No, no tuvimos fuertes kalores, no mos se korto el reflo i no tuvimos palpitasyones de korason pormodo de la kalor ! Portanto estavamos auzados a este modo de kalores en enverano durante los 15 anyos d’alkavos… En kaza no, grasyas al Di-o ! La “santa” klimatizasyon mos salva de atabafarmos ! No tanto por mozotros ma por los povretikos de muesros gatos debasho de sus godra samara…. Vo pensando a los dezmazaladikos en las kayes i me se parte el korason !
Komo kada anyo mi presyado de ijiko kudyo a ke no kedemos sin banyarmos i tener vakansyas. Vino kon mozotras des de su leshana Inglaterra a este kanton komo un vedradero paradizo, eskondido en los bodres de la Mar Aegea, kon sus aguas transparentes de kolor turkuaz. Ma…. yo tengo friyo ! No me se arrekayintaron los guesos dayinda. Ayres, luvya, nuvlas grizas…. Kuatro diyas no puedimos nadar komo lo sonyimos invierno entero ! La koneksyon del internet esta una dezgrasya i la vedra es ke esto me importa lo mas !
Pasimos los diyas indomos a pasear en los entornos i de vedra un lugar de enkantar la persona, “Alacati”, un viejo puerto grego ke guadro su architektura i sus kalejikas estrachas… Las flores i las kolores, las golores de las tavernas, restaurantes i pubs ke inchen estas kalejikas kon miliun objekto artizanal fueron un verdadero festival para muestros ojos.
Dospues de komer en un chiko restaurante de marineros ke sierve solo varias salatas i pishkados mos fuimos a un kafe famozo kon sus dulses de Salonika i sus yelados de todas las savores ke egzisten. Nunka olvidare esta botika tan tipika i los yelados ke gostimos…. Kaminimos gozando de Alacati i lo mas mirando a las mujeres i a los hombres vistidos elegantisimos i a vezes de manera ekstranya a mis ojos !
Mi Playa – la tadre
Ayer a la fin mos puedimos banyar… Kreyo ke estavamos en la mas ermoza plaj ke puediya ser. Nadimos komo los pishkadikos ke mos akompanyavan en la mar. El tiempo bolo de entre los dedos i mos topimos saltando i baylando en la pista de las animasyones del hotel ke aze todo su posivle para divertir la gente i espesyalmente las kreturas. Todo iva ser maraviya si supito no me sinti mal… de aver saltado tanto i kanserme demasyado olvidando ke no so ke una nonika ! Presto arepozarme, kurika i los “guayes” de mi ijo i de mi ijika ! Oy me asenti komo una prinsesa sin nadar ni kaminar !…. El chiki chiki (eskrivir en la komputadora) me abasto i me sovro para pasar el tiempo komo me gusta lo mas…. El ayre debasho de los arvelos sekularios fue una dulse karesa a mis karikas, chuflandome kualo eskrivir a mis lektores… De vedra ke tienen una grande guerta ke asemeja a todo lo ke deskriven del Ganeden ! Me divertyo tambien mirar a todos los ke estavan un poko mas leshos, a los bodres de la immensa pisina, partisipando de vez en kuando a los juegos en grupo. Ni puediya ensonyarme de mijores vakansyas este anyo. Si todo va bien i si DI-o lo kere, planeamos pasar tambien una semanika en el Sud, en Bodrum ande auzamos irmos kada anyo. Ke mas se puede kere para reingrasyar el Santo Bendicho noche i diya ……
Vos auguro una maraviyoza enveranada i por los de la hemisfera del Sud un invierno de los mas repozados, en lo kayintiko de vuestros kantones.
Kon karinyo
[email protected]
Artículos Relacionados: