Jorge Abulafia nasió el 6 de Enero de 1921, en la sivdad de Zárate, a 95 kilóme-tros de Buenos Aires. Sus parientes, Sara Benchuya i Alberto Abulafia, nasieron en lzmir, Turkía. Su avuela maternal, Mazaltov Chikuriel, i la paternal, Paulina Levy, nasieron en lzmir. Jorge tuvo tres ermanos: el mayor ke no konosió, porke murió chikitiko. David era kontable. 0y, su fijo Alberto lavora en su estudio. Fue el primer profesional de la famiya, i ministro de ekonomía de la provinsia de Catamarca, Argentina, en los anyos 2001. Viktortenía pokos anyos de diferensia kon Jorge, era komersiante de telas i muy amigos. Por esto, merkaron kazas en las afueras de la sivdad, mientres ke engrandesían los ijos, para partajar los fin de semanada, para despúes kontinuar en Punta del Este, Uruguay. Selma, kazada kon Levi, ke por desizión de sus fijas, en la piedra túmbala está eskrito Selma Abulafia, era más grande ke Jorge, ama murió después de el. Jorge, lavoró djunto al padre en el magazen de la kaleja Moreno. A los 16 anyos eskapó (terminó) los estudios en una eskola nokturna, momentos en ke su penserio estava metido en estudiar medisina o enjenyería. Para estudiar, entró a lavorar komo sereno en el Hospital Ramos Mejía, en las ofisinas, más tadre komo ayudante en el Servisio de Patolojía, sitio i ainda elevo (estudiante) ande se le despena la voka-sión por la dermatolojía. Terminó los estudios de medisina en el anyo 1948, kon la firme desizión de ser patólogo i desvelopar la patolojía ainda no eksplotada. En la Munisipalidad tuvo un sitio komo mediko, ama tuvo problemas por butos estudiantiles. Su grande maestro en la klinika dermatolóji-ka fue el profesor Luis Pierini, en el Ospital Raw-son, ande Abulafia estudiava en su katedra. Aki konose al Dr. lsmael Pomposielo, en el labora-torio de istopatolojía, indemás al Dr. Guillermo Basombrio, ke le ofrese una beka para estudiar la hazinura de la lepra, en Rio de Janeiro.
Kuando torna a Buenos Aires, abolta a la katedra del Dr. Pierini, ande toma el kargo komo shefe del Servisio de Istopatolojía. Sin duda, el Ospital Rawson fue su grande eskola. Abulafia mirava al hazino, le tomava las mostras del kuero i de este modo, azer la rela-sión kliniko-patolójika. En este sitio, konosió a los profesores Julio M. Borda i David A. Crisnspan, grandes ami-gos ke djuntos fraguaron lavoros sientífikos, ke desharon grandes i anchos kaminos en la der-matolojía i dermatopatolojía.
Por su tesis doktoral, fue premiado kon el tema: La “Histopatología e Histogénesis de los Blastomas y Pseudoblastomas Cutáneos” Desvelopó muncha aktividad en los ospita-les, mismo en el Instituto Pasteur de la Fun-dación de Investigaciones Histológicas Roux, ande konosió al Dr Moisés Polak i se a mbezó las teknikas de impregnasión argéntika, ke kon-tinuó kon Don Pío del Río Hortega, en los tiempos ke este moró en Buenos Aires. Fue patólogo de los Ospitales: Roffo, Fiori-to, Ramos Mejía, Instituto Oncológico Ma-rie Curie, Ospital Privado de kuero. Mismo fue profesor titular interino de der-matolojía del Ospital de Clínicas, presidente de la Sociedad Argentina de Dermatología, i vise presidente de la misma, kolaborando kon la profesora Dra. Lidia Valle en mijorar la ins-titusión. Presidente del Colegio Ibero-Latinoameri-cano de Dermatología; Miembro Honorario de sociedades nacionales i extranjeras, fundador de la Sociedad Argentina de Dermatopatología. Aresivió munchos premios por sus lavoros sientífikos, Maestro de la Dermatolojía Argenti-na, Maestro de la Dermatopatolojía Argentina i Maestro de la Dermatolojía Ibero-Latinoameri-cana. Fue deklarado Visitante Distinguido de la Ciudad de Tegucigalpa (Honduras) i Doctor Ho-noris i Causa de la Facultad de Medicina de la República Oriental del Uruguay. Fue premio Marie Curie otorgado por la Repú-blica Franseza, por su aktividad komo Jefe de Patología en el Hospital Municipal de On-cología Marie Curie. La Liga Internacional de Sociedades Dermato-lógicas rekonosió sus méritos, otorgándole el Certificado de Apreciación por una vida de la-voro dedikada a la investigasión i a la ensenyan-sa en la dermatopatolojía latinoamericana. Intervino en la publikasión de 7 livros de dermatolojía, indemás de 166 lavoros en ar-gentina, i 50 lavoros en el estranjero. Diktó importantes i rekodradas konferensias en Argentina, en toda Latinoamérika i Sentroa-mérika. A lo largo i ancho de su karriera, metió la mirada en la relasión importante entre la klini-ka-patolójika, komo un instrumento importan-te, konvertyendo ansí a dermatólogos i der-matopatólogos en aliados inseparables, para el hazino (enfermo) de kuero. Izo lavoros sientífikos, briyantes, djunto a su grande amor de ser maestro, sin olvidar ke fue el kreador de la dermatopatolojía de aula ispana. Kon péndola (lápiz) i papel, kon tiza i piza-rrón (tablo i tebeshir), deshó una mueva i ade-lantada línya de penserios. En 1956 Jorge se kaza kon Paulina Guini (Pola), tia de David Guini i Rebeka Navarro, nasidos en la Turkía. Paulina i Jorge eran pri-mos segundos.
Tienen dos ijos, Alberto nasido el 23 de Avril de 1962, i David el 18 de Avril de 1966. Jorge i Pola partajavan desde chikitikos fiestas, bodas, nasimientos, afilú los midrash, seremonia ande se rekodra a los ke desharon este mundo, en epokas ke ainda se azían en las kazas. Su senyora Pola, fue munchos anyos su se-kretarya i asistente, por esto el dizía “Pola es i será siempre mi grande kompanyera”. Jorge tenía frazas en ladino ke siempre dizía. Si alguno se azía pezgado, pishín dizía: “No seas pezgado”, o ke era duro de entender: “Meshé”, mismo si alguno no estava presente: “De muerte ke no manke”. En las fiestas iva djunto a sus ijos, a la keilá de la kaleja Camargo, ande las dos primeras filas de asientos estavan rezervadas para los Abulafia i los Guini. El rabino Aron Angel los tenía presente, porke eran parte de la istoria de la komunidá sefaradi de Villa Crespo. Su senyora Pola era gostoza de gizar bueno i azer otras komidas, ama, en la kaza no manka-va los boyos, la alburniya, las bamyas, asas kon arroz turko, burrekitas de kezo i guevo, de handrajo, los travados, baklavá i kadayif, dulses de narandja i bimbriyo. En la aktualidad, su fijo Alberto es shefe de Shirurjía Plastika del Ospital Ramos Mejía. Su fijo David mora kon su famiya en Israel, ande tiene una empresa de software. Jorge viajava a Israel una o dos vezes al anyo, para partajar kon la famiya i ver kreser a sus inyetos. Kuando Jorge murió, tenía dos inyetos ke moran en Israel, Liel Abulafia nasida en 1994 i Omri nasido en 1997. Liel está por eskapar el estudio de medisina, karriera ke eskojó de chi-kitika, kuando su avuelo la asentó djunto a el, para echar un ojo por la lente del mikroskopio. Omri es estudiante de fizika en la Universidad de Jerusalem.
Jorge Abulafia, a los 85 anyos, se fue de este mundo el 7 de Mayo del 2006. Está sepultado en el Sementerio Sefaradi de Bancalari. La medisina argentina, tuvo la grande onor de kontar kon la importante personalidad de Jorge Abulafia, argentino i sefaradí. Ke su rekodro sea de bendicha memoria, amén.
Artículos Relacionados: