESTRO en Yahoo, donde escribe sus poemas, artículos, recuerdos y su novela Almendra. Escritora y poeta de innumerables poemas y artículos en Inglés, en Francés, en Turco y en Judeo-Espanyol, pocos publicados hasta la fecha. Su obra será publicada post-mortem según su deseo, por su hijo Nebil F. Behar, medico residente en Inglaterra.