Si en vezes me vias silansiozo o pensativo, Es ke me sentia como en tu alma ke yo vivo. No dezeava avlar,ni oir algunos bruidos, De espanto d’alesharme de mis suenyos afektivos.
Kuando via los filmos se revivian mis memorias Me sentia como borracho viendome en las glorias Era un transformado en esclavo por mis sentidos, Recordandome lo pasado,mis dias con suspiros.
Muchos anyos izites en mi corazon tu morada, Ahora me topo muy leshos de tu dulse mirada Como puedo olvidar los recuerdos de mi vida? I la tristeza ke avia sentido en tu ida.
Estas ariento de mi alma en un cuadro dorado Las noches en mis suenyos me veo enamorado. Durante el tiempo ke vivere tevo adorarte, Mismo ke estas lejos nunca puedre olvidarte.
Acerca de Haim Vitali Sadacca
So nasido en el 11/9/1919. En el 1990 me travi de mi negocio por el amor de mis ijos. Hacia importaciones de grasa i de productos chemicales para fabricacion de jabon de los Estados Unidos durante muchos anyos. En mismo tiempo era reprezentante de una factoria en Italia que hacia machinas para hacer jabon.Disde anyos ke mis dos ijos bivian con sus familias el uno en NY Long island,i el otro en Montreal. Mi esposa i yo empisimos a bivir 5 mezes en el Canada, 3 mezes en Florida y 4 mezes en Istanbul. Ay 22 anyos ke tenemos esta vida,para gozar de las affecciones de nuestros ijos y nietos.Disde mi chikes ke me plasia la literatura,eskrivia poesias en Turko,en Fransez, i en Judeo-Espanol. Este hobby me da una enerjia en esta edad avansada.Antes 2 anyos la Foundation for the Advancement of Sephardic Studies and Culture New York, publico mi livro\Un Ramo De Poemaskon lastraductiones echas en Inglez de parte de David Fintz Altabe, y lo regali a esta organizacion. con la pensada ke puedeser dare una mano a la reanimacion de nuestro Judeo/Espanol(Ladino) ke avlamos los sefaradis en Turquia y en muchos paises.
Artículos Relacionados: