Los nombres propios de persona en el reflan djudeo-espanyol son, en la mas grande parte de los kavzos, nombres djudios, ke se pueden divizar en dos kategorias:
- Los nombres de personajes biblikos i istorikos, ke aparesen en pasukes tradusidos literalmente o libremente, o en “rekordos” biblikos o istorikos.
- Nombres, ke vienen inisialmente de personajes biblikos i istorikos, ma ke entraron en la lista de los nombres uzados por los djudios, i a los kualos se apegaron konotasiones algunas vezes fiksas i otras vezes pasajeras.
Naturalmente el reflan kon el nombre djudio i la situasion biblika o no, viene aplikado a varias situasiones de la vida de kada dia.
Las ekspresiones atadas a la Biblia son numerozas i tienen demenester de pokas eksplikasiones. Abasta sitar unas kuantas d’eyas para entender. Azerse del Mordehay se topa en todos los lugares ladino-avlantes i kere dizir: azerse komo si no se esta sintiendo o entendiendo. En Yerushalayim tiene una variante: Mordehay (o Modrohay) me yamo. Las Pensadas de Aman o de Para son pensadas negras. Los Males de Paro son naturalmente las makot de Ayifto. Los Anyos de Metushelah son un muy grande numero de anyos. Si una koza es De Antiohos zmani, (Del tiempo de Antiohos) es ke es de un tiempo muy muy viejo. Korah es de una negregura tan grande, de vinir komparada a la de Amalek. Komo de fakto se dize: Korah, ermano de Amalek. Yermia el marido, Yermia la mujer son un kuple ke se va keshando kontinualmente. La mula de Pinhas, ya se save ke no va ni adelantre ni atras. La Kaza de Eliau Anavi o de Avram Avinu o de Moshe Rabenu es una kaza ande ay siempre musafires.
Veremos agora reflanes veros i propios ande aparesen derechamente muestros Padres. Dize el reflan: Todos vinimos d’Adam, para amonestarmos ke semos todos echos de karne i de sangre i no ay personas mas altas de las otras. I en otra koza semos mizmos: Todos pekan, i Moshe lo izo. I si lo izo i Moshe ke fue el mas perfekto de todos los djudios, ken semos mozotros? Dunke podemos konsolarmos!
Para exortarmos a akontentarmos de lo ke tenemos, el reflan mos trae de muevo a Moshe komo exemplo, diziendo: Akontentose Moshe kon la parte ke le dio el Dio. Komo de fakto Moshe no pudo entrar a Erets Israel, malgrado ke tanto lo dezeo, i no se kesho. De otra parte no kale nunka dezesperado en la vida, porke Si Moshe murio, Adonay kedo. Moshe era umano i tenia de murir, mientres ke el Dio es eterno i va vinir siempre en muestro ayudo.
Otro reflan mos konsola en muestras flakezas, diziendo: Aun Shimshon por su mujer kayo, aludiendo a la traision ke le izo Dalila. Shimshon, para los djudios, es el simbolo no solo de fuersa sovreumana, komo vemos en el reflan: En ora de peligro el ombre es Shimshon, ma simboliza i la vengansa, mizmo a kosto de su vida, komo vemos en el reflan: Muera Shimshon kon kuantos son i no son.
Simbolo de sakrifisio vano, indjusto i sin apelo es la ija de Iftah. Dizen los reflanes: Ben kah uven kah guay de la ija de Yitah i Ben kah uben kah, bolo la ija de Yiftah, ekspresando presizamente la situasion biblika, (respektivamente: Shoftim, XVI, 30 i Shoftim, XI, 35). Estos reflanes tambien sierven de komparezon a situasiones aktuales o de karakter diferente.
Kuando a uno se le promete una koza i el deskuvre demaziado tadre ke lo enganyaron i le dieron otra en su lugar, se dize: Le aprometieron a Rahel, le dieron a Lea, de la famoza situasion biblika, ande Yaakov Avinu se topo kazado kon la ermana ke no keria (Bereshit, XXIX, 25), en lugar de la ke amava.
Sitar todos los reflanes ke kontienen nombres djudios es emposivle. Vamos a dar aki solo algunos exemplos, komo: Si riyo Yuse, no save porke, o Estirate Issahar, si keres despozar, o Todo tiene Shimshon, solo le manka sarna i sarampion, ande es klaro ke fue la rima a empozar el nombre deskojido.
Otras vezes ay razones biblikas ke dan el nombre del reflan, komo las dichas sovre Hana, la pensadera i Yermia, el yoron, ke ya mensionimos mas ariva. Deke Menahem tiene un rolo poko simpatiko en el reflan no riushimos deynda a deskuvrirlo. Komo de fakto dize el reflan: Menahem el korkovado, echa la piedra i eskonde la mano.
El klasiko nombre del djudio sefaradi es Moshe, ke puede vinir deformado en Moshiko i Mushiko, Moshon i Mushon. Reflanes ke tienen a Moshiko komo protagonista ay munchos i varios. Si se avla de un haragan, se dize: En ke se la va al tiyo Moshe el dia? En kitar i sakudir la barva. Kuando se avla de uno ke es tanto negro, ke nada lo puede trokar, mizmo el ir a ziyarar, se dize: Moshiko se fue a Safed, mas negro vino de lo ke se fue, i Moshiko se va a Livorna, si negro va, mas negro torna. Por terminar el kapitolo de los nombres propios djudios, sitaremos el reflan ke ekspresa un amor ke tiene manifestasiones tan exajeradas, ke mos meten en sospecho: De tanto ke te kero bien, Moshiko, ke te kito el ojiko.
Artículos Relacionados: