El tio Konorte vino komo musafir onde su sovrina Matilda. No kere dicho el resivo ke lo aresivieron, la suvrina i Moiz su marido, ke no lo avian visto desde munchos anyos. Mizmo las kreaturas lo enkontraron kon kara alegre porke les trusho una chokolatika.
Malgrado la estrechura le dieron la kamareta buena i komo es la regla lo kombidavan i a komer. Las demanyanas se iva al charshi, tornava oras de medio dia, komia i se echava a repozar. Las noches despues de senar, pasava la ora kon alguno de los vizinos o se enserrava en la kamareta para echar un ojo en el jurnal.
Ansina pasaron 15-20 dias sin ke los balabayes puedan entender la razon de su musafirlik i kuanto tiempo iva turar. Moiz se empeso a inyervar. I en verdad, ke grasia de musafir es este ke aparte del dezrepozo ke les esta dando, no se demanda de ande esta kitando este mansevo para azer idare de karne i fruta, en tal de no echar en verguensa la kara de la sovrina.
Razonado ansina Moiz le dize a Matilda:
– Este tio tuyo ya me vino asta la nariz! Tienen razon la djente kuando dizen ke peshkado i musafir son dos dias, al treser ya se fiede.” I komo de no vinirle al tino a este benadam ke ya mos dio enfasyo! Dike no toma i se arremata!?
– Pasensia – le respondio Matilda – tio me se topo, a la kaye no lo vo echar! Ya eskapara su echo i se ira.
Ma los dias pasavan sin ke el tio Konorte se diera por sentido. Komo en los dias ke pasaron, el segia su program, trayendo de vez en kuando una chokolatika para los krios.
Moiz estava adeta un grano materiozo. Una noche le dize a la mujer ke amanyana le va reventar la fiel de este tio achileado, ke ya les desho la savor en la boka: ke se alevante i ke se vaya de onde vino!
Matilda le rogo ke no aga tal.
– Mijor seria – dize – de djugarle algun djogo, komo ke marido i mujer mos estamos kitando los ojos. Esto sigura ke no keriendose azer shaet de esta mala vida, se va alevantar i se va ir.
A la mediodia, despues ke el tio Konorte se entro a la kamareta para repozar, Matilda i Moiz se miraron kon ayre de burla i el djugo empeso.
Kon grande sanya Moiz se metio a gritar diziendo sovre la mujer las mil leyes i se echo mizmo enriva para aferrarla de los kaveyos.
Defendiendose Matilda abolto una siya i dio un rimpushon a la meza. Entre el ruido i la sanya del marido eya echava gritos desferensiados i a la fin grito dezesperada:
-“Tio Konorte, ke venga i ke me salve!!”
El tio Konorte salio de la kamareta i viendo la sena se les metio en medio i les disho:
-“En echos de famiya yo no me enmelesko! Marido i mujer sosh, avenidovolo entre vozos! Lo ke me kedo de estar aki son otros dos mezizikos i en este interval vos rogo no me dezrepozesh!”
Artículos Relacionados: