Mi kerido, I yo komo munchos padres so yeno de kerensya, Kero darte un poko de mi vida i mi sensya. Mi ambision,mi deseo es de verte en gozo I yeno de buena vida kon futuro ermozo.
Tu alegria es mi fiesta,tu ansya mi dolor, Tu sensya,tu tenida i tu gloria es mi honor. Ansi tu posedas las bazas de toda mi vida Visto ke mi ansya,mi alegria i mi dia Son bazados a tu egzistensia i a tu ida En ti se komposa mi reflo i la alma mia.. Si tengo un chiko espanto de la muerte Es por ke kero alkansar a en bueno verte…
Por ti me veo en la luna i kuando en un pozo, Mi penseryo siempre en tus pasos i sin repozo. Sos de boka dulse i kon mirada inosente Tu boz komo kante das alegria al ke siente. Sos mi bevienta,me das boraches kon alegria Tu sos la baza de mi vida para ke yo ria…. Te djuro la fuerso de bivir la topo en ti solo Kon tu nombre i kon tu kerensya yo me konsolo.
Acerca de Haim Vitali Sadacca
So nasido en el 11/9/1919. En el 1990 me travi de mi negocio por el amor de mis ijos. Hacia importaciones de grasa i de productos chemicales para fabricacion de jabon de los Estados Unidos durante muchos anyos. En mismo tiempo era reprezentante de una factoria en Italia que hacia machinas para hacer jabon.Disde anyos ke mis dos ijos bivian con sus familias el uno en NY Long island,i el otro en Montreal. Mi esposa i yo empisimos a bivir 5 mezes en el Canada, 3 mezes en Florida y 4 mezes en Istanbul. Ay 22 anyos ke tenemos esta vida,para gozar de las affecciones de nuestros ijos y nietos.Disde mi chikes ke me plasia la literatura,eskrivia poesias en Turko,en Fransez, i en Judeo-Espanol. Este hobby me da una enerjia en esta edad avansada.Antes 2 anyos la Foundation for the Advancement of Sephardic Studies and Culture New York, publico mi livro\Un Ramo De Poemaskon lastraductiones echas en Inglez de parte de David Fintz Altabe, y lo regali a esta organizacion. con la pensada ke puedeser dare una mano a la reanimacion de nuestro Judeo/Espanol(Ladino) ke avlamos los sefaradis en Turquia y en muchos paises.
Artículos Relacionados: