Una kayente, una yelada

Oy tengo una konseja ermosa. Eskuchame.

No kero konyorarme, kesharme, ni kero echar kulpa sovre dinguno, no me agrada mauyar, ma mi elmuera, me esta kitando loka, i de vez en kuando me ayuda ande prime o no prime. Siempre una kayente, una yelada.

Munchas vezes me kombida a su kaza. Bueno, me visto fostán “comme il faut” i yavash, yavash – avagar avagar – me meto en kamino. Ke me kanso un poko, lo puedes entender. Un dia en avriendome la puerta, kualo veyen mis ojos.!!!!!.En el sentro del salon en un sesto, asentado sovre una kolchika, un top preto, kon dos mantchas blankos sovre las orejas, kon ojos mirandome i meneando la kola de alegria,. Un perriko chiko, una ermosura, ke del premier momento me agrado. Me aserki, lo tomi en mis brazos, lo aregali ,le avli i el aziendo se ke me esta eskuchando. En un poko de tiempo mos izimos amigos. El kito su alguenga, toko mi mano i mi kara, después salto abasho, empeso a kudurear al derredor mis kalsados, i yo espontáneo fui forsada a djugar kon el.

“Ya estuve segura, ke te va plazer”, esto oyendo la boz de mi elmuera.

“Pensimos i pensimos i mos desidimos ke tu sos la unika persona kon korazon , a la kuala puedemos entregar “esta djoya” solo por dos semanas, kuando vamos partir en las vakansas.” .Memuarayo ¡!! me estan aziendo maytap i ¡!!!!

Fue demudada , me fue imposible de romper el hatir de mi elmuera i demas no keriendo bozearle la alegria del viaje, arekoji el sesto, alevanti el perriko i presto tomi el kamino para ir me a kaza.

Lo nombri Djoi. Fina agora el perriko emprestado bive ande mi.

Komo rekompansia mi ijo, Leon i mi elmuera me yevaron a la Turkia. Eyos alegres i yo kontente. Me boyadiyi los kaveos, me merki fostán muevo i partimos. Me asentaron en el avión, yo kon mi fostán muevo, muy demodé (todas las mujeres kon pantalón) ma muriendome de espantó.

En vezes, el personal del avión mos dan agua, Coca Cola o bira.

Yo komo persona bien edukada, siempre digo “ Thank you”.

Leon salto i me dize “Mama, estamos en un aeroplano Israeli, dize “Shalom, Toda Raba”. Yo, me se enfinko en el meoyo “Thank you” i en la altura ke estamos viajando no se dizir otra manera.

Fina la Turkia tuvimos un viaje reposado, muy regular, ma al retorno, el aeroplano – fue komo una kuna. Bueno ke estuve akavidada i aparejada para semejantes situasyones, sinon iva akonteser una malor. A la retornada, demesmo resivimos agua, Coca Cola, bira. En akel momento me akodri lo ke diziya mi ijo i yo esta ves por no dizir bavashadas – dize “Shalom, Toda Raba”. De muevo salto Leon i me dize: “Mama, estamos en un aeroplano Turko, dize “Thank you!!!!”. Me están shashiriando enteramente. Ma de una vez los muvimientos del aeroplano me están azyendo mal. Ya me esto desmayando.

Viene mi elmuera, mete su mano en mi mano i me dize:

-”Mama, no keres salir un poko afuera, tomar aire fresko.”

……. Estamos en el aeroplan ande me keren kitar……….