Repuestas al antisyonismo

Por:
- - Visto 511 veces

Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Vos akodro ke agora Radio J tyene un sityo en Internet. Agora mis emisyones se pueden oir en el mundo entero indose sovre Radio J kon internet sea en direkto, sea kuando se kyere: mis emisyones son enrejistradas a mi nombre.

La semana proksima va ser Rosh Ashana i por siguro no va aver emisyon el djueves a venir. Es dunke de agora ke empeso mi emisyon de oy dezeandovos una anyada buena i dulse, keridos oyentes, para vozotros i todos vuestros keridos. Uvyera sido byen ke aga oy una emisyon sovre Rosh Ashana, ama, povereto de mi, todo lo ke se de esta fyesta ya lo dishe aki kada anyo en varyas emisyones.


Por esto oy no vos avlaré del anyo muevo, vos avlaré de la propaganda ke los antisyonistos, no solo arabos o muzulmanos, ama tambyen oksidentales, aprovan de enkashar kontra el syonismo i el Estado de Israel, fruta del syonismo.

En Fransya, el mas konosido de los antisyonistos es un medyo preto ke empeso komo shakadji en djuntos kon un djudyo (Elie Semoun) i despues se aparto de el i se izo, se puede dizir, kapo de los antisyonistos. En vedra se izo muncho mas ke antisyonisto, se izo antisemit muy fuerte, enkorajando el negasyonismo i burlandose de la sözde shoa. Se fue en 2011 en Iran para sostener Ahmadinedjad, i a la televizyon iranyana deklaro ke no kaliya olvidar ke el syonismo aviya matado el kristo…Los ke son interesados de oir la lokura de Dieudonné pueden irse a oirlo sovre http://www.atlantico.fr/pepites/quand-dieudonne-jouait-avec-religions-television-iranienne-947105.ht

En Beljika, un gazetero yamado Michel Collon salyo en 2010 una video de 13 minutos ande avla sovre, asigun el, “las 10 grandes mediamintiras de Israel”.

Por dizir la vedra, yo no konosiya esta video asta ke mi prima, eskaldada entera, me diga ke un otro primo miyo se la aviya embiyado, dizyendole ke, de una syerta manera, le aziya ver las kozas de un otro ojo. Atyo santo! un primo miyo!

Si un primo miyo, un Cohen, eskucha este Collon i lo kree, me parese ke ay menester i adjile de kombatir las ideas, todas falsas, de este Collon.

Collon empesa por dizir ke la djente no save nada sovre Israel, es el ke save. I lo ke save va a la kontra de todo lo ke se konta.

Primera mintira ke justifika Israel, asigun Collon: no es vedra ke Israel nasyo en reaksyon kontra la Shoa. Israel, mos da Collon a entender, nasyo en 1897 del proyekto kolonyalisto de un movimyento nasyonalisto djudyo. Los djudyos keriyan kolonizar la Palestina. Deke? No lo dize, ama mos dize ke se fueron en primero a demandar al Imperyo osmanli, ke no era interesado. Despues a los Inglezes, interesados porke teniyan menester de uno ke tenga tino del Kanal de Suez, i despues a los Amerikanos, ke teniyan menester de un pulis de la benzina.

Kualo responder en primero a un tal alay de bovedades? Empesaremos por el empesijo. Dingun, i sovre todo nunka Israel, pretendyo ke nasyo en reaksyon kontra la Shoa. Malorozamente, es de muncho antes de la Shoa ke uvo matansinas de djudyos en la Evropa entera, del empesijo de la Edad Medya asta los pogromes de Rusiya en el siglo 19. Todos saven ke es a la vez en reaksyon kontra estas matansinas, ama tambyen por idealo relijyozo mesyaniko ke, munchos anyos antes de 1897, djudyos de Evropa del Este dechidaron de aboltar en el pais de los djudyos i de fraguar aya un ogar para los djudyos del mundo entero.

Yene ay una vedra en lo ke disho Collon: es vedra ke Herzl se fue a ver el Sultan Abdulhamid de Turkiya para azerle la propozisyon de pagar una grande parte de la devda del estado osmanli si permetiya la instalasyon de un ogar djudyo en Palestina. Por una razon ke no se, el Sultan era d’akodro para permeter esta instalasyon en Mesopotamia (el Irak de oy) ama no en Palestina. Ya saviyamos ke el Sultan no acheto la demanda de Herzl, lo saviyamos por Herzl el mismo ke lo konto, ama un istoryano turko, Vahdettin Engin, en un livro puvlikado en 2010 i intitolado Pazarlik, da mas detalyes sovre esta negosyasyon ke sureo syete anyos.

Esto dicho, lo ke pensavan los Turkos, los Inglezes o los Amerikanos de la kuestyon o del proyekto, no es a la orijen del proyekto. A la orijen del proyekto, fue lo ke pensavan Yeuda Alkalay, Leon Pinsker, Ber Borochov, Theodor Herzl i tantos otros djudyos ke pensavan ni al kanal de Suez ni a la benzina. I si este proyekto reusho, no es grasyas a los Turkos, los Inglezes o los Amerikanos, es grasyas a los djudyos eyos mismos ke lo fraguaron de sus manos i lo defendyeron solos.

Ama kale dizir ke es vedra tambyen ke sin la Shoa, no se save si la ONU uvyera achetado la kreasyon de un Estado djudyo en Palestina. Ama todos los puevlos del mundo se saviyan kulpavles de tener sea ayudado, sea deshado azer los Almanes en la matansina de los djudyos sin permeterles de topar azilyo en kualkyer pais. Asigun mi, la mijor justifikasyon del syonismo, kijo dizir el menester de un estado djudyo para los djudyos, es la manera komo los paizes del mundo desharon en djuntos matar al puevlo djudyo.

Ama esto todo no interesa a Collon. El uza el byervo majiko: kolonyalismo. Israel yeva el pekado ultimo, es un estado kolonyal. Kualo kyere dizir estado kolonyal? En jeneral un estado kolonyal es un estado ke tyene koloniyas. Si Israel es un estado kolonyal, ande estan las koloniyas? Si Israel es la koloniya, ande esta la metropolis?

Kale akodrarse ke los djudyos ke se ivan a fraguar Israel lo aziyan de si para si, sin el ayudo de ovreros arabos. Israel no tyene nada de ver kon, por egzemplo, la Aljeriya de 1930 o la Fransiya de 1930.

Oy en diya, los ovreros non djudyos ke lavoran para los djudyos en Israel vyenen de Asiya, no son arabos de Palestina. Kale demandar a Collon en ke manera Israel seriya un estado kolonyal…

La sigunda mintira, asigun Collon, es el sözde ritorno de los djudyos en su pais de al tyempo. Falso, mos dize Collon: los djudyos no se fueron de Judea en 70.  Se kedaron aya i son los Palestinyanos de oy. I los ke se yaman Djudyos? Nunka vinyeron de Judea: son djente de otros paizes ke se konvirtyeron a la relijyon djudiya. El djudaismo es una relijyon, mos dize Collon, no es un puevlo. No egziste puevlo djudyo.

Yo no so istoryano para responder sovre kyen son los djudyos de oy.  Solo me parese kuryozo ke los djudyos de Palestina se sean konvertidos al Islam, lo ke izyeron en dingun otro pais muzulman, myentres ke fueron  los non djudyos ke se konvirtyeron al djudasmo. Ama afillu si todos los djudyos de oy, inkluyendo yo ke me yamo Cohen, eramos konvertidos, esto no trokariya nada. Collon no parese konoser los byervos de Ruth: Tu Dyo mi Dyo, tu puevlo mi puevlo. El ke se konvyerte al djudaismo entra en el puevlo djudyo komo si su papu era Avram avinu, i no keda de ser parte del puevlo djudyo.

El djudaismo, una relijyon? Klaro. Ama una relijyon ke es la de un puevlo dicho de Israel. Kuando resitamos el Kadish, mozotros los Sefaradim demandamos al Dyo paz sovre mozotros ve al kol amo Israel, i sovre todo su puevlo Israel. En muestra relijyon, Israel es un puevlo, i mozotros de relijyon djudiya azemos parte de este puevlo. El djudaismo es una relijyon, ama la relijyon de un puevlo, el puevlo de Israel. No es el syonismo ke invento esto, es ansina muestra relijyon desde syempre.

I para este puevlo Israel, su pais fue syempre la Judea, afillu si nasyo en otro pais. Komo diziya Yeuda Halevy desde la Espanya, munchos anyos ante el nasimyento de Michel Collon: “Mi korason esta en Oryente afillu si mi puerpo esta en los konfines del Oksidente”. I no es a vozotros, keridos oyentes, ke vo ambezar komo dizimos al kavo de kada Pesah: ” Al anyo el vinyen en Yerushalaïm”!

Tresera mintira, asigun Collon: se dize ke la Palestina era un dezyerto antes de la yegada de los Djudyos. Falso, mos dize Collon; la Palestina era, asigun el, un “oseano de trigo”. Los kazalinos refuzavan de vender sus tyerras a los djudyos, ama fueron forsados por los Inglezes.

Por lo ke es del oseano de trigo, no es lo ke kontan los viajadores (Chateaubriand, Lamartine, Mark Twain, i tantos otros) ke se fueron en Palestina en el siglo 19, i ke deskriven una tyerra dezyerta, ni lo ke mos dan les estatistikas demografikas. Syerto en 1946 los arabos eran 1.300.000, ama eran solo 140.000 en 1882. Es despues de la venida de los djudyos ke los arabos pujaron de nombre, sovre todo en los lugares ande aviyan djudyos.

En kuanto a las tyerras, ni los djudyos ni los inglezes teniyan dingun poder para ovligar los arabos de vender tyerras si no las keriyan vender, tyerras ke de toda manera eran vaziyas i solo pyedras. Los djudyos, kon el Keren Kayemeth, merkaron kada tyerra de pyedras dunam despues de dunam, i son eyos por sus lavoro ke las izyeron enfloreser.

Kuatrena mintira, asigun muestro amigo Collon, dizir ke los arabos se fueron de si para si en 1947-48; en vedra, dize Collon, fueron echados afuera por los djudyos.

Lo ke no mos dize Collon, es ke son los arabos ke aprovaron de echar afuera, a la mar, los djudyos ovligados de defendersen, i ke demandaron a la povlasyon de irse para fasilitar la gerra. Es syerto muy posivle ke en esta gerra los djudyos atakaron a kazales arabos, de la misma manera ke los arabos atakaron a kibutsim djudyos. Ama esto es la gerra. I si son los djudyos ke la ganaron, pekado para los arabos, ama no kaliya empesarla.

Sinkena mintira, asigun Collon: Israel pretende ser una demokrasiya. No es una demokrasiya. Una demokrasiya tyene una Konstitusyon ke fiksa las fronteras del pais. La Konstitusyon de Israel es la sola en el mundo ke no fiksa las fonteras del pais.

A esto es kolay de responder ke la Konstitusyon de Israel no es la sola ke no avle de las fronteras del pais. No konosko dinguna konstitusyon ke lo aga, en todo kavzo no la franseza. Los kapos del Estado djudyo achetaron el territoryo kon las fronteras fiksadas por la ONU. Son los arabos ke no achetaron estas fronteras i izyeron una gerra ke pedryeron.

El Estado de Israel, adjusta Collon,  no es demokratiko porke fundado sovre el kolonyalismo i el rovo de las tyerras. Es la demokrasiya de los ladrones ke se esparten el rovo entre eyos.

Kualo responder? Ke no ay kolonyalismo, i ke las tyerras no fueron arrovadas. Ay un Parlamento, ay derecho de voto para todos. Los arabos votan sea para kandidatos djudyos sea para kandidatos arabos. Ay partidos arabos i deputados arabos en Israel. Asigun la deklarasyon de Independensya meldada por Ben Gurion el 14 de mayo 1948, kada uno tyene en Israel los mismos derechos, ke sea ombre o mujer, djudyo o muzulmano o kristyano.

No kale olvidarse ke la video de Collon es de 2010. Puede ser Collon kyere para los arabos de Israel la demokrasiya ke ay en 2010 en los otros paizes arabos o muzulmanos?…komo la Libiya de Khadafi, el Iran de Ahmadinedjad, la Siriya de Bachar el Assad, el Ayfton de Moubarak, por egzemplo.

Sejena mintira: El ayudo de los Estados Unidos a Israel es para protejar la demokrasiya en el Medyo Otyente. Falso, mos dize Collon: Los Estados Unidos no kyeren a la demokrasiya. Lo ke sostyenen son las diktaturas. I si sostyenen a Israel, es porke es su pulis de la benzina.

A tanta bovedad no se kualo responder. Responder es azer onor a un pensamyento. La benzina esta en Irak, Iran, Arabiya i Emiratos. Ke pulisiya aze Israel kon estos todos? Dainda no entendi.

Setena mintira: la Evropa pretende ser neutra. Falso, mos dize Collon. Israel es el ventiochen estado evropeo, ayudado por los syonistos Merkel i Sarkozy.

Bueno. Yo no aviya remarkado ke la Evropa era syonista… ama si Collon lo dize…

Ochena mintira: avlar kontra Israel, es ser antisemit. Falso, mos dize Collon. Kale kritikar un Estado ke se dize djudyo, dunke esta kontra los otros ke non son djudyos. Es Israel ke es rasisto.

Esto me akodra ke la Unesco aviya, aze unos kuantos anyos, votado una rezolusyon asigun la kuala el syonismo era una forma de rasismo. La Unesco ya troko su idea, ama Collon no.

Ama yo, yene penso ke uno ke dize ke kada puevlo tyene derecho a un estado, salvo los djudyos ke no son ni un puevlo, este es un antisemit tal i komo Dieudonné, asigun el kual el sionismo a matado el kristo.

En kuanto a Israel, si es djudyo, es el pais djudyo elijido komo tal por la ONU en 1947. Esto no aze de Israel un pais rasisto, o kale dizir ke la ONU es rasista, has veshalom!

Muevena mintira: los Palestinyanos son vyolentes i terroristos. Falso, mos dize Collon. Los halizes violentes son los de Israel ke oprimen los arabos. Afillu la ONU rekonose el derecho de los opresidos de rezistir a la opresyon. La rezistansya de los Palestinos es lejitima.

La repuesta es muy kolay: los arabos de Palestina no se atakan a los askeres djudyos, matan a mujeres i kriaturas djudiyas, no solo en Israel, ama tambyen en el mundo entero. Esto es una vedra ke savemos muy byen. La rezistansya franseza kontra los Almanes no konsistiya a ir a matar kriaturas almanas o mujeres almanas.

Enfin, dyezena mintira: el problema palestinyano es un problema sin solusyon. Falso, mos dize Collon: la solusyon egziste: un solo estado demokratiko. Ama Israel no acheta esta solusyon “para pueder kedarse pulis de la benzina”!

Kale eksplikar a este ravano de Collon ke si los djudyos no kyeren de un estado uniko i demokratiko, no es para azer la polisiya sovre la benzina (ama ke ravano!) es porke un estado ande los arabos seriyan en mayoriya no seriya demokratiko mas de un diya. Kale demandar a los kristyanos de los paizes arabos del Medyo-oriente lo ke pensan de este modo de demokrasiya.

Sovre esto me vo kedar porke ya vino la ora de eskapar mi emisyon.

Al djueves 2 de oktovre, si kyere el Dyo!

Edmond Cohen

3 comentarios en «Repuestas al antisyonismo»

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.


El tamaño máximo de subida de archivos: 300 MB. Puedes subir: imagen, audio, vídeo, documento, hoja de cálculo, interactivo, texto, archivo, código, otra. Los enlaces a YouTube, Facebook, Twitter y otros servicios insertados en el texto del comentario se incrustarán automáticamente. Suelta el archivo aquí

Artículos Relacionados: