Kon la muerte de Shimon Peres los sivdadanos de Israel i la Komunitad Judiya en el mundo peryo una boz por la demokrasiya i la paz. Fue Prezidente del Estado i dos vezes Primer Ministro. Era undo de los fundadores de la Medina.
En 1994 Peres i Yitzhak Rabin fueron honorados kon el premio Nobel de Paz kompartido kon Yasser Arafat. Dinguno fue tanto asosyado kon el kordo de Oslo komo lo fue Peres. Se esperava ke ivan a yegar a la paz.
Peres dediko su vida entera a su puevlo i a Israel.
Syzmon Perski nasyo en Wiszniew/Polonia en 1923, izo Aliya kon su famiya en 1934. Engrandesido en el Movimiento del Kibutz, David Ben Gurion le propozo de ser el sekreter de Mapai – el Partido de Lavoro .
En 1944 se metyo a la kavesa de una ekspedisyon illegal i se fue al Neguev para krear unos establesimientos Judios. Los Inglezes lo apanyaron i lo metyeron en prezo.
En 1947 entro en la Hagana. Era el responsavle de merkar armas. Dospues ke se deklaro el Estado de Israel se izo el Direktor del Ministeryo de la efensya. Tenia 29 anyos. Kon sus esfuerzos para obtener los aviones Mirage de Fransia, Israel fue en una mijor pozisyon en la Guerra del Kanal de Suez en 1956. Fue el ke izo el plano al lado de la Fransia i de la Inglaterra.
Su vida politika empeso después de la Guerra de 6 Dias. Soportava las kolonias en tierras diskutadas. Despues de ser unha aguila se izo un paloma i simbolo la paz kijyendo la paz sovre todo kon los vizinos Arabos. Ma Israel tuvo ke enfrentar la Intifada….. El Medio Oriente puediya ser una zona de
prosperitad kon el komersyo i la paz. Uvo paz despues entre Israel-Egypto i Israel-Jordania.
En 1959 fue elegido al Knesset por el Partido Mapai i se izo Deputado Ministro de Defensa. Mas tarde en 1974 servio en el Gobierno de Yitzhak Rabin. En seguida es Peres ke se izo el Primer Ministro. Peryo las eleksiones en 1977 en favor del Likud kon Menahem Begin.
En 1980 uvyeron dos Primer Ministros en rotasyon a medyo tiempo. Rabin i Peres ke servyo komo Ministro del Etranjero.
En 1995 Rabin fue assasinado i el Partido del Lavoro no puido ganar las eleksiones. Fue el Likud ke gano kon Binyamin Natanyahu en su kavesa.
En 2000 Peres peryo la Prezidensya i fue Moshe Katzav ke gano. Peres torno atras kon la Unitad Nacional entre el Partido de Lavoro i Likud basho Ariel Sharon.
Despues de un tiempo Ariel Sharon troko de partido i kriyo el Partido Kadima. Peres esperava ser el Primer Ministro, ma este puesto se fue a Ehud Olmert.
Fue ellejido Prezidente de Israel entre 2007.
2014. Peres resivyo grandes honores de la parte de la Reina de Inglaterra. Resivyo el titulo de Kavallero de la Kruz. Los Bedouins lo nomaron “Sheik”.
En 2011 Peres peryo a su mujer Sonya ke se muryo de un attako al korason. Se aviyan kazado en 1945 . Tuvieron 3 criaturas. Tsivia, Yoni i Nehemia.
EL era un optimisto i disho “Los optimistos i las pesimistos mueren de la misma manera. Biven de manera diferente. Prefero bivir komo un optimisto”
Shimon Geron
Sydney
Artículos Relacionados: