No… No puedo dizir ke las relasyones entre los Espanyoles, los Israelyanos, los Judyos sefaradis i el Judaizmo son komo mi alma lo dezeariya tanto… Ke pekado. Yo adoro Espanya i muy muncha vezes fui en este pais ermozo, interesante kon todo lo ke ay ayi (kultura, arte, festivales, muzika i bayles, sitios istorikos, muzeos, i por siguro la mar i el sol…) A mi me plaze lo mas la arkitektura i la manera de vida kaji medieval en munchos sitios de Espanya. En mis viajes avli kon la djente de ayi i tuvimos konversasyones ke tokavan tambien al judaismo, al israel i por siguro a los judyos rechesados de Espanya antes 500 anyos. Lo ke vi… oyi de mis proprias orejas i resenti es absolutamente igual a lo ke me kontaron tanta gente…. Ni mas ni menos !
Ke pekado ke todos los judyos en el mundo entero no ven i no konosen (munchos, sino todos) – no vo dizir odyo afilu es el kavzo en el 80 por syen – el sintirse leshos… no kerer bien… no akseptar komo ermuera o yerno… no kerer ke sus ijos seyan amigos kon ijikos judyos o preferar no tenermos por vizinos ets. No…No lo van a dizir klaramente ! Van a dizir el kontrario si avlan kon judyos o kon personas komo jurnalistos o gente ofisyal… Esto lo tyenen en el korason o en la miente sin kererlo, sin pensar porke… Si es djusto o no… Puedeser porke ensenyaron a los chikitikos ke el Christo fue krusifiado pormodo de los judyos ? Puedeser porke mozotros komemos en Pesah una koza ke no parese a lo ke eyos komen… la matsa ! I no saven komo se aze…(saven ma dizen ke ay sangre de kristiyano aryento de esto !!!! Ansina se lo kreyeron anyos i anyos o lo disheron en todo kavzo ! ) Somos, o los muy relijiozos son malos a sus ojos ? Se visten de preto los ombres i afilu chapeyos de samara en enverano ! Ken son estos judyos… Pensan ke son los amados de Di-o ! Kualo es esto ? Di-o no mos ama a mozotros ? Eyos se van a ir a un otro Ganeden ?
Abdulkarim Haasnah :
“Si… dizen ke Hitler los mato kuaji a todos… Mo no los mato… O puedeser si… No se !… Yo no lo vide.. Ay fotos, testimonios, ya paso… Uvo de todo en la Historia… i ken save lo ke izyeron i komo kijyeron apartenerse de todo ! I ke afito ? Agora estan en los mijores lugares, son los mas rikos en el mundo… Tienen un pais i todo… i no les abasta, keren todo lo ke apartiene a estos povre filistinianos. Los matan ! Kualo pueden azeer kon una armada sofistikada ? Matan a las mujeres i a los chikos ! No vez en la televizyon ? Mos amostraron todo… No solo lo ke estos israelianos mostran i dizen… mentiras ! Eyos azen 10 vezes mas ! Yo ? A mi ke me sale ? Ke no me digan ke solo los arabos son negros… Eyos no pueden suportar a los judyos i tienen razon ! Son sus tierras ! Paz ? a la otra vinida ! I vas a ver… Un diya mozotros, los arabos, mos vamos a enfuertesera ke va ser alora ? El mundo entero les da razon ! Los judyos, si kontinua ansina, no van a tener dingunos para darles razon… ni Amerika i ni Antarktika ! Palavras… Fue un yerro de darles este pais ! Deviamos pensar ke los arabos no ivan akseptar nunka ! I nunka avra paz entre mozotros !”
Parese una shaka no ? NO ! no es shaka. Es la verdad i se yerran eyos ke pensan de otra manera… No se puede serrar el sol kon las manos ! Ke pekado…ke pekado…
I ken disho ke es la Espanya ? Yo avli por todos los payizes… Payizes arabos o no ! En estos diyas ke el Di-o ke seya kon mozotros porke si una sola de las milyones de maldisiyones mos toka, kada minuto i kada ora, no un solo judyo estara bivo en el mundo !
Artículos Relacionados: