Grasyas a mi kerido amigo Dogan de Canada ke me embiyo esta dulse historya ke me plazyo tanto ke la traduizi al Judeo-Espanyol. Dizimos “kreaturas….no se toman al seryo….. Kreatureriya…..”. Kon esto munchas vezes somos testigos de una savyedura, una hohma, un komento tan inteligente, kon tanta verdad ke mos puedemos averguensar de no aver pensado a lo ke vinimos de oyir de la boka de un chikitiko de 6-7 anyos ! Yo diriya ke los instinktos son mas fuertes de la inteligensya humana i la naturaleza puede en un segundo derrokar todo lo ke el humano kon su mente tan perfekto puede lograr….. Egzemplos ? Terremotos, tsunamis… tempestas.. I ke dizir del amor ? El hombre o la mujer ke se namoran a 50 anyos i mas, siendo kazados kon ijos i inyetos i deshando atras todo lo ke era sus vida, sus karinyo, sus kazas i sus lavoros por una manseva o un mansevo de la mitad de sus edad ? Savyendo ke esto no deve ser, es pekado, es ser loko o loka !….. Ma afita por dezgrasya…. De la mizma manera ke se sakuden las tierras i matan a miles i miles de personas, derrokan sivdades enteras…..
Mientres dire a todos los ke meldan mis eskritos HAG SUKOT SAMEAH i MOADIM LE SIMHA…..
El kuentiziko ke vos va kontar se pasa en los bodres del Oceano Atlantico, en una plaja dezierta i la mar turkiz ke sentiyava basho de un sielo blue sin mizmo una sola nuvla. Un Ganeden por el chiko Micha ke morava serka i adorava koryer ande la mar viniya a abrasar las arenas blankas. Amava tambien arrekojer los kokiyajes, unas mas ermozas de las otras, i es ansina ke se le aviya akumulado sestos yennos de estas maraviyas trayidas por las olas….
Un diya estava okupado a echar a la mar estreyas de mar ke se estavan muryendo en la arena, dospues ke las aguas se aviyan retirado.
Vino a su lado un hombre aedado i le demanda kualo estava azyendo : El chiko le respondyo ke estava salvando las estreyas de mar en echandolas a la mar i ke si no lo aziya los rayos del sol puediyan matarlos….
El hombre le disho “Ma ay miles i miles aki. Lo ke estas azyendo no va azer una diferensya..”
El chiko se aboko i tomo otra una estreyika de mar i la echo kon fuersa a la mar dizyendole ” Para ESTA ke vengo de echar va azer una diferensya !..”
Ask olsun de ijiko ! (Eksklamasyon en Judeo-Turko para ekspresar sorpreza, appresiasyon, alavasyon ets.. -ashk olsoun-)
Kon karinyo
[email protected]
Artículos Relacionados: