De su chikes ke no hue de karakter selozo
copasDe rikezas i de famas nunka ambisyozo,
Siempre era kontente de su bivyenta normala
Tenia una distensya kon la djente de gala.
Se sintia triste, si via un malorozo,
Si su vizino era kalmo piedria su gozo.
Ombre de alta kultura,kerido de su famia
Garnido de una alma de malisyas vazia.
Su benevolensya no se savia,no se via,
Amavle,sonriente,a un savyo paresia.
Siempre peno en ovras en su edad avansada
El plaser azia olvidar su vida kansada.
Despues de anyos este ombre tan respektado
No hue de ningunos bushkado ni konsiderado.
En su aparensya se via su melankolia
Bivia una vida triste fin a ke un dia
Lo toparon al lado de su botelya de vino;
Durmiendo por siempre,esto hue su negro destino.
Acerca de Haim Vitali Sadacca
So nasido en el 11/9/1919. En el 1990 me travi de mi negocio por el amor de mis ijos. Hacia importaciones de grasa i de productos chemicales para fabricacion de jabon de los Estados Unidos durante muchos anyos. En mismo tiempo era reprezentante de una factoria en Italia que hacia machinas para hacer jabon.Disde anyos ke mis dos ijos bivian con sus familias el uno en NY Long island,i el otro en Montreal. Mi esposa i yo empisimos a bivir 5 mezes en el Canada, 3 mezes en Florida y 4 mezes en Istanbul. Ay 22 anyos ke tenemos esta vida,para gozar de las affecciones de nuestros ijos y nietos.Disde mi chikes ke me plasia la literatura,eskrivia poesias en Turko,en Fransez, i en Judeo-Espanol. Este hobby me da una enerjia en esta edad avansada.Antes 2 anyos la Foundation for the Advancement of Sephardic Studies and Culture New York, publico mi livro\Un Ramo De Poemaskon lastraductiones echas en Inglez de parte de David Fintz Altabe, y lo regali a esta organizacion. con la pensada ke puedeser dare una mano a la reanimacion de nuestro Judeo/Espanol(Ladino) ke avlamos los sefaradis en Turquia y en muchos paises.
Artículos Relacionados: