Diario Judío México - Saludes i anyada sivil buena para todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Por empesar, vos akodro ke el proksimo atelye de konversasyon de Vidas Largas se tendra el martes 17 de janvier, a las dos i medya, en el Centre Communautaire. Estos atelyes son avyertos a todos, venid munchos.

Vos akodro tambyen ke agora las emisyones de Radio J se pueden oir por internet sovre el sityo de Radio J, de toda manera en direkto, i en vezes despues…depende del tekniko.

http://www.radioj.fr

Mi amigo Renaud Souhami no tuvo el tyempo de ir al kavo de la emisyon ke le aviya aparejado sovre Régine Skorka Jacubert. Oy no tengo el tyempo, ama kon bueno eskaparé esta emisyon el djueves proksimo.

De la misma manera, i por manko de tyempo, no vos avlaré oy de Pierre Barouh, ke se muryo estos diyas. De el tambyen avlaré al otro djueves.

I agora ke 2016 ya mos s’eskapo, i komo a mi uzo desde unos kuantos anyos, vino el tyempo de akodrarmos en djuntos de las 38 emisyones ke vos ize durante este anyo 2016. Los ke son interesados de topar el teksto de mis emisyones lo podran (salvo dos, la del 10 de marso ande tuve una entrevista en franses kon Alain de Toledo, i la del 10 de novyembre, ke fue aparejada i meldada por mi amigo Renaud Souhami) indosen sovre los sityos de Ladinokomonita (por esto kale ser myembro i bushkar los files a mi nombre Edmond Cohen) o de eSefarad (i tambyen aya bushkar los eskritos a mi nombre).

Esto dicho, la primera de mis emisyones de 2016, el 7 de janvier, fue para azer, komo oy, la rekapitulasyon de mis 34 emisyones de 2015.

El djueves de despues, 14 de janvier, vos avli de Rabbi Moshe Almosnino, famozo haham selanikli del siglo 16, ke no fue solo un grande savyo en teologiya, ama tambyen un grande kapo de komunidad, ke se fue a Estambol en 1566 para obtener del sultan Selim, ijo de Suleyman el Magnifiko, mijores kondisyones para los Selaniklis, i despues de travar muncho yesurin, las obtuvo.

Los dos djueves de despues, 21 i 28 de janvier, vos avli de Moshe Dayan, i me kaliya tomar dos emisyones tanto este ombre nasido en Erets djugo un rolo importante, no solo militar ama politiko tambyen, antes i despues del renasimyento del Estado.

El djueves de despues, 4 de fevrero, ize mi emisyon sovre el kantador i aktor amerikano Frank Sinatra, nasido syen anyos antes, i ke era grande amigo de los djudyos i de .

En la misma emisyon, vos avli despues de los djudyos de Mexico. Komo ya lo savesh, me plaze ambezarme, a poko a poko, – porke antes de avlarvos de kualkyer koza, tengo menester en primero de ambezarmela – la istorya i la situasyon de los djudyos de kada parte del mundo. Solo desde 2008, ize emisyones sovre los djudyos (en el orden alfabetiko) de Algeria, Argentina, Bayonne, Bukhara, Bulgariya, Corsica, Crimea, Espanya, Etyopia, Fransya, Ingletyerra, Italya, Libya, Persa i Iran, Portugal, Praga, Rhodes, Sud-Afrika, Ukranya, Zante.

El djueves de despues 11 de fevrero, vos avli del grande eskrivano yidish Sholem Aleihem.

I el djueves de despues 18 de fevrero, vos avli del terrivle kampo de Sobibor, ande fueron matados unos 200.000 deportados, ama ande uvo una rebuelta djudiya el 14 de oktovre 1943 ke izo 11 muertos por la vanda de los nazis (9 SS i 2 ukranyanos). 9 SS puede pareser poko, ama no eran mas de 30, lo ke kyere dizir ke este diya los SS pedryeron el tyerso de lo ke eran. 42 djudyos reusheron de salvarsen bivos, todos los otros fueron matados. Uvyeran sido matados de toda manera.

El djueves de despues 25 de fevrero no ize emisyon, porke era okupado por las dos seremoniyas, una en Paris el 21 de fevrero, la otra el 24 de fevrero en Herepian, en el sur de Fransya, ande fueron dadas post mortem las medayas de Djustas a dos mujeres kristyanas ke me guadraron i eskondyeron, no solo a mi, ama tambuen a mis padre i madre i otra famiya djudiya de tres personas.

El djueves de despues 3 de marso, konti lo ke fueron estas dos seremoniyas, muy diferentes la una kon la otra. La seremoniya en Paris era enteramente organizada por djudyos: Yad Vashem, el memoryal de la shoah, la Embashada de . A la kontra, en la seremoniya en Herepian, siguro ke aviya tambyen un reprezentante de Yad Vashem i la Konsul de en Marsilya, ama en sima la seremoniya fue organizada kon la sivdad de Herepian, su mayoriya, i las administrasyones del departamento del Herault i mismo de la rejyon Languedoc Roussillon. A parte de esto, en Paris uvo solo la desendyente de mi Djusta, kuando en Herepian los desendyentes de la otra Djusta (una ija i un alay de inyetos i bizinyetos) enchiyan la sala de komemorasyon.

El djueves de despues 10 de marso, la emisyon fue en franses porke arresivi a Alain de Toledo, prezidente de la asosyasyon “Muestros Dezaparesidos” ke vino para avlar del livro memoryal ke se esta aparejando para selebrar le memorya de los 5.200 djudeoespanyoles deportados de Fransya. Oy en diya el livro dainda no esta pronto porke deve de ser una ovra kompleta i sin dingun yerro istoriko. Kon bueno va salir en unos kuantos mezes.

El djueves de despues 17 de marso avli del kantador Serge Gainsbourg ke veniya de morir el 2 de marso, i despues de famozas mujeres djudiyas, por egzemplo las ke obtuvyeron un premyo Nobel.

No ize emisyon el djueves de despues 24 de marso, por modo ke la radyo teniya menester de mi tyempo de avla para la fyesta de Purim.

El djueves de despues 31 de marso, komo aviya echo el anyo de antes, ize en onor de la fyesta de Purim una meldadura del Meam Loez, esta vez el komentaryo por Rafael Hiya Pontremoli del pasuk 10 del kapitulo 6 del Livro de Ester, ande vemos el rey Ahashverosh ordenar a Aman, ke era venido para demandarle la muerte de Mordehay, a la kontra de apresurarse de azerle todos los onores ke Aman el mismo aviya propozado pensando a el mismo.

El djueves de despues 7 de avril, avli de Meir Dagan, kapo del Mosad, de Imre Kertesz, djudyo ungarezo i premyo Nobel de literatura, i de lo ke eskrivyo en Turkiya una mujer del partido de Erdogan despues de un atentado kontra turistos israelyanos, dezeando ke se mueran los firidos…

El djueves de despue 14 de avril, ize una emisyon mas personala, avlando de mi papu i mi vava de la vanda de mi padre.

El djueves de despues 21 de avril ize una emisyon en memorya del grande Joseph Nehama, a kyen devemos, entre otras ovras, su Istorya de los Djudyos de Selanik, en 7 volumenes, i su diksyonaryo del Djudeo espanyol, ke es mas de un diksyonaryo i se aserka muncho mas de una ensiklopediya.

El djueves de despues 28 de avril no pude zer emisyon por modo de Pesah.

El djueves de despues 5 de mayo, despues de avlarvos de la aktrisa de sinema Ronit Elkabets, de Walter Kohn, premyo Nobel de kimika, i de Martin Gray (el ke eskrivyo En nombre de todos los miyos) ize mi emisyon, bazandome sovre un lavoro de mi amiga Angèle Saül, sovre la shoa ke aharvo a una sivdadika serka de Paris yamada Champigny-sur-Marne.

Los dos djueves de despues, 12 i 19 de mayo, vos avli de Itshak Shamir, ke fue uno de los kapos del Grupo Stern i munchos anyos despues se topo ser Primo ministro del Estado de .

El djueves de despues, 26 de mayo, ize una emisyon intitolada Unesco, ONU i , ande avli de la rezolusyon del Konsejo Egzekutivo de la Unesco ke voto el 16 de avril (kon el ayudo de la Fransya) una rezolusyon kondenando . Sin ir asta defender esta rezolusyon, dishe ke asigun mi la Unesco no disho lo ke los Israelyanos i los djudyos del mundo la akuzaron de tener dicho.

El djueves de despues 2 de djunyo, avli del istoryano Fritz Stern, i despues meldi dos traduksyones ke yo teniya echo de dos poeziyas de Victor Hugo, la una intitolada El Sapo, i la otra Despues de la Bataya. Estas dos poeziyas, eskritas verso 1858, azen parte del mismo livro, La Leyenda de los Siglos.

El djueves de despues 9 de djunyo, avli del avokato Chauveau-Lagarde, ke no solo fue kon muncho koraje el avokato de la reyna Marie-Antoinette en 1793, ama fue tambyen este mismo anyo 1793 el avokato de los djudyos de Alsace, en medyo de la Terror. Chauveau-Lagarde el mismo la kurtareo de baldes, syendo ke fue aferrado i echado en prezo para ser djuzgado por el Tribunal revolusyonaryo, lo ke keriya dizir kondenado a muerte, ama fue olvidado en prezo! Agora me ambezi ke tambyen defendyo en 1826 a tres pretos kondenados a las galeras, i los salvo. Meldi su defensa: ke maraviya…

El djueves de despues 16 de djunyo, avli de los djudyos i el sport, i amostri kuantos famozos kampeones djudyos uvo en la istorya, afillu si los djudyos son mas konosidos por sus premyos Nobel ke por sus premyos olimpikos.

Los dos djueves de despues, 23 i 30 de djunyo, avli de djudyos i omoseksualidad, una kuestyon ke no es kolay porke tenemos una kondenasyon de la omoseksualidad por el Livro Vayikra, i ke yene agora los hahamim en jeneral se amostran kontra la omofobiya, afillu si el haham Sitruk, ke fue Hahambashi de Fransya, se inyervo kontra la Gay Pride en Israel, lo ke izo muncho patirdi entre los hahamim.

Dos mezes me tomi de vakansas en enverano, i abolti a mis emisyones el djueves 8 de septyembre, para avlar del aktor Gene Wilder, i de los vapores de Cherbourg, kon la istorya de un zabit franses ke no solo ayudo a los israelyanos, ama despues se kazo kon una djudiya, se konvirtyo al djudesmo, i agora bive en Israel kon su mujer.

El djueves de despues 15 de septyembre, avli de los avyones vendidos por la Fransya a Khadafi en los anyos 1970, i komo un franses yamado Gabriel Aranda lucho kontra esta vendita, penso de tomarme komo avokato i al kavo no se izo.

Los dos djueves de despues 22 i 29 de septyembre vos avli de Sebastian de Romero Radigales, ke fue konsul de Espanya en Atena i ograsheo para salvar unos 500 djudyos de nasyonalidad espanyola de la deportasyon por los Almanes. Kuando digo ke ograsheo, no fue kon los Almanes. Fue kon su propya admistrasyon espanyola ke tuvo de luchar, syendo ke la Espanya no keriya alevantar ni un dedo para salvar 500 espanyoles djudyos de la muerte.

El djueves de despues 6 de oktobre, avli de Shimon Peres, ke lavoro vida entera para su pais ande no nasyo: Israel. Eskapo por ser prezidente del Estado i muy respektado, komo se vido kuando se muryo.

El djueves de despues 13 de oktobre avli de Haïm Arlozorov, syonisto i pasifisto ke muryo asasinado a 34 anyos. Asta oy no se save kyen lo mato. Su muerte fue una grande pedrita para los pasifistos, los ke pensavan posivle de topar una solusyon pasifika al konflikto djudeo-arabo. Una partikularidad de Arlozorov: fue el amante de Magda Behrend, ke fue a su lado en el syonismo, antes de kazarse kon un syerto Joseph Goebbels, i, en 1945, de matar a sus sesh kriaturas i de matarse eya misma por amor para el Fuhrer Adolf Hitler.

El djueves de despues 20 de oktobre, eskapi de avlar de la muerte misteryoza de Arlozorov, i despues dishe unos kuantos byervos sovre Pierre Tchernia, i avli tambyen de Bob Dylan, ke vyene de obtener el premyo Nobel de literatura.

El djueves de despues 27 de oktobre avli de los djudyos de Ingletyerra, ke no son leshos de ser 300.000, la sinkena komunidad djudiya del mundo.

I el djueves de despues 3 de novyembre, vos ize una meldadura del Meam Loez, kon una istorya kontada por Yaakov Huli sovre Rambam i un doktor ke era selozo de el, esto a propozito de la lucha de Avram kontra 4 reyes para liberar a su sovrino Lot ke eyos teniyan aferrado.

El djueves de despues 10 de novyembre no so yo ke ize la emisyon. Komo yo me topava abashamyentado i ronko, demandi a mi amigo Renaud Souhami de aparejar una i de dizirla, lo ke izo este diya, avlando de la enfermyera Thea Wolf, djudiya almana ke lavorava en el oshpital djudyo de Alexandria entre 1932 i 1947. Pudo ayudar djudyos almanes fuyendosen de Almanya en 1939 de salir del vapor ande estavan retenidos i de yevarlos a otro vapor para la Palestina ande pudyeron irse malgrado el mundo entero ke era kontra eyos.

El djueves de despues 17 de novyembre, ize una emisyon intitolada Unesco de muevo, sovre la mueva rezolusyon votada el 16 de oktobre por el Konseko egzekutivo de la Unesco kontra Israel, a propozito, entre otras kozas, de Yerushalayim.

Los dos djueves de despues 24 de novyembre i primo de desyembre, ize mis emisyones sovre la amistad entre personas de relijyones diferentes, en partikolar entre kristyanos i djudyos i entre Muzulmanes i djudyos, i avli de las asosyasyones ovrando en Fransya en favor de esta amistad.

El djueves de despues 8 de desyembre, ize una emisyon sovre tres personas ke veniyan de morir poko antes, dos djudyos, el ombre politiko i muzikante Lionel Stoleru, el dezenyador Gotlib, i de un ombre ke no era djudyo, kijo dizir Fidel Castro.

El djueves de despues 15 de desyembre, me topava hazino i mi amigo Souhami el tambyen, dunke no uvo emisyon. Pasaron una redifuzyon (mi sigunda emisyon sovre el konsul Radigales, la del 29 de septyembre) ke oyi de mi kama.

El djueves de despues 22 de desyembre, yo era yene hazino, ama Souhami se sentiya un poko mijor, i el es ke meldo una emisyon ke yo aviya aparejado sovre una mujer rezistante i deportada en Auschwitz, Régine Skorka Jacubert.

El djueves de despues 29 de desyembre, yo teniya de yevar mis inyetizikos a ver Peter Pan al teatro, i kaiya djusto a la ora de mi emisyon. Souhami se aviya ido en vakansas. Ke azer? Ize pasar mis inyetizikos antes de vozotros, keridos oyentes, i pasaron la redifuzyon de mi emisyon del 9 de djunyo sovre Chauveau-Lagarde. I ansina se eskapo un anyo 2016 de radyo.

Al djueves ke vyene, si kyere el Dyo!

.

No hay comentarios

Leave a Reply

Artículo anteriorPara Trudy, la verdadera Ana Frank no era más que una chiquilla sobreprotegida y bastante pesadita, (En Inglés)
Artículo siguienteEl Maestro Pérez, el nuevo Klezmer de Xicohtzinco, Tlaxcala
Sobreviviente de Auschwitz marcado por los nazis con el número 151752 Parte de mi vida en Bélgica : Instituto Agronómico de Gembloux 1941 : durante el último trimestre 1941 Escuela de horticultura de la Ramée, siendo su Director Haroun Tazieff de 1941 a 1942 Arrestado por la Gestapo el 1° de Marzo 1943, detenido en el campo de concentración de Malines y deportado el 19 de Septiembre del mismo año Repatriado a Bruselas en Abril 1945 Entre 1947 y 1948, estudios académicos de Ingeniero Químico en la Universidad Libre de Bruselas : Tesis: Síntesis del Anetol (12 páginas) Esta tesis la escribí en memoria de mi añorado papá David NESSIM SEPHIHA Z’l, muerto en Dachau a fines de Abril 1945. A él quien nos fabricaba nuestro raki. Realizaciones en Francia Jefe de laboratorio en el instituto Químico de la Ciudad de Rouen (1948-1951) Secretario de la Sociedad Lingüística de París Obtuve una licencia de lengua española en la Universidad de la Sorbona Fui diplomado en hebreo y yiddish : los diplomas correspondientes fueron otorgados por ENLOV Diploma de Estudios Superiores Doctorado de 3er ciclo Diplomado de l’École Pratique des Hautes Études – IVème section (Escuela Practica de Estudios Superiores) Doctorado del Estado Profesor emérito de Universidades (Catedra de Djudeo-Espanyol, ENLOV, Nueva Sorbona e Instituto Martin Buder, U.L.B., Bruselas) Profesor de conferencias (Catedra en Albert Albert Benveniste y en la Universidad de Lisboa) Presidente de Honor del Centro Cultural Djudeo-Espanyol Al Syete Presidente de las Asociaciones VIDAS LARGAS y J.E.A.A. Presidente de Honor de la Asociación « Muestros dezaparesidos » Talleres Djudeo-Espanyols de 1969 a 2010 +Emisión “Muestra Lingua” en la estación radiofónica 94.8 de 1981 a 2006 que fue confiada después a Edmond Cohen Obtención de la Medalla “Vermeil” de la Ciudad de Paris en 2013 Brasil : Espaço Sefaradi Judeo-Espanhol “Profesor Haïm VIDAL SEPHIHA” Museo Judaico de Rio de Janeiro 201 Nombrado Caballero de la Legión de Honor en Abril 2016 Espacio Haïm VIDAL SEPHIHA en la Sinagoga Don Isaac Abravanel, el 19 de Noviembre 2017 Pueden escribirme a la dirección siguiente  [email protected]