San Valentin, El Diya De Los Enamorados

Por:
- - Visto 325 veces

El diya de barrir los vidros de los korasones rompidos !

Unos kuantos diyas mos separan del esperado Diya de los Enamorados, el 14 de Febrero. Muy probable ke no todos seran enteresados por este diya muy “fabrikado” ma ven verash ke lo mas de los mansevos desveloparon un verdadero kulto por esta fiesta pagana i de dinguna manera judiya…. Ma !….. Lo fiestan todos kon flores, bonbones, kantikas i bayles, noches

romantikas, regalos, todo modo de korasonikos de todas las kolores, el kolorado sovre todo (!)…

En muy serka, el 14 de Febrero, se va avlar solo de esto i veremos merkar en una dulse urgensya el regalo ke va plazer lo mas a la damma o al duenyo de sus korason! El o eya sin el kual/la kuala no se puede bivir, solo la muerte los puede separar, nada tiene savor sin eyos ets… Los “so loko/a por ti, te kero mas de mi vida” bolaran en el aver i los veremos abrasandosen akodrandomos kon kompasion de los diyas kuando mozotros mizmos eramos enamorados !


No egziste en el kalendaryo otra data, para selebrar el amor i el diya de la San Valentin. Ke pekado ke este diya es assosiado al konsumo i a las kampanyas publisitaryas de los magazenes para motivar la gente a merkar mas i mas.

Este diya se atribua a un martiryo ke bivyo en el tiempo del Emperyo Romano en el siglo III. Malgrado ke no se rekonose historikamente, lo sierto es ke el Papa Gelasi era enkargado de estableser un kalenderyo liturjiko katoliko i este diya se aparto al honor del famozo santo. Se selebro por la Iglesia Katolika fina los anyos sesenta del siglo 20 i es alora solo ke se desidyo de eliminarlo del kalenderyo liturjiko… Mensyonare ke Valentin era un saserdose kristyano ke kontinuava a kazar los mansevos kde viniyan ande el, malgrado ke el Sezar Romano aviya aviya defendido ke la djente se kazaran, kon el motivo ke los soldados kazados no guerreyavan bastante bueno i siempre keriyan tornar a sus kazas !

Por seguro ke lo mato kuando lo supo ! Se empeso a selebrer el Diya del Amor en el siglo XIV (1382) ma es en el siglo XIX (1847) ke se izo popular kon las kartas de amor ke los namorados se embiyavan. Dospues de los 1950 este diya fue la fiesta de los vendedores de produktos komo chokolates, rozas i djoyas kon todo modo de regalos chikos i grandes….. Sin olvidar la ganansya de los restorantes, los klubes, las kompanyias de viaje…. El Diya del Amor es una otra okazyon de vazyar las aldikeras de los klientes para los ke tiyenen una buena imajinasyon ! Noel chiko si keresh !

Ahhhh las mujerikas tontizikas ke se kreyen todo lo ke les dizen…. ! Tienen tan menester de afeksyon, de saver ke son amadas i adoradas ! Komo no saltar ensima de esta verdad i no azer “echos buenos” ensima de este tema ?

Al empesijo i los hombres se “enlokesen” i beven de este vino ke traye mareyos por un kurto tiempo dospues estan “okupados” i son “seryozos” o son “kansados” i tienen el tino en “otra koza” o es el “stress” o la “salud” …. Yo digo ke el amor kontinua todo el tiempo ke la persona no esta siguro de los sentimientos del otro ! El momento ke es una koza sierta i no defendida eskapa el amor…Se fuye ande los otros. Keda la afeksyon, la responsabilidad, la amistad, el “espanto” (muryendome de riza !) el respekto i todo esto en los mijores de los kavzos ! Sino son pletos sin fin, darsen los “chatales en la mano” arrondjarsen de parte i de otro, sufrir i azer sufrir… Un Infierno en kaza….

Lo bueno i lo ermozo es ke en este Diya del Amor todo se aze roz, se olvidan “lo ke kale olvidar” i todo se enderecha para unas kuantas horikas (kon pasensya !) i en munchos kavzos “ayyyyyy es un buzana (komo el yelo) de persona ! No me trusho nada ! La vizina….. mi ermana….. mi amiga arresivyeron….. se fueron a…. El miyo es un lenyo ! Yoros…Pletos…Males !!!

Vos digo yo ! Es el diya ke se enrikesen los floristos, las pattiseriyas, los magazenes de alikas i tumbanikas ! El kusur es un djuego kon munchos djugetos !

Porke…. El verdadero Amor, el respekto i la amistad no tienen menester de un diya spesyal para manifestarse de la mijor manera posivle ! I es este amor, la profunda satisfaksyon de estar endjuntos ke vos suheto a todos, kon muncha amistad ……

[email protected]

Acerca de Sharope Blanco

SHAROPE BLANCO en ESTAMBUL (Turquia) Sharope Blanco, economista y profesora de lenguas, administradora y fundadora del Grupo SEFARADIMUESTRO en Yahoo, donde escribe sus poemas, artículos, recuerdos y su novela Almendra. Escritora y poeta de innumerables poemas y artículos en Inglés, en Francés, en Turco y en Judeo-Espanyol, pocos publicados hasta la fecha. Su obra será publicada post-mortem según su deseo, por su hijo Nebil F. Behar, medico residente en Inglaterra.

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.


El tamaño máximo de subida de archivos: 300 MB. Puedes subir: imagen, audio, vídeo, documento, hoja de cálculo, interactivo, texto, archivo, código, otra. Los enlaces a YouTube, Facebook, Twitter y otros servicios insertados en el texto del comentario se incrustarán automáticamente. Suelta el archivo aquí

Artículos Relacionados: