MONHOS I MONHAS
Las relijyones tuvieron siempre un poder muy grande, en munchos kavzos destruktores, ensima de las populasyones porke nunka se puediya vinir kontra las personas “sakradas” del espento del kualker dio i la fuersa del “sakrado” ke puediya kondanar a la muerte mizmo, dizyendo ke se kometyo “pekado” o “esto es la voluntad del dio/diosa ” i otras munchas razones asigun sus religyones. Estos dioses i diosas teniyan sus templos i los monhos i las monhas (komo los monhos budistos agora) adoravan, serviyan i guidavan las personas en las orasyones, las fiestas i las ofrandas…. Eran dedikados a sus templos i no se kazavan. Las mas nombradas son las monhas “Vestal” ke teniyan de alimentar el fuego dentro del templo sin desharlo amatar. Sakrifisyos humanos lo mas de mansevas virgen se davan a este fuego “sakrado” i komo se puede endevinar, toda manera de korupsyon era muy koryente.
Kon el kristiyanizmo i malgrado ke yegios al siglo XXI dayinda, malorozamente, un grande pekado a los ojos de la humanitad i de Di-o ke disho “Vos bendigo -Multiplikavos i inchish la tierra komo las estreyas del sielo i la arena al bodre de mar” se esta kometyendo al nombre de la religion eskrita por los hombres…. Esta dayinda defendido por los saserdoses, monhos i monhas de akumplir una de la mas importantes mitsvas en kazandosen primero porke deven prokrear i segundo porke Di-o mos kreo marido i mujer para ser unos, unidos fina la fin de muestra vida. El voto de castidat de una persona, mizmo si fue echo inisyalmente, sera kuaji imposivle de ser respektado visto ke es kontra la natura, el dezeo del hombre i kontra la voluntad de Di-o. Malorozamente sigue siendo una kostumbra pagana ke fue tomado de los puevlos idolatros de la antikitad i kon una ideya absolutamente falsa de azer el “super-bien”, kastigarse de todas las maneras para ser “mas kerido i estimado de la parte de Di-o” komo lo dizen los fransez “etre plus royaliste que le roi”!!!! , lo ke por seguro, no puede ser la entisyon del Kriador. Estos aktos del “super-bien” lo notamos en todas las relijyones, a vezes en las dietas mizmas ke trayen la anorexia, en el islam ke tapa las mujeres enteramente, los profesores ke kastigan demasyado sus elevos (era una desgrasya antes !) i en muchos otros kavzos ke a mi me dan ganas de travar mis kaveyos ! – Komo estos barvudos vistidos de preto kon chapeyo de samara !!!-
En viendo situasyones tan tuguertas vengo a demandarme ke enorme diferensya entre la era de la teknolojiya avansada i las kostumbres medievalas i mizmo mas antiguas….. No no…. Esto deve trokar por el bien de todos, la paz en el mundo – si se va a tan leshos ! – i la sanedad de la miente…. Mi humble manera de ver las kozas….
Diyas buenos kon alegriya ke tengash…
Artículos Relacionados: