Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Vos akodro ke agora las emisyones de Radio J se pueden oir sovre internet. Si el tekniko lo kyere byen, mi emisyon se puede oir kuando se kyere, eya sola, o de toda manera se puede oir indose kuando se kyere al kavo de la redifuzyon de la emisyon del djueves a la tadre.
Ay kuatro anyos de esto, el 6 de oktovre 2011, vos ize una emisyon sovre los veluntaryos djuyos ajenos en Israel, espesyalmente los Fransezes. Muestra amiga Angèle Saül me dyo la idea de avlarvos esta vez de los veluntaryos djudyos ajenos en Fransya, durante la primera i la sigunda gerras mundyales.
Por lo ke es de la primera gerra, ya vos dishe unos kuantos byervos sovre la partisipasyon de los djudeo-espanyoles de Fransya, i por empesar de Paris, kuando vos ize mi emisyon del 14 de janvier 2010, ande vos dishe lo sigiente:
“Komo ya lo savesh, el primo de agosto de 1914, diya de Tisha beav, empesa la Primera Gerra Mundyala, kon la deklarasyon de gerra de l’Almanya kontra la Rusiya i el 3 kontra la Fransya. El 24 de agosto, los voluntaryos djudyos dichos oryentales, kijo dizir los djudeo-espanyoles, se arrekojen delantre del 60 rue Sedaine, i se van a la gerra.
“Asigun lo ke eskrive Annie Benveniste ke se funda sovre los arshivos del Ministeryo franses de los echos ajenos, dos mil djudyos osmanlis se fueron a la gerra komo veluntaryos, lo ke me parese ser una proporsyon konsiderable si mos akodramos ke aviyan solo 155 djudyos myembros del kal Popincourt en 1909, 5 anyos mas antes. Kale dizir ke si parese ke fueron « munchos syenes » de muertos a la gerra, komo esta eskrito sovre la laja en sus memorya metida en 1924 al 60 se la rue Sedaine, el shifro de 2.000 muertos indikado por Ovadia Camhy en 1962, a la inogurasyon del kal de la Roquette, me parese egzajerado, porke kijera dizir ke todos los voluntaryos se muryeron. Lo ke es siguro, es ke uvo un grande movimyento de los djudyos sefaradim de Paris en favor de la Fransya.
(…)
” La Asosyasyon Amicale des Combattants Volontaires Orientaux en 1933 resive en una seremoniya ofisyala la Bandera de la Republika Franseza , « emblème de reconnaissance pour les sacrifices apportés sur l’autel de la liberté et de l’égalité » (sinyo de rengrasyamyento por los sakrifisyos traidos sovre el altar de la libertad i de la igualidad). 1933…Komo se podriya andevinar ke solo ocho anyos despues, en 1941, la Fransya se va olvidar de esto todo, i aferrar a estos mismos djudyos veluntaryos sovrebivyentes de la gerra para echarlos en kampos komo beemot i darlos a los Almanes ? Dainda oy me esto enkantando de una tala negrigura.”
Esto era los ke vos kontava en 2010 i no veo nada de trokar, sino ke en este teksto yo avlava solo de los djudeo-espanyoles de Paris. Ama de la mizma manera ke los djudeoespanyoles se fueron veluntaryos por la primera gerra mundyala, los djudyos ajenos ashkenazim izyeron djusto lo mismo.
uevacj-eaPara azer esta emisyon, lavori sovre el sityo de la Union des Engagés Volontaires, Anciens Combattants juifs 1939-1945, ke en vedra no avla solo de la sigunda gerra mundyala, ama tambyen de la primera.
Por lo ke es de los lehlis, el primo de agosto 1914, dos diyas antes de la deklarasyon de gerra, los djudyos ajenos eskriven en yidisch en las gazetas: ” En un punto la Fransya se puede topar en gerra. Mozotros djudyos venidos de afuera, ke vamos azer? Vamos kedarmos sin azer nada kuando el puevlo franses se alevanta komo un solo ombre para defender Paris? No! Porke si dainda no somos fransezes de derecho, lo somos de korason i de alma, i muestro dever lo mas sagrado es de metermos a la dispozisyon de esta grande i noble nasyon.”
Otro papel, eskrito a la vez en franses i en yidisch, dize: “Viva la Fransya! Ermanos djudyos! Iremos kombatir para la Fransya, para muestra kerida patria, djeneroza i ospitalyera.”
Del primer diya de la gerra, 4.000 djudyos ajenos se prezentan , i este numero se aunfla kada diya mas. 40.000 ajenos venidos de 52 paizes se prezentaron en el solo mes de agosto 1914. Kuantos djudyos entre estos todos, no se, ama munchos. Asigun lo ke meldi, entre 10.000 i 30.000.
El jeneral Palat eskrivyo un livro ande konto komo 1.200 djudyos ajenos kayeron en el suelo franses, en kombatyendo kon koraje. Por siguro, aki no estamos avlando de los djudyos fransezes de las armadas fransezas, solo de los veluntaryos djudyos ajenos.
Aki me vo kedar sovre la primera gerra mundyala porke vos kyero tambyen, i mismo sovre todo, avlar de los veluntaryos de la sigunda.
Antes vos kyero akodrar lo ke eskrivyo Pierre Van Paassen en 1943 en su livro Forgotten Ally (el allyado olvidado): : « El puevlo djudyo tyene una armada de un milyon i medyo de askeres : serka de un milyon solo en la armada kolorada (450.000) i en la armada amerikana (500.000). Los askeres djudyos se amostraron en todas las batayas, ama poko aprovecharon en tanto ke puevlo de lo ke izyeron. Se puede pensar ke el mijor eskondimyento de esta gerra es la parte ke los djudyos tyenen en eya. Un puevlo kon una armada de milyon i medyo de kombatantes es el asker deskonosido de esta gerra, el alyado sin nombre, sin siya en el konsijo de las nasyones ! »
Esto es lo ke eskriviya Van Paassen. Yo aprovi una vez, en la emisyon ke ize sovre la brigada djudiya, de avlarvos de los muy pokos djudyos ke puedyeron kombatir en tanto ke djudyos (los del Ghetto de Varsovia, por egzemplo). Oy vos vo avlar de los djudyos ajenos de Fransya ke fueron veluntaryos para kombatir a los Almanes basho la bandyera franseza.
Asigun lo ke meldi de Ilex Beller, fueron 86.000 los djudyos ke kombatyeron basho la bandyera franseza (numero establesido por la ONU), i entre eyos unos 30.000 veluntaryos ajenos.
Aki avlo de los ajenos djudyos. No fueron los solos ajenos. Munchos de los veluntaryos ajenos fueron tambyen republikanos espanyoles refujyados en Fransya. A propozito de estos republikanos espanyoles,vos akodro ke munchos fueron en la Lejyon Ajena ke va kombatir kon las Fuersas Fransezas Liberas.
Kale dizir tambyen ke si uvo veluntaryos espanyoles en la armada franseza, kombatyendo al lado de los djudyos, lo mismo se teniya pasado pokos anyos antes, kuando tantos djudyos se fueron kombatir en Espanya en las Brigadas internasyonales al lado de los republikanos.
Me akodro ke un anyo me fui a oir en el Limoud una konferensya de muestra amiga Ruth Arciniega sovre el rolo i la partisipasyon de los djudyos en las brigadas internasyonalas.
Yo mismo konosi unos kuantos de estos brigadistos en la famiya de mi mujer lehliya. Agora el tyempo a pasado i no son mas de este mundo.
El rezultado de esta amistad de gerra va ser ke los primeros tankes fransezes ke van a entrar en Paris para liberarlo el 24 de agosto 1944 van a ser los de la brigada yamada (en espanyol) la Nueve, kompozada de veluntaryos espanyoles. I los Parizyanos enkantados van a ver ke los liberadores de la armada franseza ayegan kon tankes yamados Madrid, Guernica, Teruel, Guadalajara, ets! (sin olvidar el famozo Mort aux cons (muerte a los bovos) ke va ver el jeneral De Gaulle i meldandolo se va aboltar verso su ayudante para dizirle: Vaste programme! (muy grande ambisyon!).
Ama dainda no estamos en 1944, ama en 1939, kuando vyenen los veluntaryos djudyos ajenos para kombatir en la armada franseza.
Son kreados en 1939 varyos rejimentos de veluntaryos ajenos. Kada uno tyene su istorya. Vos akodro ke si la gerra se deklaro al empesijo de septyembre 1939, empeso por vedra kuando los Almanes atakaron el 10 de mais 1940.
Vos akodro tambyen ke la lucha de la armada franseza ofisyala va turar astal 25 de junyo, kon el armistisyo firmado por Petain.
En un mez i medyo la armada franseza es vensida. Deke? Parese ke la falta no es la de los askeres, ke se batyeron kon gra nde koraje i tuvyeron 59.000 muertos, ama del alto komandamyento franses, ke no aviya entendido ke las reglas de la stratejiya aviyan trokado.
Lo ke es siguro, es ke los rejimentos de veluntaryos ajenos, ande aviya munchos djudyos, kombatyeron komo leones.
Por egzemplo, el 11en REI, de 3.000 ombres (REI, si no me yerro, es Régiment Etranger d’Infanterie: rejimento ajeno de askeres a pyé) reziste a los Almanes ke atakan el 27 i 28 de mais serka de Verdun (el famozo Verdun de la primera gerra mundyala) i pyedren aya 300 ombres.
Entre el 18 i el 22 de junyo, rezistyendo a las atakas almanas, el rejimento pyedre los tres quartos de sus ombres. Este rejimento va ser sitado a la orden de la armada.
El 12en REI, de 2.800 ombres, es mitad kon espanyoles i mitad kon djudyos. Entre el 6 i el 7 de junyo, defendyendo Soissons, el rejimento pyedre la mitad de sus ombres, kyere dizir unos 900. Va pedrer otros 600 en los kombates de defensa. Van a kedar unos 300. Este rejimento tambyen va ser sitado a la orden de la armada.
La 13ena Medya-Brigada de la Lejyon ajena va kombatir en Norvejya en Narvik para kortar el kammino del fyerro, el fyerro de Sueda ke va en Almanya en pasando por la Norvejya.
“El kamino del fyerro es kortado!” grita el Primer ministro Paul Reynaud al Senato el 16 de avril 1940. Es una de las mas famozas mintiras de la gerra. En vedra los Almanes an tomado Narvik a los Norvejyanos, i para kortar el kamino, kale en primero tomar Narvik a los Almanes.
La bataya va ser terrible i son los de la Medya Brigada ke van a reushir, el 28 de mayo, a tomar Narvik a los Almanes.
Malorozamente, vyendo la situasyon de la armada franseza en Fransya misma, el alto komandamyento demanda a la Medya Brigada de aboltar en Fransya, deshando Narvik de muevo a los Almanes. Tantos esfuersos, tantos muertos para nada…
El 21emo RMVE (Rejimento de marcha de veluntaryos ajenos) es yene komo los otros: 2.800 ombres, unos 30% de espanyoles, 40% de djudyos. Van a kombatir rezistyendo syempre kontra los Almanes, i pedrer 60% de los ombres.
El 22en RMVE va ser yene la misma koza: 2.800 ombres, 40% de djudyos. Van a rezistir sin achetar la redisyon , kombatir puerpo a puerpo . i pedrer 2.000 ombres. Retardaron de 15 diyas la entrada de los Almanes en Paris. Rejimento sitado a la orden de la armada.
El 97en Grupo de Rekonosensya: 650 veluntaryos: 25% de djudyos. No kedaron de luchar. 50% de pedrita de ombres. No solo sitasyon a la orden de la armada, ama tambyen Cruz de gerra kon palma.
Estos son los ke se batyeron en Fransya. Ama ay los ke fueron embiyados en Afrika del Norte, komo por egzemplo Albert Saül, padre de muestra amiga Angèle Saül.
Vamos a avlar de el un poko mas despues.
Lo ke keda de esto todo ke vos konti, es ke los veluntaryos ajenos, ke sean djudyos o no, kombatyeron por la Fransya kon koraje i sakrifisyo. Ama la manera kon ke van a ser tratados despues por la Fransya es una verguensa, una mancha ke kedara para syempre.
Despues ke fue firmado el armistisyo, en vez de dar su libertad a estos giborim, el orden vino de Vichy de guadrarlos sin ke sean mas militares. Van a ser “lavoradores,” lavoradores ajenos. Por aver kombatido, son kondenados a los lavores forsados.
I aki kale avlar del padre de Angèle Saül, ke tuvo de bivir komo un kondenado a las galeras, basho la rigor de torsyonaryos sadikos, ke no saven kualo inventar para azer sufrir a los syervos. Los syervos lavoran 10 oras por diya a romper pyedras para fraguar un kamino de fyerro, en la kalor del diya i el friyo de la noche, lo todo kon muy poko de bever o de komer.
Angèle me konto ke su padre teniya por kompanyero un espanyol ke no saviya avlar fransez. Su padre le avlava en djudyo i el otro le respondiya en kasteyano, i se entendiyan muy byen! Se kedaron amigos despues de la gerra i Angèle lo konosyo muy byen a este veluntaryo espanyol.
Entremyentres, de kedar solika en Fransya sin la proteksyon de su marido, su mujerika de 22 anyos, Sarah, va ser aferrada i deportada. Kuando su marido, el padre de Angèle, va ser liberado en 1943 por los Amerikanos, no va pueder aboltar en Fransya i va tomar un lavoro en el Marocco. Aboltara en Fransya solo en 1947. No solo no topara mas su mujer deportada, ama no topara tampoko su apartamento tomado atras por el proprietaryo, ni la mobilya ke se topava aryentro.
I por lo ke es de los veluntaryos djudyos, una vez ke no eran militares, no eran mas protejados por las Convensyones sovre los prezoneros, i puediyan ansina ser aferrados por los Fransezes i deportados por los Almanes.
Aki tengo de kontar la istorya del padre de muestra amiga Gisèle Nadler. Veluntaryo ajeno, kombate por la Fransya i los Almanes lo azen prezonero. Tanto se aflaka en prezo ke los Almanes eyos mismos lo liberan i lo deshan aboltar en Fransya. Una vez en Fransya, va bivir de muevo kon su mujer, i kyen lo aferra? La polisiya franseza. Esta vez va ser deportado, i no va aboltar. Ansina fue rengrasyado por la Fransya de tener kombatido para eya.
Oi lo mismo kontado por el mediko Boris Cyrulnik a propozito de su padre, veluntaryo en la Lejyon Ajena en ke va ser dekorado de la Kruz de Gerra. Ferido a la gerra, va ser tomado por la polisiya, o la milisya, no se byen, en el ospital ande era kurado, i travado de su kama va ser embiyado a la muerte por los fransezes.
Ke asko…
No me keda tyempo para avlarvos de los djudyos ajenos en la Rezistansya. Ya vos aviya avlado en una otra emisyon de los ke aviyan kombatido komo djudyos, ajenos o no. Tendremos tambyen un penseryo para los djudyos komunistos ke lucharon en la MOI (lavoradores imigrados), por egzemplo los fuziyados del grupo Manouchian (ke el era ermeni).
Al djueves ke vyene, si kyere el Dyo!
Artículos Relacionados: