Tengo un korason ke te ama i por ti late ,
Sin saver si tengo este derito de amarte,
En mi esfuenyo te kareso,siento tu respiro
Te bezo kon ardor i oygo tu triste suspiro.
****
La noche esviyozo i el dia kon kadenas,
Tu nombre en mis lavyos i tu sangre en mis venas.
Te djuro mi mundo i mi rikeza sos tu sola,
Kon tus miradas mi alma siempre se konsola.
****
No tengo koraje de dizirte lo ke yo kero
Konsernando mis dezeos ,mi amor verdadero,
La vida me se apezgo empeso a kansarme,
El dia ke tu boz no puedra mas alkansarme
Si avriran mis parparos en mi reflo d’alkavo
Veran tus lindos ojos i tu nombre en mi bafo.
La tierra kuvijara mi sekreto de flama,
Mi alma bolara en el entorno de tu alma.
Acerca de Haim Vitali Sadacca
So nasido en el 11/9/1919. En el 1990 me travi de mi negocio por el amor de mis ijos. Hacia importaciones de grasa i de productos chemicales para fabricacion de jabon de los Estados Unidos durante muchos anyos. En mismo tiempo era reprezentante de una factoria en Italia que hacia machinas para hacer jabon.Disde anyos ke mis dos ijos bivian con sus familias el uno en NY Long island,i el otro en Montreal. Mi esposa i yo empisimos a bivir 5 mezes en el Canada, 3 mezes en Florida y 4 mezes en Istanbul. Ay 22 anyos ke tenemos esta vida,para gozar de las affecciones de nuestros ijos y nietos.Disde mi chikes ke me plasia la literatura,eskrivia poesias en Turko,en Fransez, i en Judeo-Espanol. Este hobby me da una enerjia en esta edad avansada.Antes 2 anyos la Foundation for the Advancement of Sephardic Studies and Culture New York, publico mi livro\Un Ramo De Poemaskon lastraductiones echas en Inglez de parte de David Fintz Altabe, y lo regali a esta organizacion. con la pensada ke puedeser dare una mano a la reanimacion de nuestro Judeo/Espanol(Ladino) ke avlamos los sefaradis en Turquia y en muchos paises.
Su poezia triste me izo verter lágrimas!! Keremos salvar muestra lingua presioza! Presioza poezia!