Keridos amigos,
Vengo a demandarvos de dar un poko de atansion a un proyekto importante ke konserna a muestra kultura sefaradi.
Komo ya lo savras, en el Bet Avot Recanati se fondo el “Sentro del Patrimonio de la Djuderia de Salonik i Gresia” i tambien se estan elaborando planos para adjuntar en el lugar otras mas komunidades orijinarias del Imperio Otomano.
En el kuadro de este sentro, se sujirio de inaugurar una sala espesial, dedikada a la kultura del Ladino. En esta sala tomaran lugar evenimientos i tadradas de kultura; tambien sera avierta al publiko para ojear i meldar livros en ladino, ansi komo obtener livros, diskos i suvenires relasionados a muestra erensia del ladino (en mayor parte, los ke no se topan a venta en ningun otro lugar).
Tambien sera buena idea de perpetuar el nombre de Aharon Cohen z”l, el ke fue durante 10 anyos el direktor de la Autoridad Nasionala del Ladino), i yamar a su nombre esta sala ke se intenta a konstruir.
La Autoridad Nasionala del Ladino, ansi komo la famiya de este estimado ombre, akseptaron imediatamente, a kontribuyir i dar donasion para este buto. El Sentro Ladino al nombre de Salti, de su parte, apoya kon plazer kualker inisiativa en el kampo de muestra lengua.
Mi apelo personal a vos, amigos, es de konsiderar vuestra posibilidad de adjuntarvos kon buena veluntad al sirkolo de los donadores, para realizar la dita notable idea.
Los ke keren donar de los U.S.A. pueden azer sus donasiones “tax-deductible” mezo FASSAC. Para resivir el adreso, vos rogo de adresarvos a Rachel Bortnick, Ladinokomunita.
Sinseramente,
Selim Salti
Artículos Relacionados: