En mi chikez en Izmir, Turkiya, las preparasyones para Los Muadim (Roshana i Kipur) empesavan a lo menos de un mez de antes, trayendo un ayre de guezmos limpyos a la kaza, i un sentimyento i entuziasmoespesyal a la famiya, sovre todo a las kriyaturas.
El manseviko vizino de al lado, David Israel (agora es hazan en la keila Bet Israel de Izmir), empesava apratikar tanyer el shofar en el terrado de su kaza. Kuando lo sintiya yo, me se tomava el reflo, esperando a ver si su reflo le iva abastar a kitar todas las notas a sigún se deve.
En la kaza se goliya los guezmos de shavon, amonyak i vinagre de las limpyezas ke se aziya, i guezmode naftalin tanbién, de los tapetes ke se estiravan en basho después de estar guadrados el enverano entero konmilizina kontra las puliyas.
Los grandes de kaza se empesavan a levantar a medya noche para irsen a los silihot, las orasyonestradisyonal para demandar pardon del Dió. Para las kriyaturas se aziya vistimyentas muevas. La shastra veniyaa kaza un diya, i kitava de metros de ropa, fostanes i vistidos ermozos. En kortando la ropa, se diziya “konsalu(d)”, para dezear ke el se lo va
vistir se lo vista kon salud buena. Si komo mi aniversaryo es tres diyas antes de roshashana, a mi se dezeava”munchos anyos i buenos” i “novya ke te veygamos.” El vistido de mi ermano se dava a kuzir al shastre en labutika de ropas de mi papú, ke era en el charshi.
Las mujeres aziyan los dulses, komo sharope i dulse de bimbriyo, para adulsar a la djente ke ivan a vinira vijitar. Todos los dulses de Roshashana devian de ser blankos o de kolores klaras, simbolizando alegría para el anyo vinidero. Mi mamá era mestra (experta) de azer mogados de almentra (ke otros lo yaman masapán.)Mezmo la baklavá echa para esta
fiesta se aziya de almedra blankeyada, porke era más klara de muez ke se uzava en el resto del anyo.
La kumida de erev rosh ashana (noche de mued) era muy alegre, kon munchos de la famiya: tíos, tías, i subirnos, ke viniyan a fiestar kon mozotros. En la meza kuvrida de bogo blanko de lino brodado, se metiyaasúkar a lugar de sal, i dulse de mansana, para ke el anyo muevo seya dulse. La kumida empesava kon losyehiratsones, las bendisyones kon sus simboles en las diversas fritadas, komo de prasa, kalavasa i espinaka. I siempre aviya pishkado kon la kavesa, para ke seygamos “siempre de la kavesera i nunka de la kola” (siempreke mos vaygamos para adelantre i nunka para atrás).
El día de Roshashana, la demaniana kuando saliyan los ombres del kal, aviya un dezayuno grande, konboyos, burekas, guevos haminados, fritadas, frutas. Después empesavan las vijitas rituales a toda la paryentés,itodos los amigos i konosidos.
Los ombres se ivan kon los chikos, i las mujeres kedavan en kaza para resivir a los vijitadores. Setokavan manos de parte a parte, en dezeyandos en “Tizku Leshanim Rabot”
(Hebreo) , o “bon fète” (Fransez), o anyada buena”. Al musafir en primero se sirviya sharope (dulse blanko parake syga todo klaro i alegre en el anyo muevo) ke se trayiya en la tavlá de plata ke contenía tanbién lakucharera, i vazos de agua. Después de unos kuantos minutos, se adulsava mogados o marunchinos. (Me parase ke marunchinos es una spesialita de Izmir
sólo. Es lo ke se yama “almond macaroons” en Inglez.) Siguro ke antes de tomar dingún dulse, el musafir diziyasus dezeos de “Anyada buena i dulse” i otras dichas para ke se aga todo bueno en la anyada mueva. Kadavijita turava menos de medya ora. I después se iva a otra kaza para azerles la vijita.
Lo más de los Djudíos moravan en la parte de la sivdá ande morábamos mozotros, ke es por Karatash,serka de la keilá grande Bet Israel, i por esto todos se ivan a pied de un lugar al otro. Siguro ke era verguensarefuzar de tomar dulse kuando se ofricyiya en las vijitas, ma no era posible komer tanto dulse en un diya. Por esto, los ombres tomavan los mogados i maronchinos i se los metiyan en una riza blanka i limpya espesyal para esto, i se los metiyan en la aldikera. Después de tres-kuatro vijitas era menester de aboltar a kaza, no sólo pararepozar un poko, ma tanbién para vazyar las aldukeras antes de continuar las vijitas i inchirlas de muevo.
Todos estavan alegres. Las kriyaturas resiviyan bastante abrasos i bezos de los keridos, vizinos ikonosidos. El sol ke briyava en el syelo paresiya komo ke estava alegre i kontente komo mozotros. Ma más de todo me akodro ke Rosh-ashanah en Turkiya mos adjuntava a todos kon un sentimyento de ermandad, dekeremos bien de uno a otro, i de orgulyo i alegriya en muestro Djudaismo.
Rachel Amado Bortnick
Dallas, Texas
Ladinokomunita
Fuente: ORIZONTES – Una Revista de Kreasion Manseva en Djudeo-espanyol – No.2, Anyo 1, Invierno 2013
Artículos Relacionados: