En presedentes artikolos ya apuntimos mas de una vez el estado deplorable en el kual se topan munchos kales sefgaradis, espesialmente en los paizes ke istorikamente fueron parte del Imperio Otomano i onde uvo de antes komunidades djudias enfloresientes, ke oy son muncho mas chikas o desparesieron konpletamente en segito a las gerras, a la emigrasion i otros dezvelopamientos politikos, sosiales o ekonomikos.
En las sivdades onde no ay mas djudios ke puedan reklamar el derecho a un lugar para azer sus orasiones – ya no se puede azer nada, A lo maksimo se puede demandar ke la fragua del kal sea aprovechada komo sentro sosial o kultural i no para aktividades ke no son kompatibles kon la dinyidad de un lugar onde la djente dirijia sus orasiones al Dio. Ma en los lugares onde ainda ay komunidades djudias, deve ser echo un esforso maksimal para restorar, renovar i aprovechar para los menesteres komunitarios mimo los kales ke ya son aprovechados para los servisios relijiozos, en la mas parte de los kavzos porke la mayoria de los djudios de esta komunidad se pasaron a otros kuartieres de la sivdad, o mizmo emigraron a otros paizes i no es mas posible ni de arekojer minyan para las orasiones.
Podemos notar kon satisfaksion ke esto ya fue echo en algunos lugares komo por enshemplo en Sofia, onde el Kal Grande fue restorado en su forma orijinala, aunke ya es demazia grande para la komunidad djudia de esta sivdad; o en Estambol onde el kal de Ahrida, en el kuartier de Balat onde prarikamente ya no ay mas djudios. fue restorado i es esta avierto a vijitas de turistas, o el kal de Zulfaris ke fue renovado i onde se topa agora el Muzeo de los Djudios de Turkia.
Podriamos traer otros enshemplos mas, no solo de Estambol sino ke de otros lugares tambien, ma el fakto es ke ainda kedan diezenas de kales ke son estrechamente atados a la istoria del djudaizmo sefaradi ma kedaron abandonados por las razones ke mensionimos i estan en un estado deplorable, kon las paredes o el tejado medio derrokados i en peligro de derrokarsen enteramente komo akontesio dezgrasiadamente kon el manyifiko kal de Edirne en Turkia.
Un peligro semejante amenaza aktualmente a los kales de Izmir ke oy tiene una komunidad djudia de apenas 1500 almas, en komparasion kon las diezenas de miles ke tenia asta unas kuantas diezenas de anyos atras. En efekto, fondada en el siglo 16, kuando Izmir devino el prinsipal porto por el kual eran eksportados los produktos agrikolos de la Anatolia, esta komunidad se dezvelopo rapidamente no solo del punto de vista ekonomiko sino ke del pounto de visto kultural tambien. Ayi fue publikado el primer jurnal en ladino, Las Puertas del Oriente, segido mas tadre por La Buena Esperansa, el Novelista, El Meserret i mas.
La komunidad de Izmir tuvo tambien famozos rabinos i fueron fraguadas ayi numerozos kales para responder a la demanda de la povlasion. Se kalkula ke en todo uvo ayi 34 kales, de entre los kualos 13 existen ainda, aun ke 6 de eyos estan en negro estado i en peligro de derrokarsen kompletamente si no es echo algo.
Ma sigun lo apuntimos, despues de las olas de emigrasion ke empesaron a prinspios del siglo 20 i yegaron a sus kolmo kon la kreasion del estado de Israel, Izmir se vazio kaje enteramente de su povlasion djudia i la komunidad djudia de esta sivdad, ke konta al deredor de 1500 almas solo, no puede reyevar la karga finansiaria del mantenimiento de todos estos kales. Mizmo de entre los ke estan en buen estado, no todos son aktivos siendo ke ya no tienen minyan para ke se pueda azer ayi las orasiones diarias. Afin ke no sean serrados enteramente, por falta de aktividad prolon-gada, se aze un esforso de avrirlos a tormo de rolo, kada kuantas semanas, i tener ayi servisios relijiozos; ma esto es lo maksimo ke se puede azer i los otros kales, ke ya no estavan en buen estado, fueron abandonados a sus suerte, ruinandosen kada anyo un poko mas. Ma sigun dize el refran djudeo-espanyol “Kuando la noche es mas eskura es para amaneser” i agora podemos esperar ke estos kales, tan importantes para la istoria de la komunidad djudia de Izmir i su kultura, no seran pedridos.
Sovre la inisiativa del Fondo Avihay i del Sentro Shazar en Israel, en el anyo 2002 se empeso en el “Proyekto Izmir”, un proyekto ke tiene por eskolpo de restorar estos kales i meterlos de nuevo al servisio del publiko, sino komo lugares de orasion a lo menos komo sentros de kultura.
Es interesante de apuntar aki la kolaborasion de la Universidad Dokuz Eylül de Izmir, i mas espesialmente del Prof. Tayfun Taner, responsable de un proyekto para la konservasion i restorasion del sentro istoriko de Izmir, ke es djustamente el lugar onde bivio de antes la mayoria de la komunidad djudia i onde se topan munchos de sus kales mas antiguos i mas famozos komo el Kal de la Sinyora, el Kal Portugez etc.
En el kuadro de este proyekto una delegasion israeli fue a Izmir i durante unas dos semanas estuvo fotografiando estos kales, tomando mizuras i aziendo planes ke serviran de baza a los lavoros de restorasion, komo el plan de la bima del Kal Shalom ke traemos aki.
A la fin de este viaje fue prezentado un raporto kon rekomendasiones para un grande i ambisiozo proyekto de restorasion – proyekto ke su exekusion kostara munchos miliones de dolares o euros ke ninguno savia entonses de onde vendrian, sovre todo en estos tiempos de kriza ekonomika en los kualos esta siendo kada vez mas difisil de obtener donasiones, mizmo para proyektos de los mas importantes.
Un dezvelopamiento poztivo, ke ayudara muncho, aun kon esto, a la realizasion de este proyekto es la desizion tomada ultimamente por la UNESCO, la Organizasion de Sensia i Kultura de la ONU, de rekonoser a los kales de Izmir komo “un sitio internasional de sinyifikasion kulturala i arekeolojika” i apoyar el proyekto de sus restorasion. Otro dezvelopamiento pozitivo fue la desizion de la Fondasion Mordehay Kiriati de Israel, de partisipar djuntos kon la munisipalidad de Izmir i su komunidad djudia, en el finansamiento de este proyekto,
Sigun los planos seran restorados sinko de estos kales ke estan serka uno del otro i, en kolaborasion kon las institusiones akademikas lokales, eyos seran transformados en un djigantesko muzeo i sentro kultural. Este komplekso de fraguas inkluira tambien un “Sentro de edukasion sovre el Ladino i la Komunidad Sefaradi de Izmir” ke organizara kursos i konferensias para estudiantes del estrajero ansi ke para los ke keren investigar la erensia kulturala de esta komunidad.
Este sentrro ayudara tambien, siguramente, a dezvelopar un dialogo interkultural kon los turkos musulmanes de Izmir ke respektaron estos kales i no los desakraron, mizmo kuando estavan abandonados, i ke podran agora embezar komo los djudios de esta sivdad bivieron kon eyos durante siglos.
Artículos Relacionados: