El kastigo de ekskomunikasion, konosido komo herem, existia ainda en la edad biblika. Este kastigo se refera a la izolasion i al aleshamiento de la komunidad de una persona akuzada de aver kometido un krimen grave, partikularmente kontra la Ley o los dirijentes. El herem puedia turar de un dia fina toda la vida. Asigun el Talmud, era mizmo defendido de aserkarse de la persona kastigada i en la Edad Media las mezuras del herem puedian ser aplikadas mizmo a la famiya del kastigado.
Siertas personalidades famozas fueron el obyekto del herem, durante la istoria. Entre eyas puedemos sitar el Rambam i Spinoza. El herem kontra Rambam fue deklarado por los rabinos del Norte de la Fransia, achakes de su reluktansia a akseptar komo sertitud absoluta el kontenido de la Biblia. En segito, los rabinos avian mizmo defendido el uzo de sus ovras. El herem kontra Spinoza fue deklarado en Amsterdam, en 1656, kuando Spinoza era aedado de 23 anyos, por aver apoyado la investigasion rasionala i la libertad relijioza.
El herem fue uzado tambien entre los djudios del Imperio Otomano. En este konteksto, puedemos sitar dos kavzos ke enkontrimos en diversos manaderos. El primero es el kavzo del mediko David, ke avia sido engajado por la embasada franseza en Estambol, para provar el espionaje de Yosef Nasi en favor del Vatikan, la Espanya i otros enemigos del Imperio. Kuando este komploto fue deskuvrido, el herem fue deklarado kontra David i dos de sus ayudantes, por los rabinos de Estambol i por Yosef Karo ke se topava en Safed.
El segundo kavzo de herem fue proklamado en Estambol, en 1880, kontra David Fresko, el direktor del jurnal El Tiempo, por los dirijentes de la komunidad. La difuzion de ideas sekulares i progresistas por el jurnal era konsiderada peligroza por siertos sirkolos konservativos aserkados al Rabinato de la sivdad. Kuando, en los anyos 1880, David Fresko publiko artikolos kritikando las iregularidades finansieras del Gran Rabinato, i la manera de la kuala era rijida la komunidad, los interesados envizajaron obtener un dekreto del Sultan para enmudeser a Fresko. A la fayita esta inisiativa, el herem fue deklarado kontra Fresko, ma sin ke tenga un efekto konkreto.
El ritual
Sigun diversos manaderos el herem se promulgava kon un ritual partikular, en sonando el shofar en la sinagoga delantre del arko avierto. El lider de la komunidad prononsava maldisiones biblikas kontra la persona kastigada, mientres ke los miembros de la komunidad detenian kandelas pretas en sinyo de dolyo i se lamentavan. I kuando era anunsiada la proibision de todo kontakto kon el kastigado, las kandelas eran amatadas en tanto ke la ekspresion de esta prohibision.
Traemos aki, en este konteksto, un kurto rezumen de la deskripsion ke aze Joseph Nehama de este ritual (*)
La seremonia tiene lugar delantre de todos los fideles arekojidos en la sinagoga. Al lado de la Teva, en un lugar vizible por todos, se topa un serkolio, sovre el kual ay un gayo bivo kuvrido de un mantel i una odre(*) auflada. En su entorno, la djente kon lamparas, kandelas i kandelabres asendidos. El kulpavle esta en pies al lado del majistrato kargado de maldizirlo. Tiene en sus piezes un monton de siniza. En supito, en el silensio angustiozo de la djente atentiva, se oye la boz estridiente i sinistra del shofar. Pishin los figurantes se adelantan en amatando las lamparas i la kandelas, ahajandolas debasho de sus piezes, kevran el odre i matan al gayo en atabafandolo. I se oye la boz tenebroza del djudisiario ke proklama: “Si sos kulpavle ke tu alma se amate komo la flama de estas kandelas, ke tu reflo se arevate de ti komo el ayre de de este odre i ke mueras atabafado komo el gayo.” I adjusta la formulasion del herem: “Al nombre de la djustisia divina i umana, estamos ekskomunikando a…, ijo de…, i lo estamos maldןziendo porke… (la razon del kastigo); ke la maldision de la Ley kayga sovre su kavesa, ke el herem penetre komo un tosigo a las 248 partes de su puerpo.”
I afitava ke esta proklamasion era apezgada ainda mas kon la sigiente formula: “Ke sea maldicho de dia, ke sea maldicho de noche, kuando durme i esta espierto, kuando entra i sale. Ke la sanya del Eternel kayga sovre el i ke su nombre sea rayado de este mundo i del otro; ke su persona sea abaldada, separada de todos los trivos de Israel i aharvada de todas las maldisiones.” I la asistensia respondia: “Amen!”
Aparte ke el ekskomuniado era aleshado de la komunidad, le tomavan el tsitsit – simbolo de la fey – en arankadolo. No puedia entrar a la sinagoga, no puedia azer parte de un minyan. Dingun djudio no podia asentarse kon el, en su meza, ni podia servirse de sus tefilin i de sus mezuzot. Dinguno no puedia resivir de el sedaka i uzar sus livros. Sus ijos ke ivan a naser no eran sirkonsizados. Sus kreaturas eran aleshadas de la eskola. Aparte de sus parientes i sus servidores, dingun djudio no era permetido de vijitarlo ni de konsolarlo. Devia vistirse de preto i bivir en dolyo de una manera strikta. Le era defendido de trokar kalsados i vestimienta i de araparse. Si se muria en el periodo del herem no era enterado asigun la Ley: los rabinos i los fideles se abstenian de asistir a sus funerales; lo enteravan sin esped (elojio) i al lugar de un epitafio se metia a su tomba una piedra en su forma naturala. ke akodrava la lapidasion. Esta forma de herem, yamada herem mayor, era frekuente en sertas djuderias del sentro i del oksidente de la Evropa, ma su uzo en Saloniko era muy limitado, a la eksepsion del tiempo de la tempesta sabetaista. Fue uzado raramente kontra las erezias muy graves o kontra siertas rebeliones individuales.
Nehama kontinua en aziendo sovresalir la aktitud moderada de los responsables: “En jeneral preferamos prevenir al lugar de kastigar, i kuando somos yevados a aktivar los relampagos de la relijion, mos kontentamos kon las formas minores del herem, ke ya es bastante para ke los rabinos tengan el respekto de los fideles”.
Shamta, shemadta, shamata
Kon el tiempo fueron adaptadas dos formas mas livianas de este kastigo. La primera forma, konosida en tanto ke nezifa, era aplikada en reprimandando el kulpavle, ke rekonosia su delito i se arepentia. No implikava su izolasion forsada i se terminava de suyo despues de siete dias. La segunda forma konosida en tanto ke niduy, implikava una izolasion forsada del kulpavle durante 30 dias, i esta era anulada solo kon la desizion del Bet Din.
Asigun la Ensiklopedia Judaica, el herem i el niduy fueron konosidos en el tiempo del Talmud, kon el biervo arameo “shamta”, interpretado asigun su konsonansia en ebreo, komo ‘sham mita’, ke kere dizir “ayi la muerte” o, komo ‘shemama’, ke kere dizizir “izolasion absoluta”. De otra parte, mos fue komunikado por muestro amigo Yehuda Hatsvi, ke los sefaradis uzan en lugar de shamta el biervo shemata ke sona komo ‘shemadta’, “ke te destruygas, te destruites” siendo ke ‘shemad’ en ebreo sinyifika “destruksion”.
El shemata fue adaptado al turko en tanto ke “shamata”, ke es uzado por ‘bruido i tumulto’, aziendo aluzion a la orasion en el kal.
Kon el tiempo, el herem devino una reaksion abituala kontra las deviasiones i el non-konformizmo, konsiderados inkompatibles por la ortodoksia relijioza, i fue tan koriente ke kedo de impresionar i pedrio su influensa, sin ke sus restriksiones sean jeneralmente aplikadas por el publiko. De otra parte, el ritual de su promulgasion i los uzos de su aplikasion, konstituyen un fenomeno sinyifikante en la investigasion de la erensia tradisionala djudia.
(*) Joseph Nehama. Histoire des Israélites de Salonique, VI et VII, Communauté Israélite de Thessalonique, Thessalonique 1978, pp. 122-24.
(**) Outre, en fransez
Artículos Relacionados: