Un artista Franco-Djudio de munchas fachas Herbert Pagani

Por:
- - Visto 310 veces

Un tiempo avia en la televizyon israeliana un programa de RAM EVRON ke se yamava Ze ha-Zman. En uno de estos programas vide la entrevista kon el poeta Fransez-Djudio-Sefaradi Herbert Pagani ke estava de pasaje en Israel.

A penas pasaron 2 mezes, en el mismo programa, mostraron un kurto pasaje de la misma entrevista ke Ram Evron termino kon la palavras “Zihrono livraha”. Estuve en shok!   Este poeta, muzikante, eskultor, pintor, kantante ke estava en kamino de una fama internasyonal, teniya solo 44 anyos.

Herbert Pagani nasyo el 25.Avril.1944 en Tripoli, Libya. Su verdadero nombre era Avraam Hadjadj, ma en la administrasyon kolonial italiana, el fue notado komo Herbert Pagani.


Anyo i medyo después su nasimiento, los parientes divorsaron i Herbert fue desplasado komo un djugete de aki aya, kuando kon el padre, kuando kon la madre. El padre lo plaso  en diferentes pensiones en la Almanya i la Austria, i la madre ke se instaló en Milano, vendyo toda su djoya para poder siguir su ijo en diferentes paizes. De sorte ke Herbert, desde su chikes, sufrio las konsekuensas de una animosidad konjugal i sembolizo el “Djudio errante” viajando entre la Fransa, la Suiza, l’Almanya i la Italia. En uno de sus poemas el eskrive:

Fui deportado de eskola en otel,
Vide solo estasyones komo dekor de Noel.
Asperi vente anyos para naser
Los brasos en la ventana
Del kalendaryo.

A la edad de 7 anyos, Herbert entro al College Saint-Germain-en-Laye en Fransa. El avlava el Italiano i el Alman, ma no konosia ninguna palavra en Fransez. Ma, en kurto tiempo, el mostro su talento por las lenguas i se izo amigo de todos.

Trokar tantos paizes i enkontrar diferentes kulturas en esta chika edad no era koza fasil. Herbert bushko su propia lengua para expresar sus sentimientos. El empeso a desinar. Desinar, era para el, el solo kamino de expresarse sin kitar una palavra de la boka. Desinar era el solo idioma ke ningunos puedian interrumpir.

A la edad de 20 anyos, Herbert avre su primera expozisyon de sus desenes i eskulturas en la galería Pierre Picard en Cannes.

La ultima klasa del liseo, Herbert la pasa en el kolej amerikano ‘Shape’ onde el krea una serka amistad kon Anne-Marie Rousselot, ija del famoso poeta fransez Jean Rousselot. Este poeta será el padre spiritual de Herbert. Al lado de Rousselot, Herbert deskuvre los pensamientos de Marx, de Nitsche, de Freud, apresya los versos de Rimbaud, Verlaine, Beaudelaire i sovre todo su preferido Victor Hugo.

Un dia, Jean Rousselot, viendo ke Herbert no desho livro ke no meldo en su biblioteka, eskrive un artikolo en la revista “Planete” kon el titulo “Un visionario de 20 anyos: Herbert Pagani.”  En este artikolo, Jean Rousselot deskrive el talento del joven Herbert Pagani kon palavras impresionantes.

Una semana después de este artikolo, el redaktor de esta revista invita a Pagani i le demanda de lavorar en su revista. Pagani empesa a desinar en esta revista ma seguro ke lo ke el era pagado no le abastava. Esta vez, bushko a expresarse eskultando sovre todo modo de material ke el topava: karton, papel, tavla, plasik, piedra…

Malgrado estas okupasyones, Herbert sintia ke una koza le faltava. Se fue a Milano i se echo en los brasos de su madre. Eskrive Pagani : “Despues de 19 anyos de adolesensia, deskuvri mi chikes.”

En el universo katoliko, en sus desplasamientos de un país al otro, el Judaismo fue su segunda kultura. Ma esta sensasyon de ser minoritario lo atormentava siempre. En 1969 por la primera vez, Herbert viajo a Israel kon su madre. Aya tenia 49 primos i primas. Meldaremos una partida de sus empresyones:

Delantre del Muro de Lamentasyones, empesi a yorar. Sinti entre mi el pezgo de la istorya djudia. Sinti ke yo sufri 2000 anyos i ke enfin yegi a mi tierra.”

Kuando torno a Milano, Herbert enkontra Annalena Limentani, amiga de su madre, senarista anti-fashista bien konosida en el mundo de sinema.

Annalena entendyo ke Herbert era yeno de ideas, ma era komo una roketa ke bola sin ninguna direksion. Annalena lo toma a su lado, i a su kultura Franko-Italiana, adjusta la kultura inglesa onde Herbert deskuvre los versos de Shakspeare. En esta kollaborasyon, Herbert se ambeza muzika i empesa a kompozar kansiones i poemas.

Aunke sus ovras tomaron parte en exibisyones en Milano, Ferrera i Paris,  desinar i eskultar no era bastante para Herbert. El eskrive : “Kero gritar! Konfrontarme kon el publiko! Desinar sovre los korasones! Kero ser amado i libero!”

La vida era dura, ma Herbert nunka se deskorajo. Un dia, Herbert eskrive una letra de 15 ojas a Jacques Brel en Beljika, ke el estimava muncho. Ma Brel avia divorsado i trokado de adereso. Su divorsada mujer, meldo la letra i oyo la kaseta ke akompanyava la letra. Tanto le gusto ke Mme. Brel mando la kaseta al editor de su ex-marido, en Italia. Esto fue el empesijo de su profesyon komo kantante.En un kabare de Milano, el empesa a kantar kansiones traduisidas i adaptadas de Brel, de Leo Ferre, de Piaf i también sus propias kompozisyones.

Kualo eskrivia Herbert en sus poemas? Todo lo ke el via en las kayes: los lavorantes… los estudiantes…la provedad… i esto no gustava a las autoridades. Para eyos Herbert era un komunista i las puertas de la Radio Italiana devian ser serradas a este anarshisto.

Ma, la Radio Montecarlo no estava del mismo avizo. Radio Montecarlo era independiente. No solo invito Herbert para ke kante sus kansiones, ma también para ke remplase el prezentador ke les mankava. Malgrado ke Herbert no tenia ninguna experiensa en este kampo, aksepto esta oferta.

Durante 4 anyos, Herbert Pagani en el mikrofono de Radio Montecarlo, prezento kon grande reushidad muevos diskos, konto anekdotas i no peryo la okazyon de kantar también sus kansiones.

En 1967, Pagani publiko su primer álbum de kantikas en Italiano i en 1970 su segundo álbum de kansiones en Fransez. Las kuviertas de los álbumes, Herbert las desinava el mismo.

Era el tiempo de la gerra de Yom Kipur . Miles de mansevos se estavan muryendo en el fronte. De muevo, Pagani siente en su korason la pena de su rasa, de su puevlo i eskrive el poema “La estrea de oro”.

Era un prove kazalino
Ke lavorava desde anyos
Su chiko, muy chiko kampo
De safra i de piedras kuvrido
I su chika vinya de kuatro ramos
Debasho del sol.

El partajava su tiempo
Entre su Dio i sus kreaturas
Entre su kampo i sus orasyones
I no tenia ke un solo trezoro
Una estrea de oro.

Un dia, kudyando sus uvas
Vido vinir sus vizinos
A su frontiera en kavayos.
Vido briar sus espadas grandes.
Les demando “Keresh agua?”
Le respondieron “Keremos tu tierra!”

“En kualo vos molesta mi kampo?”
Le respondieron “Basta ! Vate d’aki!”
El toma su livro de orasyones,
Toma su mujer i sus kreaturas
I su estrea de oro.

Ansina partio el kazalino
Traversando las noches del tiempo
En bushkidad de una tierra.
“Mis brasos son fuertes i koraje tengo
Akseptare mismo lodo i balsas.”
Ma lo ke el topo fue solo barrieras.

“Tu no sos d’aki! Tienes aksento estranyo!
Azete merkader o prestador.
Ma no tengas nunka tierra,
No ay ke fiarse en tu trezoro
La estrea de oro.”

No teniendo kampo de trigo
El se metyo a kultivar
Su chiko kampo ariento su kavesa,
Se aze eskritor i después mediko
Profesor i violonista
Poeta, pintor o savyo.

“Estas aziendo ruido, vendiendo ayres !
Sos danyozo al ken se aserka de ti,
Tienes munchas ideas i muncho dinero
Sovre tu aldikera kuziremos
Tu estrea de oro.”

Viene el tiempo de los grandes kasadores
Kon  sus armas i perros,
Era una verdadera fiesta.
Demandales a los buenos kasadores
Komo es mijor de matar la bestia
Kuando sovre su korason se ve la estrea.

Muestro buen kazalino
Peryo su mujer i sus kreaturas,
Despues su korason i su meoyo.
No le kedo nada mas
Ke su estrea de oro.

Alora traverso la grande mar
Para enkontrar su tierra.
Ke remedyo? Era o esto o enforkarse!
“Vendedme atrás mi viejo disierto.”
Le respondieron “Saves? Te kostara muy karo!
“No m’importa, lo merko.”
Le respondieron “Puedes tomarlo!”
No lavoro mas ke una vara en la tierra
Ke una fuziyada de leshos se sintió.
El se kaye en el polvo,
Sangre en la tierra,
I en su frente
Una estrea de oro.

En 1973 Pagani aze un filmo dokumentario de 27 minutos ke el nombro: “Venezia, Amore mio!” Este filmo bazado sovre dokumentos de la televisión italiana, fue deklarado por la UNESCO el mijor dokumentario sovre el peligro onde se topa Venezia i sus ríos.

Ma, la mas grande ovra de Herbert Pagani era sin duda la sola opera ke el eskrivyo: MEGALOPOLIS bazada sovre la ovra del futurólogo Roberto Vacca. En esta opera Herbert no se kontento solo de muzika i de kantes, ma profito también de toda la teknolojia moderna i inkluyo djugos de luz i de lazer.

La reushidad de Megalopolis fue tan grande ke el Ministerio de Kultura Fransez avrio el Palais de Chaillot renovado, kon esta opera. Megalopolis gano el intereso no solo del publiko ma también de todos los kritikos  i es ansi ke fue akordado el grande premio de la Akademia Charles Cros.

La televizyon franseza no puedia kedar indiferente a tanto bruido ke izo Megalopolis i a su kreador Herbert Pagani. Un dia, el renomado direktor de la televizyon franseza Jacques Chancel propoza a Herbert de venir azer un programa en la Antenne 2.

Herbert no pensó muncho para okupar este posto importante. Ma tenia una kondisyon: keria meldar un teksto ke el eskrivyo kuando las NASYONES UNIDAS deklaro en 1975 ke el Sionismo es rasizmo. Esta deklarasyon de las Nasyones Unidas lo irrito tanto ke Herbert no se pudo detener de eskrivir este poema ke el intitulo “Plaidoyer pour ma patrie!” (En defensa de mi patria!)

Bien ke este kanal de televizyon era a-politiko, Jacques Chancel aksepto esta kondisyon i le dyo 2,5 minutos de tiempo. Kuando aparesyo en el ekran, Herbert izo “fait-accompli” i meldo durante 4 minutos, un minuto para kada 1000 anyos de la historia djudia.

Kualo eskrivyo Herbert ke se sintió muy firrido de la desizyon de las Nasyones Unidas?

Me esforsi de traduisir este teksto sin ke el perye de su fuersa:

EN DEFENSA DE MI PATRIA

11.Noviembre.1975!

Ayer estava en el Metro. Oyi dos mujeres avlar, la una dizyendo: “Vites los Djudios otra ves kon sus konsejas en las Nasyones Unidas? Ke djente irritante!”

Es verdad! Semos irritantes. Ay siglos ke irritamos al mundo. Esto es muestra natura. Kualo keresh? Avraham kon su Dio uniko, Moshe kon sus tavlas de la ley, Jezu Kristo kon su segunda kara siempre pronta para ser aharvada, después Freud, Marx, Einstein, todos fueron irritantes  revolusyonarios, enemigos del orden.

Por ke razón? Porke ningún orden, en ke siglo ke  sea, no puedia kontentarlos. Porke eyos fueron siempre exkluidos!  Kuestionarse, ver mas leshos, trokar el mundo para trokar su destino.  Esto era el destino de mis ansestros. Es por esta razón ke eyos fueron siempre aborresidos por los defensores de todos los ordenes establisidos.

El antisemita de la Derecha reprosha a los Djudios de aver echo la revolusyon bolshevika. Es verdad! Avian munchos Djudios en 1917. El antisemita de la Siedra reprosha a los Djudios de ser los proprietarios de Manhattan. Es verdad! Ay munchos kapitalistas Djudios. La razón es muy simple! La relijion, la kultura, el ideal revolusyonaryo de una parte, los kuentos de banka de la otra parte, son las solas valores transportavles, las solas patrias posivle para akeyos ke no tienen patria. I agora ke existe una, el antisemitismo esta re-nasyendo de sus sinizas. Pardon, de muestras sinizas. I esto se yama anti-sionizmo! Se aplika a las personas, se aplika a una nasyon.

Israel es un Getto! Yerushalayim es Varsovia! Los Nazistas ke mos entornan avlan el Arabo i si la kruz gamada se degiza en kresiente, es para mijor engañyar los siedristas del mundo entero.

Yo ke so un Djudio de la Siedra, no tengo nada de peryer. Yo refuzo una Siedra ke kere liberar todos los humanos del mundo al kuento de un sierto nombre de entre eyos. Porke i yo so uno de eyos!

Si la Siedra me kere entre eyos, eyos no pueden inyorar mi problema. I mi problema es ke desde las deportasyones Romanas del primer siglo, fuimos rondjados, manchados, desonorados, denunsiados, kemados i konvertidos por fuersa.

Por ke? Porke muestra relijion era peligroza. Seguro! Unos kuantos exemplos?

El Djudaismo fue el primer a krear  el Shabat, el dia del Sinyor del Mundo, el dia de repozo obligatorio de la semana. Seguro ke esto no iva plazer a Paro ke siempre tardava de terminar las piramidas.

El Djudaismo prohíbe el esklavaje. Vos puedesh imaginar la sempatia de los Romanos, los mas grandes merkadores grosistos de lavoro debaldes de la antiguidad!

En la Tora es eskrito: “La tierra no apartiene al ombre, ma al Kreador.” De esto sale una ley: Una tierra no se  puede dominar mas de 49 anyos. Puedesh ver el efekto de esta ley sovre los Papas de la Edad Media i los fundadores  de imperios de la Renesans?

No!  No kaliya ke el puevlo supiera!

Empesaron kon la prohibisyon de la Tora. Despues paredes de kalomnias ke se yamaron Getto. Despues la inkizisyon, kemar sovre las lenyas i mas tadre, las estreas amariyas.

Auschwitz es solo un exemplo industrial del jenosidio. Avian mas miles de jenosidios artesanales. Puedo kontar durante tres días toda la epoka d’Espania, de Rusia, de Polonia i de la Afrika del Norte.

A fuersa de fuyir, el Djudio se fue a todas las partes, ma el no apartiene a ninguna parte. Entre los puevlos semos komo huérfanos.  No! No kero mas ser adoptado! No kero mas ke mi vida dependa del humor de mis proprietarios! No kero ser un sivdadino lokatario. Ya me enfasyi de chaftear a la puerta de la historia i asperar ke me digan de entrar. Yo entro i avlo!

Esto en mi kaza, sovre la tierra! I esta tierra es mi tierra! Esta tierra me fue prometida  i la promesa será realizada.

Kualo es el Sionizmo? Se puede rezumir en una sola fraza: Al anyo ke viene en Yerushalayim!

No, esto no es un  slogan del Club Mediterranee. Esto esta eskrito en la biblia, el livro el mas muncho vendido i el mas mal meldado del mundo. I esta orasyon se izo un grito! Un grito ke tiene mas de 2000 anyos.

El padre de Columbus, de Kafka, de Proust, de Chagal, de Einstein i mismo de Kissinger, todos repitieron este grito una vez al anyo, el dia de Pesah.

Alora? Es ke el Sionismo es rasizmo? No me agash riir. Es ke “Fransa, dulse país de mi chikes” es un kante rasista?

Sionismo es el nombre de una lucha de liberasyon. En el mundo, kada país tiene sus Djudios. Los Fransezes tienen sus Bretones, sus imigrantes, sus Korsikanos; los Italianos tienen sus Sisilyanos; los Yankees sus pretos; los Espanioles sus Vaskos. Mozotros semos los Djudios de todos.

A los ke me demandan “I los Palestinianos?” les respondo “Yo so un Palestiniano de 2000 anyos. So el opprimido el mas viejo del mundo.” Yo diskutire kon eyos, ma no les vo dar de mi lugar.  Ay aya bastante lugar para dos puevlos, dos nasyones. Las frontieras se determinaran endjuntos. Ma la existensia de un país, no puede nunka exkluir la existensia del otro. I las opsiones politikas de un governo nunka kestionaran la existensia de otro governo.

Dunke, porke Israel?

Kuando Israel será afuera de peligro, eskojere entre los Djdios i los vizinos arabos, los ke son ermanos en las ideas. Oy, devo solidarizarme solo kon los mios, mismo los ke detesto, kontra este enemigo ke es el RASIZMO!

Descartes no tenia razón kuando disho : “Yo pensó, dunke yo existo.”

No kere dizir nada! Mozotros ay 5000 anyos ke pensamos i ainda no existimos.

Yo me defendo, dunke yo existo!

Este texto era también un mesaje a los intelektuales de la Siedra ke asta nuestros días no paresen ke trokaron de idea.

Vos puedesh imajinar la kuantidad de letras i teléfonos ke Herbert i la direksion de la televizyon resivieron el dia siguiente? 70% de estas letras estavan felisitando i alavando Pagani i seguro ke 30% lo estavan arebashando kon expresiones fanatikas.

Kon este programa Pagani yego al máximum de su karyera. Despues de 12 anyos de lavoro duro, sufriensas, golpos, Pagani topo enfin lo ke bushkava i estava orozo.

Ma, asta kuando?

Ya dishimos ke esta grande reushidad de Pagani no estava gustando a todos. La reaksion la mas negativa vino de la direksion de la televizyon misma. Herbert Pagani se estava viendo komo una persona peligrosa. Todas sus kansiones eran agora sensuradas. Pagani, namorado de libertad, no puedia mas kontinuar en esta fonksion ke el tanto keria.

Herbert  torno a sus viejas okupasyones: desinar, eskultar, krear figuras de tavla i de todo modo  de material ke la djente no emplean mas. Ansina expliko Herbert su  okupasyon: “Estos viejos materiales representan para mi el puevlo Djudio. Un tiempo, mozotros también eramos muevos. Serviamos a todos. Despues fuimos empleados, mos envejesimos i fuimos echados de una parte. Ma las valores ariento de mozotros no se peryeron. Si lavoramos ensima, podemos salir en medyo i servir la humanidad en muevas formas. Kon una sinyifikasyon mueva, podemos salir en frente de todos komo una ovra mueva.”

Herbert Pagani era modesto i sinsero. El no se iva a los cocktailes onde la djente azen komplimentos i se bezan kon la bevyenta en las manos. Ma, el no mankava los konsertos-gala de sus preferidos kantantes komo Brel, Mouloudji, Barbara, Brassens i Piaf.

Herbert era el solo sionista invitado regularmente a las resepsiones del partido komunisto de Fransa.

Herbert era siempre entornado de amigos. El dizia: “Puedo bivir sin pan, ma no sin amigos!” El kantava en las kazas, entre los mansevos, en las reuniones de partidos, porke el pensava ke los ¾ de este publiko no tenían dinero para merkar sus diskos. El se averguensava de ver ke la muzika era konsiderada komo un produkto de lukso komo perfumes.

Ken era el publiko de Pagani?  Los estudiantes, los profesores, los lavorantes. Todos vinian no solo para oyirlo kantar, ma tambien, para diskutir. El uzava asperar en su kamareta después su programa para resivir akeyos ke kerian expresar sus opiniones. Siertos dizian ke sus poemas los ofendieron i siertos al kontraryo, ke les gusto muncho. Entre eyos avian siempre Arabos, Portugezos, Italianos i Djudios.

Herbert ya saviya ke el no puedia gustar a todos. El dizia: “ Gustar a todo el mundo es gustar a ningunos.” Herbert keria gustar a todos sin renunsiar a su voluntad de expresar sus pensamientos a boz alta. “Yo no so fonksionaryo de la kantika!” diziya Herbert.  “Yo prefero reushir mi vida, mas ke reushir en la vida!”

Me akodro de akeya entrevista en la  televizyon israeliana onde Herbert Pagani mostro una eskultura sembolizando Yerushalayim, kompuesta de pedasos de tavla ke el arekojo en el bodre de la mar en Tel Aviv.

La ultima fraza ke el disho en la entrevista kon sus ojos briyando fue: “Aki me siento mu orozo porke esto diziendo todo lo ke pensó. Esto expresando mis sentimientos i esto aziendo todo lo ke kero.”

Herbert Pagani kayo hazino de una lesemia fuerte. Bushko su remedio en los Estados Unidos. En el hospital West Palm Beach, el 16.Agosto.1988 Herbert Pagani serro sus ojos para siempre.

Lo ke tenia era solo 44 anyos. Herbert se espartio muy presto i rápidamente komo una estrea volante, ma mos desho en su erensya “Una Estrea De Oro.”

Nesim Guvenish
2.Oktobre,2017
Salon de Ladino, Bet Avot Recanati

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.


El tamaño máximo de subida de archivos: 300 MB. Puedes subir: imagen, audio, vídeo, documento, hoja de cálculo, interactivo, texto, archivo, código, otra. Los enlaces a YouTube, Facebook, Twitter y otros servicios insertados en el texto del comentario se incrustarán automáticamente. Suelta el archivo aquí

Artículos Relacionados: