Savyedura

Keridos Amigos i mis Amigitas,

El mijor a la forka… diziyan unos ! No es ermozo…. Lo se ! Ma en vezes kitan unas kozas muy savyas ! Proverbos mizmo….

No digas todo lo ke saves
No agas todo lo ke puedes
No kreyas todo lo ke oyes
No gastes todo lo ke tyenes

PORKE

Ken dize todo lo ke save
Ken aze todo lo ke puede
Ken kreye a todo lo ke oye
I gasta todo lo ke tyene

MUNCHAS VEZES

Dize lo ke no konviene
Aze lo ke no deve
Juzga lo ke no ve
I gasta lo ke no puede…..

——-

Woody Allen dize :

Ser intelijente es un avantaje porke se puede finyir de ser un imbesil ma el kontraryo no es posivle !

Jose Marti (1853-1895)

Nunka oyi avlar de el !…. No es su kulpa por seguro ma la miya ! CUBA es leshos de ande me topo i siempre para mi fue el payis de Castro… i de siempre fue para mi el payis del puro, de los bayles i de los kantes…. De la povredad, del komunizmo i de las plajas al bodre de la mar turquoise… Le do razon a Marty… Tan vedra todo lo ke dize

Portanto parese ke es uno de los padres de Cuba…. Tantos estatuas tiene!

Me plazyo ke disho :

Es triste de no tener amigos ma mas triste es no tener enemigos ! Porke esto kere dizir ke la persona

NO TYENE TALENTO ke da envidya
NO BIENES ke la gente se selan
NO KARAKTER ke impresyona
NO PODER ke da espanto
NI HONOR de la kuala se avla
I NI KOZAS ke burakan los ojos !

——–

I una ermoza deskripsyon de Di-o…..

El chiko le demando a su padre de ke grandor es el Di-o.
El padre le mostro un avion ke estava pasando en el sielo

– Ke grandor es este avion ?
– Muy chiko… Difisil mizmo de verlo !

El padre yeva el chiko a un aeropuerto

– Ke grandor es este avion ?
– Es enorme papi !

– DI-O ES ANSINA…. SU GRANDOR VA DEPENDER DE LA DISTANSYA ENTRE VOZOTROS. KUANTO MAS SERKA SERAS
A EL, MAS GRANDE SERA EL EN TU VIDA…

EL PAPA FRANSISKO DIZE :

El ke se ekskuza es VAYENTE
El ke perdona es FUERTE
El ke olvida es FELIS

Yo le do razon !

—–

I mi kerido Albertiko Einstein ke kito de su aldikera arugada : Di-o no kriyo el mal… El mal rezulta de la absensya de Di-o en el korason !..
Yo lo amo a este hombre ! De kualo se muryo ? Kriza de korason ? No se ma deviyan ser en muy mal estado para ke el povretiko se torne a las fizikas para ganar su pan ! Ken azeriya esto ? Por seguro ko no yo !!! Esto es bueno a la eskola para pasar la klasa…. Muy difisil ma no ay otra alternativa si keres kontinuar a estudyar ! Ke la kavesa se le parte al ke metyo estas siensyas en lo ke kale ambezarse para terminer el Lycee ! Mil guerkos del Gehinnam…. Esto i matematikas i la chimiya…. Ken lo tiene de menester ? Kale ser loko para interesarse a estos dospues de los estudyos !

Vedra ke Einstein era un poko trololo ? Un poko “demasyado” inteligente ? Nooooo ! No se toma por marido… Esto es klaro, i no solo por su dedikasyon a la fizika povre de el ! Ni judyo komo benadam era….Ma no se deke… Yo lo amo i punto ! Se los kortariya los kaveyos kuando se kedariya durmyendo muerto de kanserya !!! Komo Dalila al Samson ! Se le kedariya tino de lavorar dospues de esto ? Si no amariya dospues las fizikas, seriya yo ke ganariya akeyo, el Premio de Nobel a su lugar por aver topado ke “todo depende de los kaveyos !”…
Egzemplo : Samson i Einstein ! Mas kaveyos, mas fuersa… Mas kaveyos, mas la kavesa por las siensyas… Mas kaveyos ? Presto ir al coiffeur para ser un hombre normal !

Sharope blanco
[email protected]
Esto es el premio Nobel…..
Vale la pena de kitarse del mundo ?
Para meterlo en un kanton en kaza !

Sharope Blanco
[email protected]