Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Por empesar, vos akodro ke el proksimo atelye de konversasyon de Vidas Largas se tendra el martes 3 de janvier del anyo ke vyene, a las dos i medya, en el Centre Communautaire.
Vos akodro tambyen ke agora las emisyones de Radio J se pueden oir por internet sovre el sityo de Radio J, de toda manera en direkto, i en vezes despues…depende del tekniko. http://www.radioj.fr
Afillu si no kyero ke kada emisyon ke ago sea nekrolojika, no puedo kedarme oy sin avlarvos de una mujer de 96 anyos, Régine Skorka-Jacubert, ke mos desho la vida el primo de este mez de desyembre.
Deke avlarvos de eya? Porke la istorya de esta mujer rezistante i deportada merese de ser kontada. La ministra de la Edukasyon nasyonala rendyo pishin un omenaje a esta mujer “eksepsyonale”, asigun la ministra mizma.
Kuando nase en janvier 1920, en Polonya, en la sivdadika de Zagorow, no se yama Régine, se yama Rivka, Rivka Skorka. Su padre, Jacob Skorka, es profesor de ebreo. Su madre, eya, aze i vende chapeos.
Para los ke kyeren mas detalyos sovre la vida de esta Regine, les diré ke la konto en un livro ke no meldi, ke se yama “Fringale de vie contre usine à mort” (ambre de vida kontra fabrika de muerte) i en una entrevista de mas de tres oras, serka de kuatro, ke se puede topar sovre internet, abasta ir sovre Google i bushkar INA grands entretiens shoah Jacubert.
http://grands-entretiens.ina.fr/consulter/Shoah/Jacubert/
Kuando nase en janvier 1920, en Polonya, en la sivdadika de Zagorow, no se yama Régine, se yama Rivka, Rivka Skorka. Su padre, Jacob Skorka, es profesor de ebreo. Su madre, eya, aze i vende chapeos.
Por siguro, no es mi entisyon de kontarvos en mis vente minutos, lo ke eya mos konta en kuatro oras. Yene es interesante ke sepash ke su padre pudo fuir la Polonya antisemit ande no puediya ganar su vida i venir en Fransya, en Nancy, en 1929, lo ke permityo al kusur de la famiya de venir eyos tambyen en 1930, kijo dizir ke la chika Rivka teniya 10 anyos.
Save avlar polones, yidisch i alman, ama no konose ni un byervo de franses. Kuando va a la eskola, vyendo ke no entyende lo ke se dize, la meten en la maternal, la klasa de las kriaturikas. Ama la maestra se apersive ke la chika, a 10 anyos, ya konose el aljebre, i ke su sityo no es en maternal; la embiya a su kolega de la klasa de 10 anyos, ke eya save avlar el alman i ansina le va ambezar el franses. Ashkulsun maestra, ashkulsun eleva.
Kuando vyenen los Almanes en Fransya, ya tyene eya 20 anyos. La famiya se fuye de Nancy asta Bordeaux. Aya eya lavora sovre los merkados, i despues, syendo ke los almanes estan tambyen en Bordeaux, Regine (no se aze mas yamar Rivka, Regine sona mas franses) abolta en Nancy myentres ke su famiya se keda en Bordeaux, ande todos son aferrados komo djudyos ajenos por la polisiya franseza el primo de desyembre 1940 i embiyados en el kampo de La Lande, en la sivdad de Monts. En un kampo avyerto.
Ambezandose el aferramyento de su famiya, Regine se va ver al kapo del buro de los ajenos en Nancy, i este ombre, ke no entyende deke una famiya onesta i lavoradora es tratada komo kriminala, da a Regine un falso papel al nombre de Hiebel, sozde nasida en Metz. I kon este falso papel, Regine se va kada tres semanas a ver a su famiya en el kampo.
Ama en 1941, los ombres entre 16 i 40 anyos deven ser embiyados al kampo de Pithiviers. El padre i un ermano de Regine, Jerome, son en esta kategoriya. Jerome dechida de fuir myentres es posivle, el kampo de La Lande syendo avyerto.
Jerome reushe a ir asta Dijon ande Regine lo akoje i los dos se van a Nancy, Jerome eskondido i Regine no. Kuando vyene la ley sovre la estreya amariya, Regine, konosida de todos komo djudiya, yeva la estreya malgrado sus papeles de aryana, ke pueden solo servir para lugares ande no es konosida.
Kuando Regine se ambeza el aferramyento de masa del Vel d’Hiv, los 7 fonksyonaryos del buro de los ajenos en Nancyakavidan a los djudyos ajenos de la sivdad ke van a ser aferrados en la noche i ke se tyenen de no toparse en kaza kuando vendra la polisiya. Lo ke munchos azen, por siguro, ama no todos ke no kreen ke ayka sekana. Yene ansina estos fonksyonaryos van a salvar unos 300 famiyas de djudyos. La mayoriya se va eskonder ande famiyas kristyanas. El diya de despues los fonksyonaryos les dan a todos falsos papeles, ke paresen halizes, syendo ke son echos por la administrasyon franseza.
Regine, i primos de su famiya, reushen de fuir de Nancy asta Lyon kon un pasador ke los enganya i les toma todas sus paras. Su ermano ya esta en Lyon.
Aya resive una letra de sus padre i madre ambezandole ke su ermaniko de 15 anyos a sido embiyado en Angers, ke eyos estan agora serrados kon barbelados, i en la sigunda letra , en septyembre 1942, ke son embiyados verso una destinasyon deskonosida.
Regine entra poko tyempo en la Armada Sekreta, ama no le konvyene porke no se interesan muncho a los djudyos, i bastante presto, topa a un amigo djudyo ke konosiya de Nancy, ke la aze entrar en un grupo de rezistansya de mansevos djudyos, ke se yamara la UJRE (Unyon de los Djudyos para la resistansya i el ayudo mutual). Eran djudyos komunistos. Afillu si no avla politika en su testimonyo, me parese ke Regine se kedo vida entera sino komunista, a lo manko muy de syedra.
Al empesijo, apegan avizos sovre las paredes, echan traktos en las kashas postales, yamando a la rezistansya. Despues alkila un apartamento para eskonder armas (arrovadas por otros a los almanes), para enderecharlas, alimpyarlas, i azer todo lo ke se kyere para ke sean prontas para servir. Eya misma no aze aksyones armadas. Ayuda solo.
Lavora komo vendedora en una botika de kalsados. La patrona ya entendyo ke eya es djudiya i ke aze kozas a eskondidas, mismo se va tres semanas para tomar i salvar tres kriaturas, i kuando abolta la patrona aze komo si aviya sido hazina.
Esto tura astal desbarkamyento el 6 de junyo 1944. De este diya se keda de lavorar. Entra en el buro politiko de sus kompanyeros de la Rezistansya.
Es denunsyada komo rezistante, i aferrada el diya ande deve traer armas en Villeurbanne, kuando abolta en kaza; Es asperada por la gestapo. I kuando vyene su ermano, es aferrado el tambyen. Los almanes entyenden ke son djudyos, porke azen bashar el pantalon de su ermano.
Son yevados delantre Klaus Barbie, kapo de la gestapo de Lyon. Son peshkuzados. Torturados? Si i no, dize Regine. Ni el banyo, ni la elektrisita. Es separada de su ermano.
I ansina es ke van a ser, syendo djudyos, embiyados a Drancy por un treno de viyajadores. Antes ke el treno se vaya, estamos al fin de djulyo, una kalor de atabafar, vyenen de la Kruz Kolorada kon agua para dar a bever a los deportados. Los almanes no son en el treno ama afuera i dizen a los de la Kruz kolorada: “No agua para los djudyos”. Los de la Kruz kolorada entran en el treno vaziyo de askeres almanes, ama pasan delantre de los djudyos sin darles de bever. Es solo para los otros. Ama papazim ke se topavan en el treno komparten kon los djudyos la agua de la Kruz kolorada.
Una vez en Drancy, eya i su ermano son siguros ke van a pueder eskabuirse; de toda manera, estamos al kavo de juillet 1944, los Amerikanos no son leshos (i es vedra ke Paris va ser liberado en manko de un mes). I de toda manera, los trenos yevan a lo manko 1.000 djudyos, i eyos son solo 900. Ama una noche, Alois Brunner vyene en Drancy kon 300 kriaturas djudiyas aferradas en las kazas para uerfanos. El treno agora puede irse.
I se van el 31 de djulyo por el treno 77. I eya i su ermano son siguros ke van a pueder fuirsen. Ama los otros tyenen espanto de ser fuziyados si algunos se fuyen. El viyaje tura astal 3 de agosto.
A la yegada en Auschwitz, entra en el vagon un deportado ke eya konose, fue deportado en mismo tyempo ke el padre i madre de Regine. El le dize kon boz basha: “aleshate de los vyejos i de las kriaturas”. Eya toma su amiga ke estava kon su madre i su vava, i la kita de eyas malgrado sus gritos, i la yeva kon eya para salir del vagon.
Pishin pasan a la seleksyon. Solo kedan ombres i mujeres entre 16 i 40 anyos. Eya demanda al deportado: “ande estan mis padre i madre? ” El le amostra la chimenea del orno krematoryo i le responde: “Se an ido por aya. Tambyen mi mujer i mis tres kriaturas.”
Despues mos konta komo eran ovligadas de tashirear una godra pyedra pezgada de aki asta leshos; i una vez ayegadas, kaliya tomar la pyedra para aboltar kon la misma pyedra al lugar ande estava al empesijo.
Konta el espanto syempre de una seleksyon. De vez en kuando un chuflete i entrava el seleksyonador. I, dize Regine, la ke estava eskojida para la kamara de gaz, deke eya? No aviya dinguna razon.
El lugar del kampo ande se topava se yamava el zigoynelager, el kampo de los chinganes, porke antes ke vengan aya se topavan los desmazalados chinganes. Era sovre el kamino para la kamara de gaz. Vido ansina pasar los ke teniyan de ser gazados: empeso por ver ayegar los Rodeslis, muertos de sed despues de tres semanas de viyaje. Regine mos avla de la ermozura de las mansevas rodesliyas, kon kaveyos ke bashavan astal bel.
Vido tambyen los Ungarezos i los del ghetto de Lodz pasar delantre eya para ir a la kamara de gaz.
Eya se iva a eskondidas a la kozina para arrovar komida. Aya topa una amiga de Nancy ke le da de vez en kuando una sopa.
Regine mos ambeza la kondisyon, asigun eya, para sovrebivir: kale ser dos, un fuerte i un flako. Kada uno tyene menester del otro. El flako, por siguro, tyene menester del fuerte ke lo ayuda, ama tambyen, asigun eya, ke sosteniya su amiga Ida, el fuerte tyene menester de un flako para protejarlo.
A propozito de Birkenau, mos konta komo, en oktovre 1944, el sonderkomando destruyo el orno 5, i komo los dos ombres fueron enforkados i yevados enforkados en un avyon en sima del kampo. Lo keeya no supo, ama yo lo sé por mi amigo Leon Lewkowicz, es ke esta aksyon a el le salvo la vida, syendo ke ya se topava en la kamara de gaz para ser gazada despues de una negra seleksyon, i al ultimo momento fue salido de aya kuando uvo el patirdi de la eksplozyon.
En este mismo mez de oktovre 1944, Regine pasa una seleksyon, i es eskojida para ir en el kampo de Kratzau, en lo ke es agora la republika cheka.
Kada diya kaliya kaminar 4 kilometros i medyo para ir del kampo a una fabrika de armas. Eya, kalva, la pyel amariya de lo ke aviya lavorado, vestida arriva de un sako i a basho de un kalson, paresiya a Charlot, asigun su amiga Ida ke diziya: “ke pekado ke no puedo fotografyarte…”
Un diya en la fabrika, ve un ombre ke lavora, ama no kon los deportados. Lo rekonose, es un franses ke era amo de un otel ande fue durmir kuando lavorava. Reushe a avlarle, lo ke era muy sekanozo porke proibido, i este ombre despues va aprovar de ayudarla.
En la fabrika, ay djente ke no son deportados, ama ke son prezoneros ovligados de lavorar: yugoslavos, italyanos, chekos. Regine se akodra ke los Italyanos i la chekas tambyen aprovavan de ayudar a los djudyos (un pan, una mansana, dada a eskondidas)
Regine no tuvo de azer la marcha de la muerte, syendo ke no era mas en Auschwitz kuando vinyeron los Rusos. Ama, koza kurioza, es solo el 9 de mayo 1945, dunke un diya despues del armistisyo, ke fue liberada por los partezanos Chekos.
Ama dinguno se okupo de eya i de sus kompanyeras. Izyeron a pye los 5 kilometros ke las separavan de la sivdad de Kratzau. Aya topan prezoneros de gerra fransezes ke se okupan de eyas. A parte eyos, ni Kruz kolorada, ni dingunos para darles de komer.
Se ambezan ke, para topar un treno para Nancy, kale ir a Prague, ke se topa a unos syen kilometros. Van a topar una karyola, i ansina eya pudo ir a Prague en la karyola.
Aboltada en Fransya, pesga 29 kilos. Se ambeza ke a pedrido 21 personas de su famiya serkana (su padre i su madre, ya lo saviya desdel kampo). Le keda unos kuantos primos i una tiya. Se va a verlos. Les demanda si tyenen haberes de su ermano Jerome. Se meten a yorar. Eya pensa ke es porke se muryo. No. Lo aviya bezado kon los otros sin rekonoserlo, en manko de un anyo.
Kale ganar su vida. Kyere lavorar sovre los merkados. Ama se ve responder ke no syendo franseza no tyene derecho de lavorar. Kon la birra, responde al mayor: “yo no so franseza, ama sé lo ke ize para mereser de serlo. Tu lo ke izites no sé.” I le amostra su karta de rezistante. Ansina obtuvo el derecho de lavorar.
Ama en un kafé, oye la djente kesharse ke vinyeron atras los Polakos. De muevo le toma la birra. Suve sovre una meza, toma una siya i dize ke el primero ke avla dainda de Polakos va resivir la siya a traves de su mutra. I no oyo mas de Polakos.
Ya entenditesh ke esta Regine era una mujer kon un fuerte karakter. Me parese ke, a parte ke kaliya tener mazal i fuersa fizika para sovrebivir, no abastava: kaliya ensima tener fuersa de karakter i veluntad de sovrebivir. Sin saverlo, mos konta ke izo la misma koza ke Haim Vidal Sephiha: dar un shamar fuerte, eya a una kompanyera, el a un kompanyero, ke aviyan pedrido la gana de luchar, para espertarlos.
Kuando uvo el djuzgamyento de Klaus Barbie, eya fue al Tribunal para dar su testimonyo, i syempre se fue en los kolejyos kon el mismo eskopo: ke la mansevez sepa lo ke fue el rasismo i la deportasyon.
Astal djueves ke vyene, si kyere el Dyo!
Edmond Cohen
Paris Fransya
Artículos Relacionados: