Un Djesto Inolvidable

Era elevo ,apenas tenia kinze anyos,
Su kara triste,su vistimienta de vyejos panyos,
Kaminava para vender kozas a kriaturas,
Bonbones,djugetes,balas,lapes i minyaturas.
****
Desde su chikes ke kedo sin arimo,sin padre,
Biviya una vida modesta djuntos su madre.
Un dia se sintyo kanso,sin fuersas , fatigozo,
Estava komo hazino,abatido sin gozo.
****
Kaminava debasho de akel sol muy kayente,
Las kayes eran asoladas,no seviya djente.
Vido una mujer en su puerta trikotrando,
En vez en kuando a los pasharos migas echando.
****
Kon su timidez se aserko i kon su boz kalma
Tuvo el koraje i le disho lo de su alma.
“”Senyora,esto kansado,siento muncho la kalor
Puedo rogarle un vaso de agua por favor ? “”
La mujer kompasiva,kon su korazon humano
Le ofresyo vaso de leche i torta kon su mano.
La rengrasyo de alma kon sus ojos de lagrimas
Estuvo muy tokado de sus palavras,mas i mas.
****
Los anyos pasaron muy presto,la mujer humana
Bivia sola, sin marido, i sin una ermana.
Estando en peligro de muerte,la transferaron
A un hospital de otro territorio la mandaron.
****
La sensya de la medisina s’apliko en eya,
En su kama siempre dormiya en kolor de tea.
Radiografias,tomografias,operasyones
Dias i noches sin avrir los ojos , kon passiones.
****
Despues de semanas se salvo de sus agonias,
Retorno a su salud de antes i sus alegrias.
Le trusheron la faktura antes de su salida,
Se sintyo un golpe enorme,su kara palida.
La suma komo sifuera una fortuna era,
Kon su boz tembloroza konto su situasyon verdadera.
“”No se preokupe por el pagamiento Senyora,
Deve kudyarse para estar saludoza….porke yora?
El Profesor Mayerson mos eskrivyo una nota
Ke su pago hue echo kon vaso de leche i torta.””

Photo by LaPrimaDonna