Dinguno muere de tristesa
Ni el amor tambien mata
Ansina avlan falso o vedra
Ma ke pensar de los versos ?
Dizen ke pena d’amor no dura
Si no se ve un tiempo se olvida
Kero kreyerlos, amo la vida !
Si tal es porke no amahan mis yoros ?
Oyi, demandates por mi
Te aze pena lo ke sufri !
No lo saves ke yo me muri !
No me kayintan tus biervos…
Flores i palomas te plaziyan
La mar, los rios…te arrebiviyan
Tu boz amava, tus rizas me enkantavan
No bivo mas kuando estas leshos !
No, no es ni un yerro ni un revolto
Solo yoro… Arrepintido ? No lo esto !
Miro i miro al sielo i tengo friyo…
No te kero dospues de bezos ajenos..
Alora… Ke mal es mi dolor ?
Porke me siento sin respiro, sin kalor ?
Una fotografiya me soriye kon amor
Miradas mintirozas bolan komo pasharos….
No, no kero ke meldes mis poemas
No kero ke sepas de mis lagrimas
No te mostrare mi pena i mis amarguras
No mereses ni mi amor ni mis karesyas !
Anjelo de la noche del payis de inyeves
No puide darte mi alma para ke te la yeves
La kastiges a tu plazer i me salves….
No me valen mas ni dudas ni enganyos !
Artículos Relacionados: