Dospues de la luvya de antiyer, las kalores insuportavles se amaharon i estamos puediyendo respirar, durmir, salir a la kaye….
Oy, de toda mi alma rogi al Dio para ke un rayo de sol entre en el korason de los ke estan sufriyendo, los ke tienen problemas muy difisiles, los ke estan leshos de sus keridos i akeyos ke peryeron la esperansa o el kamino, para ke se les adulse la vida i tengan konsolasyon. Amen!
Ke yenna de allegrias i de plazeres puede ser la vida i a vezes ke dura, ke difisil de bivir o suportar hazinuras, los problemas ke tienen muestros keridos !
Ay ke ser muy fuerte i nunka piedrer la fe… Kada diya ke nase es el empesijo de un muevo diya i no puedemos saver kualas maraviyas o dezgrasyas mos traye….. De arrogar ke todo salga bien i ke no konoskamos oras malas …Amen
Si mos demandan kualo es lo ms important en la vida, yo dire ke en primero viene la respirayon i en segundo la vista. La vida empesa kon el primer reflo i termina kon el d’alkavo reflo a la Hora Buena…. Es un espanto i un grande sufrimiento kuando no se puede respirar sin renderse kuento, i se esfuersa la perrsona para travar el ayre a los pulmones ke deven de arresivir el oxygen nesesaryo para alimpyar la sangre ke torna al korason para ser pompeado a todas las partes del puerpo…
Oy rogi tambien por los ke fuman…. Para ke no yegen al punto de luchar para kada gotta de ayre ! Para ke no kavzen a sus korasoniko la difikultad o la imposibilitad de latir… Para pueder kontinuar a egzistir i gozar de este mundo i todo lo ke mos ofrese… I lo mas, la satisfaksyon de poder obtener lo ke dezeamos, muestros esfuersos koronados kon la reushitad…
Devemos, por muestro bien i el bien de muestro entorno de pensar de no inchir kon suzyedad muestras venas i venizikas ke son los kaminos ande kale ke korra muestra sangre ! Porke si un pedasiko de esta suzyedad viene kon la sangre a los pumones mos murimos atabafandomos ! Mamitaaaaaaaaa ! Nooooooo! O viene para no deshar pasar la sangre a una muy chika venizika del meyoyo i
hoooooooooop la paralizia mas negra de la muerte !… Yo fumi 35 anyos ! Ay 10 anyos ke ni me aserko de este guerko ke es el sigaro ! Porke ? Porke me yevaron al hospital kon ambulans ATABAFANDOME ! Oras negras i torni de la muerte…No kero ke mis amigos konoskan esta dezgrasya i al sigaro no lo puedes enganyar ni kon djoyas ni kon paras, ni kon promesas ! El save lo ke aze i LO AZE !
Komo se salva de este visyo ? Yo no se por kualas etapas pasaron los ke desharon de fumar i se kuraron enteramente, ma vos puedo dizir komo yo logri mi salvasyon, alimpyi la suzya golor ke se apegava a los vistidos sin kontar lo ke gastava para merkar este veneno!
Una “ermoza” kupa de agua en la mano siedra, bastante pezgada para bever kada poko unas gottas…. En la mano derecha tomava un plastik blanko de la forma de un sigaro o un lapiz (kon esansa de menta porke fumava sigaros de menta). Esto kedava en mi boka i lo mashkava tambien ! Estava difisil tres diyas i NO MAS ! El plastik lo solti dospues de max. 2 semanas. La agua me plazyo komo si beviya una bevida savroza. Mi mano se auzo. Kreyo ke dospues de um mez no teniya menester ni de esto ! Lo deshi…. Dospues de 10 anyos sonyo ke fumo en mis esuenyos a vezes, ma me digo (en mi suenyo) ke esto es negro i no devo fumar ! Oy ni ke me akodro de los tiempos ke fumava ! No me kanso, me siento freska, limpya i adoro la golor de los perfumes ! Solo…Tengo ermozos cendriers i no los uzo mas !
Artículos Relacionados: