Diario Judío México - Ke dulse es el sentimiento
De aletar el bebiko, bezarlo
I pasar kon el horas,
Olvidando todo,
Para kontarle historyas
Mirarlo durmir kon kalmo
Aserkandose de su lado
Travar el jugette
Para no dezrepozarlo,
Kuvijarlo kon su mantika
Para no espertarlo
Para ke no syente friyo
En su esuenyo….

Ke dulse felisitad es oyir
Kuando de su bokita chika
Empesa a dizir
“Mam mam ma mama”
Mas i mas vezes
Alora ke nasyo en Roshashana
Solo antes unos kuantos mezes…

Kuando viene de la eskola
Ayudarlo en sus lisyones
Ambezarle los sielos i las mares
Las plantas i las kolores…
Ir endjuntos al sinema,
Kaminar en las kayes
Riyir komo lokos
De mil kozas i kuentizikos
Peleyarmos por shakas, de nada,
Komo si yo era
Kreatura dayinda !

Ke dulse alivyo es
Kuando aparese afuera de la guerta
Alora ke esto arrimada
A mi ventana estrecha
Para pasar la hora
I asperarlo kon pasensya

Los diyas tienen alas, bolan !
Los anyos a los anyos se adjuntan
Guadran los rekuerdos
Unos ermozos, otros amargos
La sal dayinda esta en mis ojos…

Mos buraka la espartisyon
Letras van i vienen sin eskapasyon…
Las fotos se amostran kon admirasyon
Porke no oygo sonar mas i mas el telefon ?

Ke loka alegriya es
Toparse dospues de tiempos
Kon bezos i abrasos
Demanyanadas o tadradas
De savor de grandes fiestas…
Ma… Muy presto pasan las horas
Ke doloroza tristesa es akel momento
Kuando en el mizmo aeropuerto
Se tiene de espartirse de muevo….

Ke dulse orgulyo era
Akeya demanyana del Lunes
Kuando se kumpliyeron mis orasyones.
Kaminar en la Universitad
En sus salas i en sus parkes
Ver tus amigos i tus profesores
Estar entera soriyendo a tu lado
Kuando sos tu ke me toma la mano.
Detener el diplom tan dezeyado
Attado kon un ruban kolorado !
Selebrar este diya kon shampanya
I akompanyarte fina la puerta
Para ir a este maraviyozo balo.
Empesar de pye derecho
Un gloryozo destino.

Pedaso de mi alma, ke dulse keyf es
De saver ke ganas tu pan
Sos respektado i todos te aman…
Ver ke yegates ande keriyas
Asuvites tu solo las eskaleras
Logrates honores i lo ke dezeyavas….

Es vedra ke a vezes afita
Ke el eskarinyo puncha komo espina…
Penso a tu soledad, sin keridos….
Ma oygo tu boz a mis oyidos
Ke me dize : “Esto bien i horozo,
Sos tu ke me preokupas i en ti penso…”

I es ansina ke la vida pasa
Akumulando amores i frustrasyones,
Kanseryas i plazeres,
Diyas tumultuozos, aventuras, amistades…

Ke dulse balmo es al korason
Kuando me sierves el te kon limon…
Sos tu ke te komportas komo lo aziya yo
Kon los mizmos gestos i el mizmo kudyo
Ser tu kodreriko alora ke tu eras mi kodreriko !
Kuando sin pensar me arregalas
I me regalas los sielos i las estreyas
Sos tu ke pensas en todo
I estas, mizmo de leshos, a mi lado
Siempre, komo un angelo bendicho

Sharope blanco

(Adaptado de la poeziya BIR OMUR SENINLE por Sharope blanco)

Las opiniones expresadas aquí representan el punto de vista particular de nuestros periodistas, columnistas y colaboradores y/o agencias informativas y no representan en modo alguno la opinión de diariojudio.com y sus directivos. Si usted difiere con los conceptos vertidos por el autor, puede expresar su opinión enviando su comentario.

SIN COMENTARIOS

Deja tu Comentario

Artículo anteriorEl Golem
Artículo siguienteLa FAA prohíbe los vuelos sobre el Estrecho de Ormuz
SHAROPE BLANCO en ESTAMBUL (Turquia) Sharope Blanco, economista y profesora de lenguas, administradora y fundadora del Grupo SEFARADIMUESTRO en Yahoo, donde escribe sus poemas, artículos, recuerdos y su novela Almendra. Escritora y poeta de innumerables poemas y artículos en Inglés, en Francés, en Turco y en Judeo-Espanyol, pocos publicados hasta la fecha. Su obra será publicada post-mortem según su deseo, por su hijo Nebil F. Behar, medico residente en Inglaterra.