Sinyoras djudias en la ombra del palasio otomano

Por:
- - Visto 953 veces

El rolo aktivo de la mujer en la vida politika es un fenomeno konosido en la istoria. Djuntos kon esto kada vez ke se revelan informasiones a este sujeto eyas atiran muestra atension i a vezes kavzan una sierta sensasion porke en la manera de pensar de munchos de entre mozotros el domenio del poder politiko apartiene al ombre.

Entre el siglo 16 i el empesijo del siglo 18, a lo manko 4-5 mujeres djudias yamadas Kira djugaron rolos importantes grasias a sus atadijos kon la elita de las mujeres en el palasio otomano. A kavza de la identidad de sus titolo “Kira”, es probable ke se kreo una konfuzion entre siertos detalios de sus istoria. Estas istorias ke no fueron ainda aklaradas bastante mos interesan partikularmente no solo porke eran mujeres i djudias, sino tambien porke yegaron a sus altas pozisiones en un sirkolo de la sosiedad turka ke era de los mas misteriozos i peligrozos i onde la entriga, la kalomnia i el asasinato eran koza de kada dia en el palasio otomano.

La segunda por orden kronolojiko, i la mas famoza Kira, es Ester Handali, konosida komo Ester Kira. Su istoria fue el sujeto de un estudio del sinyor Gideon Shpigel ke eskrivio una biografia de Ester Kira, examinando al mizmo tiempo el rolo desizivo de la mujer en los echos del governo otomano en akeya epoka.


Segun Galante, el biervo grego “kyra”, un titolo popular ekivalente a “sinyora”, era uzado para damas distingidas i esta es la razon ke Ester Handali era konosida komo Ester Kira.

La istoria de Ester Kira

Ester Kira era la bivda de Eliya Handali, rabino, mediko i komersante. Kuando enbivdo eya era una mujer manseva, madre de tres kreaturas. Es probable ke el menester de mantener a su famiya la yevo a bushkar manaderos de parnasa, dezvelopando relasiones de komersio i amistad kon las mujeres del harem en el palasio. De esta manera eya yego a ser la djudia del palasio ke abastesia ropas, djoyas i objetos presiozos, era tambien konsejera de ermozura, i en kavzo de menester era komadre tambien.

Ester Kira se gano la amistad de la reyna-madre Nur-Banu i de la favorita del rey Murat III, la sultana Safiye. Las relasiones entre estas dos damas i Ester eran tan serkanas ke Ester fue al mizmo tiempo sus konfidente, sus reprezentante i sus servidora afuera del palasio. Eya estava al koriente de diversos sekretos de estado i sus atadijos kon el embasador de Venezia en Estambol i otras personalidades interesadas a obtener las favores del palasio ansi ke a su kapachedad en el kampo del komersio, le ayudaron a enrikeserse, a anchear su enfluensa i enfuerteser su poder.

Sovre la demanda de Safiye eya se enkargo de areglar kon el embasador de Venezia la liberasion de la mujer del governador de Aljeria, Hasan Pasha, ke avia sido kapturada por los venezianos en lo ke se topava sovre una nave turka. Grasias a su intimidad kon Safiye, Ester Kira pudo revelar al embasador de Venezia la existensia de una korespondensia direkta entre la reina de Fransia, Catherine de Medicis, i la Sultana Safiye, demandando la intervension de Safiye serka del rey Murat III, para obtener el ayudo de la flota otomana kontra la flota de Espanya, ke en akeyos tiempos estava en gerra kontra Fransia. Su injeniozidad i su kapachedad fueron tan grandes ke eya parvino mizmo a organizar a su kuento una loteria en Venezia, privilejio ke no era akordado entonses a personas ajenas. Ester intervenia, kontra paga naturalmente, para ke siertas personas resivan el derecho de rijir fermas i plantasiones agrikolas o para ser nombradas a altos postos del governo. Al mizmo tiempo avia obtenido el derecho de kovrar las entradas de la duana i uno de sus ijos era enkargado de akunyar monedas. Eya arivo ansina a arekojer una grande fortuna en moneda, djoyas i bienes imobiliares, lo ke no manko de krear a su deredor el selo i la inimistad ke fueron la kavza de su trajika fin.
Ofisieres del kuerpo militar sipahi (kavaleria), ensanyados a la vista porke Ester Kira no avia kumplido su prometa de azer nombrar uno de sus miembros al posto de komandante, la arestaron djuntos kon uno de sus ijos i los mataron kruelmente. Sus kadavres, despedasados i komidos por los perros fureon deshados dias enteros pudrirsen en la plasa del Ipodrom en Estambol, asta ke fueron kemados.

Esto afito durante el reyno de Mehmet III (1596 – 1603), kuando el Imperio Otomano estava ajitado por una kriza ekonomika i revoltas. El preteksto de la exekusion de Ester Kira fue la akuzasion ke avia menguado la kantidad de plata en las monedas kon las kualas eran pagados los salarios de los sipahis.

La ambision de Ester Kira i sus pretensiones no tenian limitos i en un sierto kavzo eya avia mizmo amenazado de uzar de su poder kontra el Bet Din Rabiniko para trokar una desizion de get en favor de una de sus amigas.

De otra parte eya apoyo las ovras de bienfezensia de su komunidad i finanso la publikasion de livros de ley. Kuando el kuartier djudio de Estambol se avia echo siniza, en el fuego de 1569, eya ayudo a las viktimas de esta dezgrasia.

Savemos tambien ke eya finanso, entre otras, la publikasion en Estambol del livro “Sefer Yuhasin” del famozo astronomo i istoriador Avraam Zacuto. Es posible ke sus relasiones ayudaron tambien a los atadijos de Gracia Mendes Nasi i de Yosef Nasi kon el palasio. Es kontado ke kuando, en segito al eskandalo provokado por una mujer djudia yevando una djoya muy valutoza, el rey Murat III avia ordenado en un momento de ravia de masakrar a los djudios del paiz, Kira uzo su enfluensa para konvenser al rey de anular su orden.

Las otras Kiras:

Segun lo apuntimos, a lo manko kuatro mujeres djudias fueron konosidas en esta epoka kon el titolo de Kira i se distingieron en el palasio real. Ke es la kavza ke eyas pudieron djugar un rolo tan importante? Afin de responder a esta kestion kale konoser el kuadro en el kual ovravan i las kondisones ke les ayudaron a lograr sus alkanses.

El periodo en el kual bivio Ester Kira es konosido komo el “Reyno de las Mujeres”. Kuando una mujer del harem paria un ijo al rey, su ambision era de ver un dia su ijo suvir al trono real.

La Sultana Hurrem (la famoza Roxana), favorita del rey Suleyman el Manyifiko, i despues la sultana Safiye, favorita del rey Murat III, yegaron a ver la realizasion de sus dezeo, ma solo despues de intrigas ke yevaron a la matansa de los otros ijos del rey. Esto mos eksplika la razon por la kuala, malgrado ke eran izoladas i enserradas en el palasio, sus poder era tan fuerte i efektivo.

Ansi es ke Hurrem reusho a konvenser al rey ke sea matado su ijo mas aedado i eredero del trono, Mustafa. Es grasias a esta intervension ke el ijo de Hurrem, Selim II, suvio al trono despues de la muerte de Suleyman. De la mizma manera ovro probablamente la Sultana Nur-Banu, kuando fueron matados los sinko ermanos de su ijo, el rey Murat III. La intervension de Safiye provoko el mas sangriente evenimiento en las luchas de rivalidad en la dinastia otomana. Eya ovro para ke sean aogados los 19 ermanos de su ijo, el rey Mehmet III, i las siete mujeres prenyadas del sultan ke venia de murir.

En estos tiempos eskuros de la istoria, kuando la ambision i el dezeo del poder no konosian limitos en sus krueldad, esta era la regla del djogo. Siendo sometidas a un orden de vida enserrado, onde el kontakto kon otros ombres era defendido, estas damas, para anchear sus sirkolo de enfluensa tenian menester de mujeres libres i kapaches, ke pudieran ovrar afuera del palasio. Al mizmo tiempo estas Kiras djugaron tambien, muy probablamente, un rolo de psikologo para las mujeres del harem ke oprimidas por la atmosfera de soledad, rivalidad i espanto en el harem del Palasio Real sintian el menester de dezbafar i de tener un apoyo moral.

1 comentario en «Sinyoras djudias en la ombra del palasio otomano»
  1. es interesante saber,de lo destacados que han sido la familia sefaradita, en momentos cruciales de la istoria umana,para apoyar a nuestra misma familia sefaradita,aunque yo hablo un ladino mas deteriorado pero si entiendo muy bien el ladino en su forma perfecta de hablar.

    Responder

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.


El tamaño máximo de subida de archivos: 300 MB. Puedes subir: imagen, audio, vídeo, documento, hoja de cálculo, interactivo, texto, archivo, código, otra. Los enlaces a YouTube, Facebook, Twitter y otros servicios insertados en el texto del comentario se incrustarán automáticamente. Suelta el archivo aquí

Artículos Relacionados: