Una de las konsekuensas del intereso manifestado agora enverso la kreasion literaria en ladino es ke se estan deskuvriendo mas i mas, eskondidos en archivos i bibliotekas diversas, livros en ladino ke sus existensia kaji no era konosida asta oy, komo por exemplo, los tres livros de Reyna Koen, una autora sefaradi ke bivio en Saloniko a la fin del siglo 19.
Estos livros son:
- “Una buena lision a siertas muchachas de muestra epoka por kitarlas del kamino yerrado”, 1898.
- “Por los modernos: un razonamiento kontra la mansevez de muestra epoka” 1899.
- “Komentario de Daniel kompuesto de parte mademuazel Reyna de Menahem Hakoen.”
- Estos tres livros fueron traidos a mi atension por el bibilotekario i bibliografo Dov ‘Hakoen ke agradesko aki.
Asta el anyo 1910, i mizmo despues, estos tres son los solos livros eskritos en ladino por una mujer sefaradi del Imperio Otomano i ke fueron publikados por una kaza de edision importante i bien konosida, “Etz Hayim”, ke publiko livros de morala i numerozas edisiones del Meam Loez.
Las dos primeras ovras: “Una buena lision a las muchachas…” i “Por los modernos” son livrikos de 12 i 15 pajinas, ke apartienen al djenero de literatura rabinika de morala, kon una manera de dialogo frente a los problemas kavzados por el modernizmo. Estos livros tratan del djenero (ombre/mujer), igualdad sosial, peligros de la sosiedad laika i el modernizmo. No es por azardo ke en los dos titolos aparese el termino moderno. La razon es ke la mayoria de los livros de literatura morala eskritos en esta epoka kritikan al modernizmo.
Ken era Reyna Koen? Eya estudio en la eskola de ijas de la Mision Protestante fondada en los anyos 70 del siglo 19 por el pastor Crosby. En esta eskola se estudiava inglez, ebreo i ladino. Se puede dedusir ke esta era una eskola para ijas djudias, prinsipalmente de famiyas proves, de un artikolo publikado en el jurnal La Epoka, en 1877, segun el kual: “…Munchas ijas de djudios estudian ayi debaldes”.
La ovra de Reyna Koen amostra klaramente ke la autora konosia los djeneros literarios i meldo munchos livros. Su ovra es djudia, ma eya inkluye konosensias del kampo de la kultura i la literatura jenerala. En los livros “Una buena lision…” i “Por los modernos…” eya inkluye refranes i kuentos de la Biblia, de la epoka del Talmud i de los livros apokrifos komo el livro de Yeudit. Segun eya las mujeres en su epoka pedrieron la fuersa ke tenian en el pasado i eya sita komo exemplo a Dalila, ke kon su ermozura i intelijensa supo azer kayer en una trampa al mas fuerte de los ombres de entonses, Samson; a las mujeres del rey Salomon, el mas savio de los ombres, ke supieron obtener su konsentimiento a fraguar altares para sus idolos; a Yeudit ke mato a Holofernes, i a Cleopatra ke supo azerse amar por Marco Antonio.
Es ke Reyna Koen era una feminista ke yamava a las mujeres de su epoka a liberarsen de los ombres?
Es probable ke no. Eya eskrivio sus ovras en el estilo de los livros de morala eskritos por ombres, ma su boz es diferente. Eya kombina en su ovra mistika, profesia, lagrimas i eksklamasiones ke reflektan su pasion.
El eskopo de un livro de morala es de traer modelos de komportamiento dezeado, ensenyar las reglas de la morala, kalmar i konsolar la alma djudia ke esta en pena. Ma las kritikas i atakos kontra el komportamiento de los ombres i mujeres de la epoka moderna tienen un buto diferente. Es verdad ke Reyna Koen se adresa a las mujeres djudias, ma en realidad eya se adresa a la komunidad djudia entera. De mizmo ke los ombres abandonan sus mujeres i se deshan tentar por el oro, se puede dizir ke los djudios se estan aleshandosen del djudaizmo koriendo detras del oro.
La autora termina sus dos livros kon una yamada al arrepintimiento: “Dunke ermanos, rogemos a el Dio piadozo ke avra a muestros korasones i ke mos eskape del espirito malo para ke lo konoskamos i tornemos al kamino bueno i veremos la salvasion de Israel presto en muestros dias, Amen!”
Estos dos livrikos publikados en 1898 i 1899 fueron eskritos kon la ardor de la fe de Reyna Koen i son en realidad una manera de introduksion a su treser livro, un komentario sovre el livro de Daniel. Este es un livro apokaliptiko ke interpreta los akontesimientos en la istoria del puevlo de Israel en konformidad kon su idea ke los imperios se krean i despues kayen. A las kuatro bestias apokaliptikas ke segun Daniel son Babilonia, Persia, Medea i Gresia, Reyna adjusta el reynado de Roma. Eya aze tambien aluzion al dia de la fin del mundo, ma de mizmo ke en otras semejantes profesias, los sinyos ke da no son klaros i pueden espandirsen sovre munchos anyos.
La preokupasion por la fin del mundo no da repozo a su alma. Eya tiene sinyos profetikos, seres milagrozos le avlan en sus esfuenyos i la yaman a pasar a la ovra.
En 1911, despues ke no eskrivio nada durante munchos anyos, se publika una letra suya en la prensa djudia de Saloniko. Eya anunsia ke ya deskuvrio ken va ser el Mashiah: el rabino de Saloniko, Rabi Yaakov Meir, ke fue elijido al posto de Rishon Letsion…..i deve ir a Yerushalayim a kumplir su mision en el intereso del djudaizmo ke esta para kayer en un abismo i depiedrerse.
Artículos Relacionados: