En esta rubrika vos traemos esta vez rechetas ke tomimos del livro Gizar kon Gozo de Matilda Koen-Sarano, ke aparesio ultimamente. De este muy ermozo livro, rikamente ilustrado kon fotografias, i ke kontiene sienes de rechetas, deskojimos 4 platos ke reprezentan modos de gizado de kuatro diversas komunidades sefaradis. (Un ancho komentario sovre este livro toparesh en la rubrika “Livros”, paj. 64).
KODRERO KON LICHUGA I SEVOYA
(Recheta de la Sra. Malka Simha, Saloniko, Gresia)
Materiales:
1 palika de kodrero no godro
2 kucharas de azete
3-4 sevoyas
2-3 lichugas miradas por guzanos i lavadas
1 kucharika de asukar
2 kucharas de prishil pikado
sumo de un limon
sal a gusto
Preparasion:
Se lavan las lichugas i se deshan alientro de la agua kon poko de sal i 2 kucharas de vinagre. Se sufriyen las sevoyas en la azete, se adjusta el kodrero i se kontinua a friyir. Se adjusta agua i se mete a kozer a lumbre basha.
Kuando la karne ya esta media kocha, despues de kaji 2 oras, se adjusta la lichuga eskurrida i kortada, el sumo de limon, el prishil pikado, la asukar i la sal. Se desha apurar i se sierve kayente.
*Komites, no komites, en la meza estuvites
*Ni komo ajo, ni me fiede la boka
TRIGLIE ALLA MOSAICA
(Pishkado barbunya a la Moshe Rabenu)
(Recheta de la Sra. Paola Gabrielli, Livorno, Italia)
Materiales:
15 barbunyas chikas
2 dientes de ajo
1 tomates, sin kuero i mijos, molidos i pasados al tripito o 1/2 bokal de sumo de tomat
1 pedasiko de piminton kolorado pikante (a gusto)
1 masiko de prishil pikado
3 kucharas de azete
sal a gusto
un poko de agua (si ay menester)
Preparasion:
En una kaldera ancha i de bodres bashos, se mete el sumo de tomat, la sal, el ajo, el piminton pikante, la azete i la agua. Se aze buyir endjuntos asta ke la salsa se espesea. Se adjustan la barbunyas ke ya fueron alimpiadas i lavadas i se kozen por 10 minutos. Se kita la kaldera de la lumbre i se esparze enriva de las barbunyas el prishil pikado. Se sierve kaente.
La recheta ke vos traemos aki es tomada del livro: *
Comer con Isabel de Castilla” de Julio Valles Rojo
El teksto esta en castellano segun aparese en el livro.
SALSA PARA COCIDO Y ASADO (Manual de Mugeres)
Cortezas de pan de rey tostadas, almendras mondadas, pasas sacadas los granos, granadas agrias. Todo bien majado y desatado con una clara de huevo o caldo que no sea graso. Pasarlo por un cedazo y echarle canela, y jengibre y un poco de azucar. Y cocerla con poca lumbre lo que bastare.
*Mos gustaria saver si alguno o mas de entre muestros lektores provaran de aprontar esta salsa embiando los rezultados a la direksion de AY.
SALATA KAYENTE
(recheta de la Sra. Malka Koen Giat, Yerushalayim, Israel)
Materiales:
1 sevoya grande pikada
5 tomates grandes, sin kuero i mijos
5 dientes de ajo majado
1 kuchara grande de prishil pikado
1 kuchara grande de kulantro (kusbara en ebreo) pikado
1 kucharika de sal
1/4 de kucharika de asukar
azete para friyir
agua
Preparasion:
Se friye la sevoya en la azete, se adjusta el ajo i los tomates i se kontinua a friyir por unos kuantos minutos mas. Se adjusta un poko de agua i se koze la salata asta ke se embeve la agua. Se adjustan el prishil, el kulantro, la sal i la asukar. Se aze buyir por un minuto i se abasha de la lumbre.
Esta salata se sierve kayente.
BALBASHI
(Recheta de la Sra. Jenny Navon, Bucarest, Romania)
Materiales:
1/2 kilo de kalavasa dulse (balkaba)
1 vazo i medio de agua
300 gramos de asukar
1 vaziko de miel
un poko de agua
Preparasion:
Se koze la kalavasa en la agua i se mete aparte. Se aze buyir la asukar kon la miel en un poko de agua, se adjusta la kalavasa i se kontinua a kozer asta ke se espesea. Se mete en bocha i se konserva en el frijider.
Artículos Relacionados: