Ma…. No oyemos lo ke mos dizen los savyos
Los ke saven muncho i mijor de mozotros…
Somos un puevlo pekador a la kavesa dura
Kuantas vezes mas Di-o mos pardonara ?
Fuimos kastigados por Sus Flamas kon ravya
Mos echo d’embasho en basho en vengansa
Yorimos, rogimos, mos arepintimos de vedra
Para otra vez pekar mas i de otra manera !
Portanto…. Si solo puediyamos, saviyamos amar
Kon dezintereso total, sin en kontra nada esperar
Si solo mos abokavamos delantre de El para implorar
I entender Su kamino i todo lo ke devemos lograr…
Su Nombre Santo inche de bienestar mis kantones
Es aki ke Lo reingrasyo por todas Sus bendisyones
Lo ke siempre me dyo en su immensa Buendad
Lo mas del todo, mi vida larga, mi repozo i mi libertad.
Te amo Tierra Madre, amo tu sekuritad, tu kalor
La hora va vinir i mi eskarinyo amahara kon tu amor
Me kuvijaras i olvidare todo, mis lagrimas i mi dolor,
Mis penas, las noches asoladas, solo por amarte mijor.
Aspero kon impasyensya mi yegada a la Eternitad
El Angelo kon sus ojos de Luz al kavo de la eskuritad
El largo kamino fina los kampos siempre en la klaritad
La Paz de las guertas ande reyna la Divina Piadad
Te amo Tierra Madre…inches el mundo de ermozura
Lo ke vemos kon los ojos, lo ke sale de tu tripa santa
Lo ke mos da vida, tus rozas, tu verdura i tu fruta
Un Amor sin kavo del Abastado i de Su Fuersa Gloryoza
Sharope [email protected]
Artículos Relacionados: