Antes diez anyos i medyo lo eskrivi !!!! Me kayo entre las manos i kije kompartirlo kon vozotros….. No se kualo me paresyo tan “Interesante”! Una nostaljiya de los primeros tiempos de Sefaradimuestro parese. Ansina estava eskrito :
Un kayintiko Hello a mi amigo en Australia, el kerido Simon Geron,
Ke tengas todo bueno Simon por lo ke me izites !
Dia i noche esto metida en tu vida, en tu proza i en tus poeziyas….. Kreyeme, si no estava eskrito tan ermozo i no valiyan oro de verdad, ademas si no era una otobiografiya tan enteresante i ke por seguro vale lavorar ensima i publikarlo komo se deve, ni ke iva meneyar mi dediko chiko ! Ven veremos ke tu ovra es muy valutoza i ermoza.
El uniko enkonvenyente de este echo fue ke vino djusto al empesijo de este sityo muevo ke demanda el kudyado i la pasensya ke kale para un bebiko ! I el Di-o save las horas ke esto pasando en frente de mi ventanika majika pensando, eskrivyendo, “aremendando” i “kuzyendo”, traduizando i moderando !
Mi ojo no puede ver una koza ke no es estetika al mirar i por esto kito meto, me mareyo, salto de arriva, me kayo en basho, me alevanto, torno a la derecha, torno a la siedra i veygo ke ” sof sof ” (a la fin) ke no esta negro! Ya le do una punta de pie ansina kon el dedo para ke todos los melden kon plazer en el foro. Es este momentiko de la punta del pie kon el dedo ke es el “beziko” de lo ke ize.
Soriyo a los andjelos de mis kantonikos, me kareso las karikas i me digo ke me kiero bien ! En todos los echos ke todos azen ay un momento de satisfaksyon, sin esto la vida no valeriya la pena de bivir ! I no siempre la satisfaksyon viyene kon el dinero ! Es vedra ke las personas no dan importansya a sus “satisfaksyones”, no “ven” la ermozura de un buen momento o todo lo ke afita “derecho” les viyene komo natural ! Es un grande yerro ! La alegriya de bivir depende muncho de “ver” las ermozuras de la tierra, de las personas a vezes ( i no avlo del fiziko) de un echo bien terminado, de una buendad echa, de saltar de plazer por una kozika mueva de valor minimala de una soriza o de un rayo de sol en invierno….
Yo soriyo al aire ke asopla en las horas kemando de los dias de enverano en Turkiya. ” asopla asopla mas aireziko dulse ” le digo… A esta edad me duelen las piyernas, la espalda, el ombro….Yo se ? Duele duele …..I kuando esto lavorando o okupada me olvido ! Todo pasa. No es una satisfaksyon esto ? A esta edad yegi, munchas grasyas al Santo Bendicho, sin dingun mal seryozo, alora ke de vanda de mi madre todos se muryeron mansevos…. Mamita a 48 anyos ! Granmami a 53 i tantine a 38 ! Todos kon kanser…. Yo dayinda no ! No es koza grande esto ? Komo puedo no ser rekonosida i no “renderme kuento”….
El otro dia pensi ke tu ovra me vino komo mi primer oto !!! Sityo muevo, adjemilik (unfamiliar) i una montanya de tus eskritos ! Madre mia bendicha !
Kon el oto fue mas o menos la mizma koza ! Mis primeros tiyempos en Israel….Ya pasi los egzamenes, ya me ambezi…Merki una oto vieja tresera, kuatrena mano no se ! Baratika … Una Renault 5… I sola me asenti para konduizirla……Hahahahahahah !!! Nada ! Nadika !Teniya el “starter” ke no fonksiyonava ! Se travo, le “izyeron” starter i kamino. Me meti para vinir a kaza se inyervo la hanum ! Aguas buyendo, golores…. Se le rompyo el kayish (belt) soflamas, yorando en medyo del kamino (no ay selular !) de una manera i esto se lo “izyeron” . Tomi un belt yedek (spare) tanto me espanti de esto !….” – 3 diyas dospues la puerta no se serra ! Elohim ! Dospues fue el gear box entero, los breaks….todo todo …..A la fin estava mas mueva de un koche muevo ! Diziya ke es mi metresa ! Syempre
“keriya” una koza…. La vendi yorando porke la keriya bien… Era mi “Nelbi” presyada….Estava muy muy ermoza i entera mueva kuando la vendi i nunka me olvidi de eya…Tanto ke mi mueva Justy ” 0 ” no teniya valor a mis ojos…. Dospues si. Dospues ke la “sharopeyi” se incho de mi perfum, de mi muzika, de mis djugetikos !
Kedi 17 anyos en Israel kerido Simon. 17 anyos maraviyozos, lavorando muncho muncho, viajando muncho muncho, gozando de kada koza, de kada diya, de kada bavajada, de mis amigos, de mis amistades, de las kreaturas a ken dava lisyones, a parte de mi echo (fui una administradora en una grande empresa de Telekomunikasyon – no al empesijo !-)
I yo tuve una vida muy intensa i interesante fina ke me rendi kuento ke se tambien eskrivir!
Artículos Relacionados: