UN LUGAR MUEVO…
Mis Amigos i mis Amigitas keridas,
Ke mos viene al tino kuando se avla de la Suissa ? Los Alps! Estas montanyas ke forman la korona del viejo kontinente ? Lagos komo espejos, un vedre inkreyivle de abundansya, de luz, de ermozura, rikezas, hoteles komo en un suenyo, gente sivilizada, limpyeza, orden, kazas echas de biskochikos i chokolata komo en los kuentos de hadas, el ski, lo bueno ke se okupan de sus animalitos… las bankas ! Todo lo mas dezeado en el mundo ! SI ! Ma es el payis el mas karo del mundo i no todos se pueden permetir de bivir aya.
Muestra Mireille parese ke se enfasyo de vinir a muestro kafe virtual kon vista al Bosforo en Istanbul, mizmo si esta en una lokasyon alavada, i me eskrive ke kere ke tengamos un kompleks gigantesko para los Sefaradim, i los bnei anusim por seguro, porke son muestros ermanos ke sufriyeron muncho por kulpa de la enkizisyon… Ande ? Ni mas ni manko en la Suissa ! Komprendo, i tiene gusto por sierto la hanumika ma….. Komo ? Yo no so taaaaaan rika ! Muestra ijika avla de topar un Miliarder ke mos va finansar i mos va ayudar a fraguar este kompleks… Kon hotel, guertas, un lago, kazino, restaurantes, club para las kreaturas i los inyetos, komida kasher por seguro, una sinagoga i un lukso sin empesijo i sin fin ! Maraviya ! Si topa este miliarder ke mos va kayer de los sielos, ya esta bien ! Adoro la Suissa i no tengo dinguna objeksyon para el Monsieur ke Mireille va topar, si lo topa !!!! Ke vayan i ke fraguen komo lo keren… Yo, i los ke mos keren bien, azeremos muestras valizas i mos toparemos, todos endjuntos en muestro muevo sentro de lokuras ! Alora, i ke vozotros lo sepash ke se esta bushkando el riko miliardaire agora ! – I no kualker ! Uno ke se entyende de fraguas, de las ijikas…..Save divertirmos i konose ande se topan las bankas….
Mireille mos dize ansina : “Yo konosko este louar es en el Hotel Lavey les Bains ! No es lesho de la kaza de muestro amigo Moise Benezra ke organizo todo entre Geneva i Lausanne. Yo ago una propozisyon ! Ay todo, buffet yelado i kayente, sauna, massages …
Vesh ? Tanto simple ! Ay lugar, ay ken lo va azer chik chak, (sin mizmo salir de su kaza de Lausanne) vamos a topar el miliardaire esta noche mizmo i ya esta muestro sentro ! Bravo Mireille ! Adoro kuando todo se simplifika ansina ! Es a la gente ke le plaze komplikar todo!. Yo so egzaktamente komo ti i te dire una koza ? ES enteramente ansina ke los miraklos se realizan kuando mi Amigo en los Sielos kere una koza !
Ke estes sana i alegre siempre komo YO te kero ver !
“No ay de tener konfiensa en la rikeza…..Nunka ! Somos mas desnudos en la vida de kuando nasimos ”
Ken me va pueder eksplikar esta fraza ke nunka entendi i porke la disheron ! No se porke la letra de Mireille aki abasho me la akodro….
“El era muy riko komo munchos de Istanbul ! Se kazo kon una “pato” de Salonik, grande blonda i naiva… El kazamiento fue ekstraordinaryo. En las kayes de Haifa estavan paseando kon un “fiacre” (araba kon kavayo) i todos los estavan aklamando i echandoles aroz !
El Baron Hirsch se metyo a fraguar los Chemins de Fer Ottoman – los trenos en el Imperyo Otomano – en Samsun, en Aleksandriya,
un otro en Haifa….Todos estas sivdades eran Ottomanas. Kada vez ke le nasiya un ijo avriya otra linya… Su fortuna era kolosal ! Biviyan en un konak kon munchos esklavos, gizandero, dadas para los chikos, valets i butler !
Ma vinyeron los tiempos malos en 1908. La revolusyon serro todos los shantiyes (fraguas). Las entreprizas/kompaniyas del Sinyor no puediyan rezistir. Se les fue todo de la mano ! Se izyeron muy proves komo Job. A el le vino une depresyon i los chikos empesaron a lavorar por un pedaso de pan. Estos chikos jugavan kada noche KGB (!!!!) kon los bilyetos Rusos ke no teniyan mas valor !
Eran memoryas del pasado luksuozo ke aviyan bivido ! La mujer era maestra de eskola en Haifa. Aviya terminado el AIU en Salonika. En Galata moraron dospues en una kaza vieja i muy chika, delabrada… Ke es la vida ! -Mireille ”
[Sefaradimuestro] Los eskritos se sussedan tan rapido.
motreves to Sefaradimuestro
Keridos ermanos i ermanikas
Kuando vos esto meldando a todos tengo la impresyon ke esto en una grande karucha ke torna de ariva a basho komo el London Eye o en unos Luna Parkez ande moz ivamoz kon muestroz padrez. Pasaj de un subject a otro kon una rapidez !
Meldo siempre el eskrito de bienvenido ke me embiyo Sharope blanco i en mismo tiempo me demando si este kafe egziste veramente en Istanbul. Esta tan bivo delantre de mis ojos i komo lo disho Mihael Nahmani estos aniversaryos ke se estan fiestando son komo verdaderas. Kerida Sharope blanco yo nasi en Juillet 1 1940 a la data franka.
Felisitasyones a Erol Eliyezer por su aniversaryo oy. Ke fiestes siempre para alegriyas mi amigo i estos i munchos.
Mi Amigo Simon muy de djusto lo ke te eskrivyo muestra hanoum de Sharope ke tiene mucho sehel parese. Es ralo en una mujer de
saver de todo ansina i salir a bash kon todo i todos. Kola kavod le digo yo. Ke no manke de eskrivir tan ermozo. Hanumika yo ya meldi las episodas de tu livro Almendra ke me gusto de vedra muy mucho i agora esto asperando kon impasensia las ke mos vas a mandar aki i en tu otro grupo ke mos dates el link.
Estamos asperando los eskritos del kvod ha Rav Abraham por dospues de la muerte asigun muestra kreensya. La verda ke no se nada de esto i me keriya ambezar de kualo se trata porke tengo mucha konfiensia en muestro maestro, el ke todos estiman i keren mucho bien aki.
Felisito de korason los aniversaryoz de Judith Kohen la etnomusikologa de Canada i la Senyora Saul, maestra de pinturaz por sus pasadoz aniversaryoz i kero felisitarte dulse sharopika por tus poesiyaz tan ermosaz i de tu korazon ke kanta.
Kon amistad- Mosh Treves
Kerido Mosh, bienvinido al Forum.
No se deke tengo la impression ke sos un poko shovinisto ? No es un problem ! Yo adoro los shovinistos para mostrarles ke las mujeres son las flores de la humanitad, la ermozura, la dulsurya, lo interesante i lo ke ay de mas INTELIJENTE ! Si tienes la impresyon ke las mujeres no tienen bastanto “sehel”/meoyo es porke estuvites en kompaniya de mujeres MUY ENTELIJENTES ke no kijyeron ke sepas ke karar de kapaches ke son ! Ayyyyyyyyyy mi madre bendicha ! Akeyas son muestras maestras ! Pensa bien i veras ke tengo razon !
Muestro kafe es virtual de vedra ma no es ke no kijyera ke tengamos uno asemejante komo te lo deskrivi en mi eskrito ! Ke maraviya iva ser ! Un kafe en medyo del mundo komo la SUISA por egzemplo, para el mundo Sefaradi, kasher i luksuozo, kon todo justo kon munchos etajes i hotel ande se avla solo el espanyol sefaradi, kon konsiertos i konferansas i egzibisyones i kantones literaryos, kantones relijyozos, kantones de juego i salas kon komputadores, salas de sinema, teatro i reprezentasyones, klasas de lingua i grammer, salas para ambezarse la muzika sefaradi i kantar, los bayles ets. Salones de fiesta i de balo i de anivarsaryos i de bodas…..Un komplex gigantesko kon el sentro de los livros en Judyo i las publikasyones de prensa i virtuales tambien. Seriya el mijor suenyo de mi vida ! Me asentariya allado de una lumbre kolorada, una tasa de te en la mano, un gatiko en mis piernas i eskrivyendoooooooo las maraviyozas istoryikas ke mi kavesa inventa ! Lo bivo en mi miente i GAM ZU LE TOVA ! I esto vale! Una soriza para ti.
Artículos Relacionados: